დეზინფორმაციისა და მეხსიერების კვლევების მიმართულების მკვლევარმა, ნინო გოზალიშვილმა წარადგინა მოხსენება: “ დეზინფორმაცია და დემოკრატია: გამოწვევები გარდამავალი დემოკრატიის კონტექსტში” საქართველოს 3 უნივერსიტეტის სტუდენტებისთვის, ლოზანის უნივერსიტეტის მიერ ორგანიზებულ საზაფხულო სკოლაში: “ტერიტორიული გამოწვევები და შესაძლებლობები მულტიკულტურული დემოკრატიებისთვის”. 

საზაფხულო სკოლა ლოზანისა და ჟენევის უნივერსიტეტის წარმომადგენლების ორგანიზებით საქართველოს სამი უმაღლესი სასწავლებლის, ყველა საფეხურის სტუდენტებისთვის ტარდება. სკოლის ფარგლებში, ნინო გოზალიშვილის ლექცია და სიმულაციები მიეძღვნა დემოკრატიის საკითხებს თანამედროვე ინფორმაციული გარემოს კონტექსტში, ძირითად გამოწვევებზე თეორიულ მსჯელობასა და პრაქტიკული გამოსავლის ძიებას. მონაწილეებს შესაძლებლობა ჰქონდათ ჩართულიყვნენ სპეციალურად შექმნილ სიმულაციურ თამაშებში, რომლის ფარგლებშიც მათ არა მხოლოდ დეზინფორმაციული ნარატივების შექმნისა და გავრცელების ლოგიკაზე, არამედ მისი დემოკრატიაზე გავლენასა და გადაჭრის გზებზე იმსჯელეს. 

სკოლის მონაწილეები ასევე გაეცნენ IDFI-სა და საქართველოს უნივერსიტეტის ერთობლივ სასერტიფიკატო პროგრამას - “დეზინფორმაციისა და პროპაგანდის კვლევა” და გამოთქვეს ინტერესი, შეისწავლონ მსგავსი საკითხები აკადემიურ გარემოში. 

IDFI-ს დეზინფორმაციისა და მეხსიერების კვლევის მიმართულება არა მხოლოდ ანალიტიკურ და კვლევით საქმიანობაზე, არამედ საგანმანათლებლო მიმართულებით 2021 წლის შემოდგომიდან აქტიურად მუშაობს.