2023 წლის 6 ივლისს დასრულდა ინფორმაციის თავისუფლების განვითარების ინსტიტუტისა (IDFI) და საქართველოს უნივერსიტეტის (UG) თანამშრომლობის ფარგლებში შექმნილი სასწავლო პროგრამა  “დეზინფორმაციისა და პროპაგანდის კვლევა: ისტორია, თეორიები და გაბათილების საშუალებები” და სასწავლო კურსის მონაწილეებს სერტიფიკატები გადაეცათ.

2022-2023 წლის სასწავლო პროგრამაში ჩართული იყო 24 მონაწილე. სასწავლო წლის განმავლობაში სტუდენტები გაეცნენ ექვს სასწავლო კურსს: კიბერუსაფრთხოების საფუძვლები; დეზინფორმაციის იდენტიფიცირება და კვლევა; დეზინფორმაცია და საზოგადოება; კოლექტიური მეხსიერება და მისი როლი ქართულ პოლიტიკასა და საერთაშორისო ურთიერთობებში; სტრატეგიული აზროვნება; არქივები, მედია და ფაქტები.

აკადემიურ კურსებთან ერთად, მონაწილეებს შესაძლებლობა ჰქონდათ ჩართულიყვნენ უნარების განვითარებაზე ორიენტირებულ პრაქტიკულ სემინარებში, რომელიც სემესტრის განმავლობაში დაორგანიზდა.

დაჯილდოების ღონისძიებაზე პროგრამის მონაწილეებს სიტყვით მიმართეს IDFI-ის მეხსიერებისა და დეზინფორმაციის კვლევის მიმართულების ხელმძღვანელმა ანტონ ვაჭარაძემ, UG-ის სოციალურ მეცნიერებათა სკოლის დეკანმა, ნათია კალაძემ და კურსის ლექტორებმა - ნინო გოზალიშვილმა და რევაზ თოფურიამ. მათ მიმოიხილეს პროგრამის ფარგლებში მიმდინარე სასემინარო კურსის შედეგები, ხაზი გაუსვეს მონაწილეების მიერ შეძენილი უნარ-ჩვევების გამოყენების მნიშვნელობას და წარმატება უსურვეს კურსდამთავრებულებს. დაიგეგმა სამომავლოდ ერთობლივი ღონისძიებებისა და კურსდამთავრებულებთან ურთიერთკავშირის შენარჩუნების კონკრეტული ღონისძიებები.

IDFI-სა და UG-ს აღნიშნული კურსი უკვე 2 წლის განმავლობაშ წარმატებით ამზადებს არა მხოლოდ სტუდენტებს, არამედ პროფესიონალებს, რომლებსაც დეზინფორმაციასა და პროპაგანდასთან გამკლავება საკუთარი საქმიანობის ფარგლებში უწევთ. კურსზე UG-ის სტუდენტების გარდა, 2 წლის განმავლობაში 50-ზე მეტი პროფესიონალი მონაწილეობდა. ისინი წარმოადგენდნენ ადგილობრივ და რეგიონულ მედიას, სახელმწიფო დაწესებულებებს, არასამთარობო სექტორს და სხვა ისეთ ორგანიზაციებს, რომლებსაც უშუალოდ ეხებათ აღნიშნული საკითხები.

კურსდამთავრებულმა, Euronew Georgia-ს ჟურნალისტმა ელენე ქორქიამ ღონისძიებაზე აღნიშნა: “მე, როგორც კურსდამთავრებულმა მინდა ვთქვა, რომ არაერთხელ მომიწია ჩემი საქმიანობის ფარგლებში ისეთ თემებთან შეხება, რომლებიც უკვე განხილული გვქონდა კურსის ფარგლებში. აღნიშნულ ვითარებაში მე შევძელი მიღებული ცოდნის პრაქტიკაში გამოყენება, რამაც გამიადვილა მუშაობა და ამის საშუალება სწორედ აღნიშნულმა კურსმა მომცა.”

სასწავლო პროგრამა ხორციელდება შვედეთის საერთაშორისო განვითარების თანამშრომლობის სააგენტოს (SIDA) ფინანსური მხარდაჭერით.