კოალიცია „მედიის ადვოკატრებისთვის“ კომპანია „TV3“-სა და „ენერჯი გრუპს“ „მაუწყებლობის შესახებ“ საქართველოს კანონის მოთხოვნათა უგულებელყოფასა და დარღვევაში ადანაშაულებს. კოალიციას მიაჩნია, რომ რადგანაც ორივე კომპანიის დირექტორი, კახა ბაინდურაშვილი იკავებს საქართველოს სავაჭრო-სამრეწველო პალატის პრეზიდენტის თანამდებობას, მას არ აქვს უფლება ჰქონდეს მაუწყებლობის ლიცენზია, ან ფლობდეს გარკვეულ წილს.

ცნობილია, რომ კახა ბაინდურაშვილი „TV3“-ის დირექტორი და მისი 9% წილის მესაკუთრეა. „ენერჯი გრუპის“ შემთხვევაში კი იგი 20%-ს ფლობს. კოალიცია ხაზს უსვამს იმ ფაქტორსაც, რომ შპს „TV3“-ის შესაბამისობის დეკლარაციაში, რომელსაც ხელს მისი დირექტორი, კახა ბაინდურაშვილი აწერს, დადასტურებულია, რომ ტელეკომპანია „TV3“-ის ბენეფიციური მესაკუთრე არ არის ადმინისტრაციული ორგანოს თანამდებობის პირი. მაშინ როცა, სავაჭრო-სამრეწველო პალატა, როგორც საჯარო სამართლის იურიდიული პირი, წარმოადგენს ადმინისტრაციულ ორგანოს. შესაბამისად, პალატის პრეზიდენტი, ამ შემთხვევაში, კახა ბაინდურაშვილი ადმინისტრაციული ორგანოს თანამდებობის პირად ითვლება. „მაუწყებლობის შესახებ“ საქართველოს კანონის მიხედვით კი ლიცენზიის მფლობელი/ავტორიზებული პირი ან მისი ბენეფიციარი მესაკუთრე არ შეიძლება იყოს ადმინისტრაციული ორგანოს თანამდებობის პირი.

„ზემოაღნიშნული წარმოადგენს კომპანიების „TV3“ და „ენერჯი გრუპი“ მხრიდან „მაუწყებლობის შესახებ“ საქართველოს კანონის მოთხოვნათა უგულებელყოფას და მედიის პოლიტიკური ზეგავლენისგან თავისუფლების უზრუნველყოფის მიზნით დადგენილი საკანონმდებლო პრინციპების უხეშ დარღვევას“ - ნათქვამია კოალიციის განცხადებაში.

კოალიცია „მედიის ადვოკატირებისთვის“ საქართველოს კომუნიკაციების ეროვნულ კომისიას რეაგირებისა და კანონით გათვალისწინებული ზომების მიღებისკენ მოუწოდებს, რათა აღმოიფხვრას აღნიშნული დარღვევები.

განცხადებას კოალიციის 11 წევრი ორგანიზაცია, მათ შორის ინფორმაციის თავისუფლების განვითარების ინსტიტუტი (IDFI), უერთდება.

კოალიციის „მედიის ადვაკატირებისთვის“ განცხადების სრულია ვერსია