პროექტები

პროექტის სახელწოდება: საქართველოს მოქალაქეთა საარჩევნო ხმის უფლების დაცვა

დონორი ორგანიზაცია: ჩეხეთის საგარეო საქმეთა სამინისტრო

პროექტის ხანგრძლივობა: სექტემბერი, 2024 - დეკემბერი, 2024

გრანტის ოდენობა:  500 000 ჩეხური კრონა (19,860.97 ევრო)

პროექტის მიზანი

საქართველოში თავისუფალი და სამართლიანი საპარლამენტო არჩევნების ჩატარების მხარდაჭერა.

პროექტის აღწერა

ქართულმა სამოქალაქო საზოგადოებრივმა ორგანიზაციებმა დააფუძნეს კოალიცია - „ჩემი ხმა ევროკავშირს“. 

კოალიცია მიზნად ისახავს: 1. არჩევნებამდე კამპანიის - „ჩემი ხმა ევროკავშირს“ - განხორციელებას; 2. ფართომასშტაბიანი სადამკვირვებლო მისიის ორგანიზებას, რომელიც სხვა საკითხებთან ერთად მოიცავს წინასაარჩევნო პერიოდში ამომრჩეველთა საინფორმაციო კამპანიას, წინასაარჩევნო პერიოდსა და არჩევნების დღეს ერთობლივ დაკვირვებას, ხმების დაცვას. სადამკვირვებლო მისიამ უნდა მოიცვას ყველა საარჩევნო უბანი გახსნილი როგორც საქართველოში, ისე მის ფარგლებს გარეთ.

პროექტის აქტივობები მიზნად ისახავს კოალიციის საქმიანობაში წვლილის შეტანას, მათ შორის სამართალწარმოებით მოქალაქეთა ხმების დაცვას, და დამკვირვებელთათვის ტრენინგის ჩატარებაში მონაწილეობას. 

ბიუჯეტი

 ხელშეკრულება 

პროექტის სახელწოდება: მოქალაქეთა ჩართულობის ციფრული საშუალებების შეფასება

პროექტის კონტრაქტის ნომერი:1005207-101

დონორი ორგანიზაცია: DAI Global, LLC / USAID საჯარო მმართველობის პროგრამა

ბიუჯეტი: 99,995 ლარი

ხანგრძლივობა: მაისი 30, 2024 - თებერვალი 7, 2025

პროექტი მიზნად ისახავს, გაზარდოს ციფრული ინსტრუმენტების ეფექტურობა და გამოყენება მოქალაქეთა ჩართულობისთვის. ამ ინსტრუმენტების და მომხმარებელთა კმაყოფილებასთან დაკავშირებული გამოწვევებისა და შესაძლებლობების კვლევით პროექტი ავსებს იმ კვლევით ვაკუუმს, რომელიც ამ სფეროშია, რაც საბოლოოდ უზრუნველყოფს რეკომენდაციებს ტექნოლოგიების უკეთესი გამოყენებისთვის. აღნიშნული სრულ თანხვედრაშია USAID საჯარო მმართველობის პროგრამის მიზნებთან, გაზარდოს მთავრობის ანგარიშვალდებულება და პასუხისმგებლობა, რათა გაუმჯობესდეს საჯარო სერვისების მიწოდება და ხელი შეეწყოს მოქალაქეების მონაწილეობას გადაწვეტილების მიღების პროცესში.

პროექტის ფარგლებში შემუშავდება შეფასების მეთოდოლოგია და სიღრმისეული ანალიზისთვის შექმნის ციფრული ინსტრუმენტების მოკლე სიას. კვლევა ასევე მოიცავს დაინტერესებული მხარეებისგან ინფორმაციის შეგროვებას და ხელმისაწვდომი ინსტრუმენტების სიის შედგენას. წინასწარ შემუშავებულ კრიტერიუმებზე დაყრდნობით, მოხდება ამ ინსტრუმენტების სისტემატიზება. ყველაზე ფართოდ გამოყენებული ინსტრუმენტები საფუძვლიანად შეფასდება მომხმარებელზე ორიენტირებული მიდგომისა და ხალხი-პროცესი-ტექნოლოგიების ჩარჩოს გამოყენებით.

მონაცემები შეგროვდება ონლაინ გამოკითხვის მეშვეობით, რათა მეტი გავიგოთ ციფრული ინსტრუმენტების გამოყენების გამოცდილებისა და მომხმარებელთა კმაყოფილების შესახებ. მომხმარებლის გამოცდილების კვლევა ფოკუსირებული იქნება მოწყვლადი ჯგუფების საჭიროებებზე. დამატებითი ინფორმაციისთვის კი საჯარო და კერძო სექტორის პირებთან ჩატარდება ინტერვიუები.

პროექტის გუნდი შეგროვებულ მონაცემებზე დაყრდნობით ჩაატარებს ყოვლისმომცველ ანალიზს, რომლის შედეგადაც შექმნის მტკიცებულებებზე დაფუძნებულ კვლევით ნაშრომს, შესაბამისი რეკომენდაციებით საჯარო სექტორისა და სხვა დაინტერესებული მხარეებისთვის. რეკომენდაციები აქცენტს გააკეთებს იმ სტრატეგიებზე, თუ როგორ უნდა გაიზარდოს მოქალაქეთა ჩართულობა და ციფრული ინსტრუმენტების გამოყენება.

პროექტის ბოლოს კვლევის მიგნებებს წარვადგენთ სხვადასხვა დაინტერესებული მხარისთვის დისკუსიისა და უკუკავშირისთვის, რათა წახალისდეს მტკიცებულებებზე დაფუძნებული მსჯელობა მოქალაქეთა ჩართულობისთვის შექმნილ ციფრულ ინსტრუმენტებთან დაკავშირებული გამოწვევებისა და შესაძლებლობების შესახებ. ამგვარი მონაწილეობითი მიდგომა მიზნად ისახავს, შექმნას მომხმარებელზე მეტად ორიენტირებული ციფრული ინსტრუმენტები, რომელიც გრძელვადიან პერსპექტივაში მომხმარებელთა საჭიროებებს იქნება მორგებული.

პროექტის აქტივობები მოიცავს:

-          მეთოდოლოგიის შემუშავება და სიღრმისეული ანალიზისთვის ციფრული ინსტრუმენტების მოკლე სიის შექმნა (I თვე)

-          მონაცემთა შეგროვება (II-VIII თვე)

-          კვლევითი ნაშრომის მომზადება (V-VIII თვე)

-          კვლევის მიგნებების პრეზენტაცია (VIII-IX თვე)

ხელშეკრულება

პროექტის სახელწოდება:საერთო ისტორია, საერთო მომავალი

დონორი ორგანიზაცია: სამოქალაქო საზოგადოების ფორუმი (Civil Society Forum e.V.)

საერთო ბიუჯეტი:18,465 ევრო

ხანგრძლივობა: 15.04.2024-25.02.2025

სამოქალაქო საზოგადოების ფორუმის (Civil Society Forum e.V.) პროგრამა Confronting Memories აერთიანებს 100-ზე მეტ მასწავლებელს სომხეთიდან, ბელარუსიდან, საქართველოდან, გერმანიიდან, მოლდოვიდან, პოლონეთიდან, რუსეთიდან და უკრაინიდან, რათა ერთად იმუშაონ მულტიპერსპექტიული და კომპეტენციებზე დაფუძნებული საგაკვეთილო მასალის შესაქმნელად, რომელიც მოიცავს მეორე მსოფლიო ომიდან მიმდინარე კონფლიქტებს.  შექმნილი მასალები ხელმისაწვდომია პროგრამის ვებგვერდზე და ჩამოტვირთვა თავისუფალია.

პროექტის მიზანია, პროგრამა Confronting Memories-ის ფარგლებში შექმნილი პედაგოგიური გზამკვლევი ისტორიის მასწავლებლებმა და პედაგოგებმა გამოიყენონ სასწავლო მასალებსა და გაკვეთილებში, მასალების მიხედვით ჩაატარონ გაკვეთილები როგორც საკუთარ კლასში, ასევე გასწიონ მასალის გაცნობის ფასილიტაცია კოლეგებს შორის.

IDFI-ს მოვალეობებია:

ა) 5-7 ისტორიის მასწავლებლებლისა და პედაგოგის (ფორმალური თუ არაფორმალური განათლების სექტორი) შერჩევა საზაფხულო სკოლაში მონაწილეობის მისაღებად;

ბ) ვორქშოფში მონაწილეობა 2024 წლის 17-21 ივლისს, სომხეთში, დილიჯანში;

გ) შერჩეული მასწავლებლების მიერ საკუთარი კოლეგებისთვის ვორქშოფის ჩატარებაში ხელშეწყობა და მხარდაჭერა;

დ) ვორქშოფის ორგანიზება 20-25 საერთაშორისო მონაწილისთვის თბილისში, 2025 წლის იანვარში.

ხელშეკრულება

პროექტის სახელწოდება: – სსო მეტრი: ქმედება უკეთესი გარემოსთვის

დონორი ორგანიზაცია: ევროკავშირი (EU); სამოქალაქო საზოგადოების ინსტიტუტი

ბიუჯეტი: 6,720.00 ევრო 

ხანგრძლივობა: მარტი 5, 2024 - დეკემბერი 31, 2027

პროექტის მიზანი:

პროექტის მიზანია პროექტის ფარგლებში დაფუძნებული რეგიონალური ჰაბის წევრობა და კომპეტენციის ფარგლებში CSO Meter-ის ყოველწლიური ანგარიშის განახლება.

პროექტით გათვალისწინებული ძირითადი აქტივობები:

- ჰაბი ორგანიზაციის ფარგლებში ექსპერტის/ექსპერტების გამოყოფა, რომელიც / რომლებიც იმუშავებს / იმუშავებენ პროექტით გათვალისწინებულ საკითხებზე და პასუხისმგებელი/პასუხისმგებლები იქნებიან პროექტთან დაკავშირებულ თემაზე;

- მონაწილეობის მიღება სსო მეტრის ადგილობრივ და საერთაშორისო ღონისძიებებში, შესაძლებლობების გაძლიერებისა და ნეთვორქული მიზნებისათვის;

 - მონაწილეობის მიღება ყოველწლიური ადვოკატირების გეგმის შემუშავებაში, პრიორიტეტებისა და პასუხისმგებლობების განსაზღვრის პროცესში;

 - მონაწილეობის მიღება ქვეყნის დონეზე მონიტორინგის, ანგარიშებისა და სხვა ანალიტიკური დოკუმენტების შექმნაში;

- მონაწილეობის მიღება სსო მეტრის მრჩეველთა საბჭოს სამუშაო პროცესში;

- საკუთარი კომპეტენციის ფარგლებში პროექტთან დაკავშირებულ საკითხებზე დისკუსიაში ჩართვას და კონსულტირება;

- სსო მეტრისთვის რელევანტური მიმართულებების მიხედვით წინასწარი საფრთხეების (Early warnings) გამოვლენა და მათზე დამკვეთისა და ჰაბის სხვა წევრებისათვის ინფორმაციის მიწოდება;

 - პროექტის ფარგლებში მომზადებული ანგარიშების გავრცელება;

 - ადვოკატირების აქტივობებში ჩართვა ჰაბის დანარჩენ წევრებთან შეთანხმების შემთხვევაში. 

ხელშეკრულება

პროექტის სახელწოდება: ახალგაზრდების ჩართულობისა და მენტორინგისთვის საჯარო პოლიტიკის საპილოტე ინიციატივები

პროექტი N: 1005207-101

დონორი ორგანიზაცია: DAI Global, LLC / USAID საჯარო მმართველობის პროგრამა 

ბიუჯეტი: 215,922 ლარი

ხანგრძლივობა: თებერვალი 23, 2024 - თებერვალი 22, 2025

პროექტის მოკლე აღწერა

კარგი მართველობის მთელ რიგ რეფორმებზე მაღალი ხარისხის კვლევებისა და პოლიტიკის დოკუმენტების სიმცირის გათვალისწინებით, პროექტი მიზნად ისახავს ახალგაზრდების, სტუდენტებისა და ახალგაზრდა პროფესიონალების გაძლიერებას, რათა მათ პოლიტიკის შემუშავების პროცესში წვლილი შეიტანონ. ამისათვის პროექტი ითვალისწინებს მონაწილეების შესაძლებლობების განვითარებას, პრაქტიკული გამოცდილების/საუკეთესო პრაქტიკების გაზიარებას და მათთვის ფართო შესაძლებლობების მიცემას, რათა მტკიცებულებებზე დაფუძნებული ანალიზისა და რეკომენდაციების მომზადება და კომუნიკაცია შეძლონ. ეს საერთო მიზანი მიიღწევა შემდეგნაირად: 

• სტუდენტებისა და ახალგაზრდა პროფესიონალების თეორიული და პრაქტიკული ცოდნისა და გამოცდილების გაზრდით კარგი მმართველობის, მათ შორის კორუფციასთან ბრძოლის საკითხებზე;

• მენტორობისა და შესაძლებლობების განვითარების გზით ახალგაზრდა პროფესიონალების მიერ შექმნილი მტკიცებულებებზე დაფუძნებული პოლიტიკის ანალიზის ხელმისაწვდომობის ხელშეწყობით;

• მთავრობის ზედამხედველობისა და კარგი მმართველობის მნიშვნელოვანი რეფორმების შესახებ მტკიცებულებებზე დაფუძნებული დისკუსიების წახალისებით ყველა შესაბამისი დაინტერესებული მხარის მონაწილეობით;

პროექტის ფარგლებში IDFI გააფართოვებს არსებულ ოთხ აკადემიურ მოდულს/კურსს კორუფციისა და კარგი მმართველობის საკითხების ფართო სპექტრზე, რომლებიც ინტეგრირებულია ილიას სახელმწიფო უნივერსიტეტის აკადემიურ პროგრამაში. ეს გაფართოება უზრუნველყოფს დამატებით შესაძლებლობებს (სამუშაო შეხვედრები, ტრენინგები, მენტორთან შეხვედრები, საზაფხულო სკოლა მმართველობის სხვადასხვა საკითხებზე, კვლევის მეთოდებზე, მონაცემთა ანალიზის, მონაცემთა ვიზუალიზაციის შესახებ და ა.შ.) ბაკალავრიატის და მაგისტრატურის სტუდენტებისთვის, ასევე ამ კურსების კურსდამთავრებულთათვის, სხვა უნივერსიტეტების სტუდენტებისთვის, ახალგაზრდა პროფესიონალებისა და საჯარო მოხელეებისთვის, რათა მათ გააძლიერონ თავიანთი ანალიტიკური უნარები. მათ ასევე შეეძლებათ, კონკურსების, სტიპენდიებისა და მენტორების მეშვეობით, შექმნან მტკიცებულებებზე დაფუძნებული პოლიტიკის დოკუმენტები და რეკომენდაციები სხვადასხვა საჯარო პოლიტიკის საკითხებზე და მოახდინონ მათი კომუნიკაცია ყველა შესაბამის დაინტერესებულ მხარესთან სოციალური მედიის კამპანიებისა და მიზნობრივ აუდიტორიასთან დაკავშირების გზით. 

საჯარო დაწესებულებების წარმომადგენლებისთვის შეიქმნება მტკიცებულებებზე დაფუძნებული ანალიტიკური და პოლიტიკის დოკუმენტები, რომლებსაც მოამზადებენ ახალგაზრდა პროფესიონალები კარგი მმართველობის სხვადასხვა საკითხზე. ეს ნაშრომები შეიძლება გახდეს მიმდინარე რეფორმების ღირებული გარე ანალიზი და შეფასება, რომელიც ხაზს გაუსვამს მნიშვნელოვან მიღწევებს, გამოავლენს ცალკეულ ხარვეზებს და შესთავაზებს ამ ხარვეზების აღმოსაფხვრელად კონკრეტულ პოლიტიკის რეკომენდაციებს. გარდა ამისა, პროექტი მოიცავს კარგი მმართველობის კონკრეტულ რეფორმებზე დისკუსიასა და გამოცდილების გაცვლის შესაძლებლობებს ახალგაზრდა პროფესიონალებსა და სხვა დაინტერესებულ მხარეებს შორის.

პროექტის აქტივობები მოიცავს:

• 2024 წლის გაზაფხულის სემესტრის კურსების კოორდინაცია და 2024 წლის შემოდგომის სემესტრის ახალი სტუდენტების მიღება/კოორდინაცია და დამატებითი შესაძლებლობების უზრუნველყოფა (I-XII თვე)

• არსებული ანტიკორუფციული პორტალის განახლება (I-V თვე)

• მტკიცებულებებზე დაფუძნებული ანალიტიკური/პოლიტიკის ნაშრომების კონკურსი (IV-X თვე)

• კონკურსში მონაწილეობისთვის სტუდენტების წახალისების მიზნით დაახლოებით 6 ლექციის/სამუშაო შეხვედრის ჩატარება პარტნიორ უნივერსიტეტებთან თანამშრომლობით (IV-X თვე)

• ონლაინ ტრენინგები, ასევე მენტორთან ინდივიდუალური შეხვედრები კვლევის მეთოდებზე, მონაცემთა შეგროვებაზე, მონაცემთა ანალიზზე, მონაცემთა ვიზუალიზაციაზე, პოლიტიკის ანალიზსა და პოლიტიკის დოკუმენტების დიზაინზე (IV-X თვე).

• პრეზენტაცია საჯარო-კერძო დიალოგის ფორმატში (X-XI თვე)

• ანაზღაურებადი სტაჟირება/სტიპენდიები IDFI-ში ან წამყვან ანალიტიკურ ცენტრებში შერჩეული სტუდენტებისთვის/ ახალგაზრდა პროფესიონალებისთვის

• საზოგადიებისთვის ანალიტიკური ნაშრომების შედეგების გაცნობის აქტივობები (VIII-XII თვე)

• ზამთრის სკოლა კარგი მმართველობის შესახებ (XI-XII თვე)

კონტრაქტი

პროექტის სახელწოდება:  სასამართლო რეფორმების შესახებ საზოგადოების ინფორმირებისა და ჩართულობის ხელშეწყობა და მართლმსაჯულებაზე ხელმისაწვდომობის გაზრდის მრავალმხრივი ქმედებით ფასილიტაცია

დონორი: ევროკავშირი (ევროკომისია, ევროკავშირის წარმომადგენლობა საქართველოში)

პარტნიორი ორგანიზაციები: საქართველოს ახალგაზრდა იურისტთა ასოციაცია, სოციალური სამართლიანობის ცენტრი, სტუდია მონიტორი

პროექტის ხანგრძლივობა: 01.01.2024 – 31.12.2026

გრანტის სრული ოდენობა: 967,343.37 ევრო

IDFI-ს მიერ მიღებული თანხა: 124,255 ევრო

პროექტის მიზანი: სასამართლო სისტემის ხელმისაწვდომობის, დამოუკიდებლობის, გამჭვირვალობის, მიუკერძოებლობისა და ანგარიშვალდებულების ხელშეწყობა, მათ შორის, სასამართლო რეფორმების ჩათვლით.

IDFI-ს აქტივობები: სასამართლოს დასაბუთებულ გადაწყვეტილებებზე ხელმისაწვდომობის გასაუმჯობესებლად, IDFI განახორციელებს შემდეგ აქტივობებს:

 - შეიმუშავებს მონიტორინგის ყოველწლიურ ანგარიშებს, საერთო სასამართლოებისა და საკონსტიტუციო სასამართლოს გადაწყვეტილებების ხელმისაწვდომობის თაობაზე. გადაწყვეტილებების ხელმისაწვდომობის შესაფასებლად შემუშავდება მეთოდოლოგია - საქართველოს მართლმსაჯულების გამჭვირვალობის ინდექსი;

- მოამზადებს შედარებით ანალიზს დასაბუთებული გადაწყვეტილებების პროაქტიული ხელმისაწვდომობის შესახებ. კერძოდ, მომზადდება კვლევები, რომლებიც მოიცავს  სასამართლოს გადაწყვეტილებების ხელმისაწვდომობის შესახებ სხვა ქვეყნების პრაქტიკას, სამართლებრივ აქტებსა და საერთაშორისო ორგანიზაციების რეკომენდაციებს, დირექტივებსა და სტანდარტებს;

- განახორციელებს სასამართლო აქტების ხელმისაწვდომობის შესახებ საქართველოს საკონსტიტუციო სასამართლოს გადაწყვეტილების პრაქტიკაში აღსრულების მონიტორინგს და მოამზადებს ანგარიშს. IDFI გამოავლენს არსებულ სამართლებრივ და პრაქტიკულ გამოწვევებს და შეიმუშავებს რეკომენდაციებს სასამართლოების დასაბუთებულ გადაწყვეტილებებზე ხელმისაწვდომობის გასაუმჯობესებლად;

- დაიწყებს სტრატეგიულ სამართალწარმოებას იმ ბარიერების დასაძლევად, რომლებიც ამჟამად აფერხებს საზოგადოების ხელმისაწვდომობას სასამართლო აქტებზე.

2024-2026 წლების IDFI-ს წილი ბიუჯეტი, რომელიც ასევე ითვალისწინებს IDFI-ს კონტრიბუციას:

ხელშეკრულება

პროექტის სახელწოდება: საჯარო ინფორმაციაზე მედიის ხელმისაწვდომობის გაზრდა საქართველოში

დონორი:  ნიდერლანდების სამეფოს საელჩო საქართველოში

პროექტი ნომერი: 4000006932                                                   

პროექტის ხანგრძლივობა: 1 სექტემბერი 2023 – 30 ნოემბერი, 2024

გრანტის ოდენობა: 213,161 ლარი

პროექტის აღწერა

პროექტის მიზანია მტკიცებულებებზე დაფუძნებული ჟურნალისტიკის გაძლიერება და მხარდაჭერა, განსაკუთრებით წინასაარჩევნო პერიოდში, ასევე, ბრძოლა საჯარო ინფორმაციის ხელმისაწვდომობის სისტემურ სამართლებრივ და პრაქტიკულ გამოწვევებთან. პროექტის ამოცანაა ჟურნალისტებისთვის საჯარო ინფორმაციაზე ხელმისაწვდომობის გაზრდა და საჯარო ინფორმაციის ხელმისაწვდომობის სისტემური სამართლებრივი დაბრკოლებების შემცირება. დასახელებული მიზნების მისაღწევად პროექტის გუნდი ჟურნალისტებს სრულ იურიდიულ და პროფესიულ დახმარებას გაუწევს. გარდა ამისა, პროექტის გუნდი დაეხმარება მათ საჯარო ინფორმაციის მოთხოვნის უნარის გაუმჯობესებაში.

პროექტის მთავარი მიზნები

ა) მტკიცებულებებზე დაფუძნებული ჟურნალისტიკის მხარდაჭერა საჯარო ინფორმაციაზე ჟურნალისტების ხელმისაწვდომობის გაზრდით;

ბ) საქართველოში საჯარო ინფორმაციის ხელმისაწვდომობის სისტემურ გამოწვევებთან გამკლავება.

ბიუჯეტი

პროექტის აქტივობები

ხელშეკრულება 

პროექტის სახელწოდება: კონფერენციის, „სიმართლის გამოვლენა: დიდი ტერორის მასობრივი სამარხები (1937-1938) საქართველოში, ქ. ბათუმში“ ორგანიზება და აჭარაში დიდი ტერორის მსხვერპლთა შესახებ წიგნის ერთობლივი გამოცემა

დონორი ორგანიზაცია: იულიუშ მიეროშევსკის დიალოგის ცენტრი, პოლონეთი

საერთო ბიუჯეტი: 42,200.00 EUR

ხანგრძლივობა: 10.07.2023 - 31.05.2025

პროექტის მიზანი:

პროექტი მიზნად ისახავს საბჭოთა წარსულის გააზრებასა და შესწავლას. საქართველოსა და კაცობრიობის წინააღმდეგ მიმართული დანაშაულების სწორად გააზრებისთვის და ფართო საზოგადოებისთვის აქტიურად გაცნობისთვის ისევე როგორც საქართველოში, ასევე მის ფარგლებს გარეთ.

დღესდღეობით კრემლის მიერ ისტორიული ნარატივებით მანიპულაცია, ძირითადად, მიმართულია უკრაინის, პოლონეთისა და აღმოსავლეთ ევროპის მიმართ და ემსახურება უკრაინაში წამოწყებულ ფართომასშტაბიან ომს. თუმცა, პერიოდულად აღნიშნულის სამიზნე ცენტრალური აზიის ქვეყნები, საქართველო და სომხეთიც ხდებიან. კრემლის მიზნებში ისტორიის რევიზიონიზმს მნიშვნელოვანი ადგილი უჭირავს და იმაზე ბევრად მავნებლურ შინაარსს ატარებს, ვიდრე ეს ერთი შეხედვით ჩანს. პირველ რიგში, ისტორიული რევიზიონიზმი კრემლის გეოპოლიტიკურ ინტერესების - აგრესიული საგარეო პოლიტიკისა და პოპულისტური ნაციონალიზმის კატალიზატორია. სხვადასხვა ისტორიულ მონაკვეთში რუსეთის დანაშაულების მინიმიზება, დამსახურების გაზვიადება და ფაქტობრივი მოცემულობების უტიფრად გაყალბება სხვას არაფერს ემსახურება, თუ არა, როგორც ქვეყნის შიგნით, ისე საერთაშორისო ასპარეზზე ადამიანების შეცდომაში შეყვანას. 

პროექტის მიზანია საბჭოთა წარსულის გააზრება აჭარაში აღმოჩენილი, 1937-1938 წლების რეპრესიების მსხვერპლთა პირველი მასობრივი სამარხების პერსპექტივიდან. ამისათვის, დაიგეგმება კონფერენცია საკითხზე მომუშავე წამყვანი მეცნიერების ჩართულობით, რათა აზრთა მიმოცვლის შედეგად ჩამოყალიბდეს ის ნაბიჯები, რომლებიც შემდგომში უნდა გადაიდგას სამარხების შესწავლის და  საზოგადოების ცნობიერების ამაღლების კუთხით. ასევე საქართველოში პირველი “ხსოვნის წიგნის” გამოცემა, სადაც გარდა სამეცნიერო სტატიებისა, შევა აჭარაში რეპრესირებული ყველა ადამიანის მოკლე ბიოგრაფიული მონაცემები.

დაგეგმილი აქტივობები:

- 2023 წლის ოქტომბერში აჭარაში აღმოჩენილი პირველი მასობრივი სამარხების შესახებ საერთაშორისო კონფერენციის ორგანიზება;

-  აჭარაში განხორციელებული პოლიტიკური რეპრესიების მსხვერპლთა შესახებ წიგნის მომზადება და გამოცემა ქართულ ენაზე 300 ეგზემპლარად. წიგნი შედგენილი იქნება სამეცნიერო სტატიებისა და პოლიტიკური რეპრესიების მსხვერპლთა ბიოგრაფიებისგან;

-  წიგნის პრეზენტაცია და ღია ლექციების გამართვა უმაღლეს სასწავლებლებში, სკოლებში, ბიბლიოთეკებსა და სხვა დაწესებულებებში.

საწყისი ბიუჯეტი და აქტივობები

ცვლილება ხელშეკრულებაში - 06.03.2024

ცვლილება ხელშეკრულებაში - 31.05.2024

მიმდინარე აქტივობები და ბიუჯეტი

ხელშეკრულება

პროექტის სახელწოდება: ორგანიზაციული მხარდაჭერა
დონორი ორგანიზაცია: შვედეთის საერთაშორისო განვითარების თანამშრომლობის სააგენტო (Sida)
პროექტის ნომერი: No. 16488
ბიუჯეტი: SEK 16, 500, 000  (შვედურიკრონა)
ხანგრძლივობა: 1 ივლისი 2023 – 30 ივნისი 2026

ძირითადი მიზნები

პროექტის მიზანია სახელმწიფოს ევროატლანტიკური ინტეგრაციის ხელშეწყობა, კორუფციასთან ბრძოლა, საჯარო დაწესებულებების გამჭვირვალობისა და ანგარიშვალდებულების გაუმჯობესება, გადაწყვეტილების მიღების პროცესში მოქალაქეთა ჩართულობის გაზრდა, დემოკრატიული ინსტიტუტების დამოუკიდებლობისა და მიუკერძოებლობის ხელშეწყობა, კანონის უზენაესობის მაღალი სტანდარტების დამკვიდრება,   ინკლუზიური ეკონომიკური პოლიტიკის მხარდაჭერა, დემოკრატიული დეცენტრალიზაციისა და დემოკრატიული ტრანზიციის პროცესების ხელშეწყობა, საბჭოთა წარსულის შესწავლა, ანალიზი და დეზინფორმაციის წინააღმდეგ ბრძოლა, მედიისა და ადამიანის უფლებების დაცვა და გადაუჭრელი პრობლემების მოგვარების მიზნით ინოვაციების ხელშეწყობა.

პროექტის აღწერა

ბოლო ათწლეულების განმავლობაში საქართველომ მიაღწია საერთო პროგრესს დემოკრატიული ინსტიტუტების მშენებლობის, კარგი მმართველობის, გამჭვირვალობისა და ანგარიშვალდებულების პრინციპების შემუშავების, ასევე, მმართველობის ეფექტურობისა და სამართლიანობის გაუმჯობესების თვალსაზრისით. თუმცა, ეს პროცესები საგრძნობლად შენელდა არაერთი მიზეზის გამო. ქვეყანა ამჟამად დგას ისეთი სერიოზული გამოწვევების წინაშე, როგორიცაა არაფორმალური მმართველობა, ძალაუფლების არათანაბარი კონცენტრაცია, სასამართლოს დამოუკიდებლობის ნაკლებობა, მაღალი დონის კორუფცია და მნიშვნელოვანი რეფორმების გაგრძელების პოლიტიკური ნების არარსებობა. გარდა ამისა, რუსეთის ფედერაციის მხრიდან პოლიტიკური და ეკონომიკური ზეწოლა უარყოფით გავლენას ახდენს ქართულ დემოკრატიაზე. რუსეთის აგრესიამ უკრაინაში თავისი გავლენა იქონია როგორც რეგიონზე, ასევე საქართველოს პოლიტიკურ, ეკონომიკურ და საერთაშორისო ურთიერთობებზე.

დასახელებული გამოწვევები  ცხადყოფს აშკარა აუცილებლობას, რომ სამოქალაქო საზოგადოებამ თავისი კომპეტენციის ფარგლებში მხარი დაუჭიროს საქართველოს დემოკრატიულ და პროდასავლურ განვითარებას და საქართველოს ევროატლანტიკურ ინტეგრაციას, რათა სახელმწიფომ მაქსიმალურად გამოიყენოს შესაძლებლობების ფანჯარა. დემოკრატიული პროცესების გაუმჯობესების, კარგი მმართველობის პრინციპების ხელშეწყობისა და სტრუქტურული და საკანონმდებლო რეფორმების/ცვლილებების წარმატებით ადვოკატირების 14 წლიანი გამოცდილებით, IDFI აპირებს დაუპირისპირდეს საქართველოში დემოკრატიისა და კარგი მმართველობის წინაშე მდგარ გამოწვევებს მტკიცებულებებზე დაფუძნებული კვლევის, მონიტორინგისა და ადვოკატირების გზით. უფრო კონკრეტულად, ევროკავშირის მოთხოვნების შესრულების მიზნით IDFI იმუშავებს სხვადასხვა მიმართულებაზე, კორუფციასთან ბრძოლის ძირითადი მიზნების მიღწევაზე, საჯარო ინსტიტუტების გამჭვირვალობის ამაღლებაზე, გადაწყვეტილების მიღების პროცესში მოქალაქეთა ჩართულობის გაზრდაზე, კანონის უზენაესობის უმაღლესი სტანდარტების დამკვიდრებაზე, უფრო ინკლუზიური ეკონომიკური პოლიტიკის მხარდაჭერაზე, დემოკრატიული დეცენტრალიზაციისა და დემოკრატიული ტრანზიციის პროცესების ხელშეწყობაზე, მედიისა და ადამიანის უფლებების დაცვასა და პრობლემების გადასაჭრელად ინოვაციების ხელშეწყობაზე.

ამ მიზნების მისაღწევად IDFI იმუშავებს ყველა რელევანტურ საჯარო, კერძო და სამოქალაქო საზოგადოებრივ დაინტერესებულ მხარესთან. ორგანიზაცია ასევე აქტიურად გამოიყენებს სხვადასხვა ეროვნულ და საერთაშორისო ქსელებს და პლატფორმებს არჩეულ სფეროებში დადებითი ცვლილებების მიღწევის მიზნით. ბოლოს, განსაკუთრებული ყურადღება დაეთმობა მასშტაბური შედეგების მიღწევას ისეთ მნიშვნელოვან საკითხებზე მუშაობით, როგორიცაა განათლება, გენდერი და გარემოს დაცვა. ორგანიზაცია მნიშვნელოვან ყურადღებას გაამახვილებს მონიტორინგისა და საზოგადოებრივი ზედამხედველობის პროექტებზე, ასევე, კონსულტაციისა და შესაძლებლობების განვითარების პროექტებზე რეგიონში და გლობალურად.

ბიუჯეტი

ხელშეკრულება

პროექტის სახელწოდება: ხელისუფლების ანგარიშვალდებულებისთვის სამოქალაქო საზოგადოების გაძლიერება და გამჭვირვალობის სტანდარტების გაზრდა

დონორი ორგანიზაცია: ვიშეგრადის საერთაშორისო ფონდი და კორეის რესპუბლიკის საგარეო საქმეთა სამინისტრო

პროექტის ნომერი: 22310350

ბიუჯეტი: EUR 34,990

ხანგრძლივობა:  1 ივნისი, 2023 – 1 ივნისი, 2024

პარტნიორი ორგანიზაციები:  KohoVolit.eu (ჩეხეთის რესპუბლიკა და სლოვაკეთი), K-Monitor Public Benefit Association (უნგრეთი), Citizens Network Watchdog Poland (პოლონეთი)

აღწერა

კომპანიების ბენეფიციარ მესაკუთრეთა შესახებ ინფორმაციის ხელმისაწვდომობა მნიშვნელოვან როლს თამაშობს მაღალი დონის და საერთაშორისო კორუფციის წინააღმდეგ ბრძოლაში. უკრაინაში რუსეთის შეჭრის შემდეგ დაწესებულმა სანქციებმაც კიდევ ერთხელ აჩვენა საკითხის მნიშვნელობა. საქართველოს ჯერ კიდევ არ მიუღია ბენეფიციარ მესაკუთრეთა სტანდარტები, რის გამოც სადამკვირვებლო ჯგუფებისთვის რთულია ეფექტურად დაამონიტორინგონ საეჭვო კომპანიების საქმიანობა. მათ ამისთვის სხვადასხვა უწყებისგან უნდა მოითხოვონ ინფორმაცია და სხვადასხვა პლატფორმებიდან შეაგროვონ მონაცემები. გარდა ამისა, აქვთ შესაბამისი მონაცემების შეგროვების გამოცდილების ნაკლებობა. რაც შეეხება ვიშეგრადის ქვეყნებს, როგორც წინა რეგიონულმა ანალიზმა აჩვენა, მართალია მათ მიღებული აქვთ ფულის გათეთრების წინააღმდეგ არსებული სტანდარტები, საერთაშორისო სტანდარტები სრულყოფილად მაინც არ არის დანერგილი. გარდა ამისა, ევროკავშირის მართლმსაჯულების სასამართლოს ბოლო გადაწყვეტილებამ კითხვის ნიშნის ქვეშ დააყენა ბენეფიციარ მესაკუთრეთა მონაცემების საჯარო ხელმისაწვდომობა. თუმცა, სასამართლომ დაადასტურა ამ მონაცემებზე ჟურნალისტებისა და სამოქალაქო საზოგადოების ხელმისაწვდომობის მნიშვნელობა, რაც ხაზს უსვამს ევროკავშირის ქვეყნებში შესაბამისი კანონმდებლობის არსებობისთვის ადვოკატირების საქმიანობის გაგრძელებისა და ადგილობრივი კონტექსტის გათვალისწინებული მიდგომების გამოყენებას. 

ამავდროულად, ხელისულების ანგარიშვალდებულების გასაზრდელად, მნიშვნელოვანია კომპანიების ბენეფიციარი მესაკუთრეების შესახებ მეტი მონაცემის ხელმისაწვდომობა, ხელისუფლების საქმიანობის მონიტორინგის წახალისება და ბენეფიციარი მესაკუთრეების სტანდარტების ადვოკატირება, რისთვისაც მნიშვნელოვანია ვიშეგრადის ქვეყნების გამოცდილებისა და ნასწავლი გაკვეთილების გათვალისწინება.

პროექტის მიზნები

IDFI, ვიშეგრადის ქვეყნებიდან პარტნიორ ორგანიზაციებთან ერთად, მიზნად ისახავს, ა) ადგილობრივი და რეგიონული ღონისძიებებით, გააგრძელოს ბენეფიციარი მესაკუთრეების სტანდარტების ადვოკატირება; ბ) გააძლიეროს საქართველოში მოქმედი სადამკვირვებლო ჯგუფები და ზოგადად საზოგადოება, კვლევის, შესაძლებლობების გაძლიერების, ხელისუფლების მონიტორინგისა და საჯარო მონაცემის უკეთესი ხელმისაწვდომობით; გ) შეაგროვოს საქართველოში ყველაზე გავლენიანი/დიდი კომპანიების ბენეფიციარი მესაკუთრეების მონაცემები და გამოაქვეყნოს ყოვლისმომცველი მონაცემთა ბაზა.

პროექტის ფარგლებში დაგეგმილი აქტივობები

- სამუშაო შეხვედრა ბენეფიციარ მესაკუთრეთა საკითხზე

- ხელისუფლების მონიტორინგის საკითხებზე ტრენინგი ჟურნალისტებისთვის/აქტივისტებისთვის/სამოქალაქო საზოგადოების წარმომადგენლებისთვის

- საქართველოსა და ვიშეგრადის ქვეყნებში ბენეფიციარი მესაკუთრეების გამჭვირვალობის საკითხზე ანალიტიკური ნაშრომების მომზადება

- რეგიონული/საერთაშორისო ჰიბრიდული კონფერენცია ბენეფიციარი მესაკთრეების გამჭვირვალობისა და ხელისუფლების ანგარიშვალდებულების საკთხებზე

- ახალი მონაცემთა ბაზების მომზადება, ბენეფიციარი მესაკუთრეების მეფინგი და DataLab.ge-ის განახლება ახალი მონაცემებით

- ხელისუფლების საქმიანობის მონიტორინგი და ანალიტიკური/საგამოძიებო სტატიების მომზადება

ხელშეკრულება

პროექტის სახელწოდება: სამხრეთ კავკასიის და ვიშეგრადის ქვეყნების საერთო მეხსიერება - ოკუპანტები თუ განმათავისუფლებლები? დემოკრატია თუ ტირანია?

დონორი ორგანიზაცია: ვიშეგრადის საერთაშორისო ფონდი

გრანტის ნომერი: 22230312

წამყვანი ორგანიზაცია: Post Bellum (ჩეხეთი)

საერთო ბიუჯეტი:49,954.00 EUR

IDFI-ის ნაწილი: 13,812.27EUR

ხანგრძლივობა: 01.04.2023 -  30.09.2024

პროექტის წამყვანი ორგანიზაცია და პარტნიორები:

Post Bellum 2001 წელს, ჟურნალისტებისა და ისტორიკოსების მიერ ჩეხეთში დაფუძნებული არასამთავრობო არაკომერციული ორგანიზაციაა, რომელიც დოკუმენტურად ასახავს მე-20 საუკუნის მნიშვნელოვანი ისტორიული მოვლენების მოწმეების მოგონებებს და ცდილობს ამ ამბების ფართო საზოგადოებაში გავრცელებას. ორგანიზაცია თვლის, რომ მოწმეებს უნდა ჰქონდეთ თავიანთი ამბების მოყოლის შესაძლებლობა და რომ ეს ისტორიები ყველასათვის ხელმისაწვდომი უნდა იყოს - სწორედ ამ ხედვით შეიქმნა Post Bellum.

Post Bellum–ის მთავარი პროექტია „ერების მეხსიერება“ (Memory of Nations), იმ ადამიანების მოგონებათა კრებული, ვინც  მე–20 საუკუნის ტოტალიტარული ეპოქა გამოიარა, ასევე ფოტოები, გაზეთები და სხვადასხვა ისტორიული ჩანაწერი. კრებული 12,000-მდე ისტორიისაგან შედგება და საზოგადოებისთვის ხელმისაწვდომია ონლაინ, მონაცემთა ბაზის საშუალებით.

პროექტის პარტნიორები:

- სლოვაკეთი - Post Bellum SK

- პოლონეთი - Krzyzova Foundation for Mutual Understanding in Europe

- უნგრეთი - Terra Recognita Foundation

- სომხეთი - „Hazarashen“ Armenian Center for Ethnological Studies

პროექტის მიზნები:

პროექტის მიზანია წარსულის მოწმეთა დოკუმენტირება სომხეთსა და საქართველოში, რომლებსაც შეუძლიათ გადმოსცენ საერთო კომუნისტურ წარსულთან დაკავშირებული ცხოვრებისეული ისტორიები. პროექტის მონაწილეები საქართველოდან და სომხეთიდან გაივლიან ტრენინგებს და დაესწრებიან ვორქშოფებს ზეპირი ისტორიების დოკუმენტირების მეთოდოლოგიის შესახებ.

პროექტის მთავარი მიზანია არა მხოლოდ მოწმეთა ცხოვრებისეული ისტორიების დოკუმენტირება, არამედ მათი რედაქტირება, გამოქვეყნება და საგანმანათლებლო მიზნებით  გამოყენებაცაა. პროექტი გამიზნული იქნება როგორც პლატფორმა, რომელიც აამაღლებს ახალგაზრდა თაობის ცოდნას ექსპერიმენტული სემინარების მეშვეობით.

პროექტის მთავარი პროდუქტი იქნება მოკლემეტრაჟიანი დოკუმენტური ფილმი, რომლშიც აისახება პროექტში მონაწილე ერების საერთო წარსული. პროექტი მიზნად ისახავს ცნობიერების ამაღლებას სხვადასხვა ერსა და ხალხს შორის, განსაკუთრებულ ხაზგასმით ისტორიის განმეორებითობასა და ადამიანების უნარზე - ვერაფერი ისწავლოს წარსულის შეცდომებიდან. პროექტი მიზნად ისახავს ღირებული გაკვეთილების ჩვენებას ახალი თაობებისთვის ექსპერიმენტული სემინარების საშუალებით, წაახალისებს მათ, რათა გაკვეთილები სწორად გაიაზრონ და გაითავისონ.

დაგეგმილი აქტივობები:

- გახსნითი შეხვედრის ორგანიზება თბილისში სლოვაკ, ჩეხ, უნგრელ, პოლონელ და სომეხ პარტნიორებთან ერთად - პროექტის პრინციპების განსაზღვრა და შემდგომი აქტივობების დაგეგმვა.

- ონლაინ ვორქშოფების სერია, რომლის მიზანია თვითმხილველთა მონათხრობის სწორად დოკუმენტირების გამოცდილების გაზიარება ქართველი და სომეხი ისტორიკოსებისა და დოკუმენტალისტებისთვის.

- საქართველოში 10-ზე მეტი თვითმხილველის ვიდეოს ჩაწერა, რომლებმაც გამოცადეს საბჭოთა „თავისუფლება“ და მოუწიათ რკინის ფარდის მიღმა ცხოვრება.

- თვითმხილველთა ვიდეოების დამუშავება და გამოქვეყნება 8 ენაზე: პროექტში ჩართული ქვეყნების ენებზე, ინგლისურად და რუსულად.

- დოკუმენტური ფილმის - „განთავისუფლებული და ოკუპირებული? თავისუფლება თუ ტირანია?“ - შექმნა ჩაწერილ ინტერვიუებზე დაყრდნობით.

- დოკუმენტური ფილმის პრემიერა და ჩვენება სამიზნე ჯგუფებისთვის (სკოლის მოსწავლეები, სტუდენტები და ა.შ.). დისკუსიების მოწყობა ფილმის ჩვენების პარალელურად.

ბიუჯეტი

ხელშეკრულება