2025 წლის 2 აპრილს დიდმა ბრიტანეთმა, ქართული მართლმსაჯულებით ვაჭრობისთვის, ლევან მურუსიძეს და მიხეილ ჩინჩალაძეს ფინანსური სანქციები დაუწესა. სანქცირება განხორციელდა აშშ-ს მიერ იგივე პირებისთვის  კორუფციაში სავარაუდო ჩართულობის გამო სავიზო შეზღუდვების დაწესებიდან ორი წლის თავზე.  

აქვე გვინდა შევახსენოთ საზოგადოებას, რომ 2024 წლის 12 იანვარს, ანტიკორუფციული ბიუროს მიერ შექმნილმა დამოუკიდებელმა კომისიამ დასამონიტორინგებლად 300-მდე თანამდებობის პირი შეარჩია. ამ კომისიის ერთ-ერთი წევრი იყო IDFI, ხოლო დეკლარაციების მონიტორინგი უნდა განეხორციელებინა ანტიკორუფციულ ბიუროს.

300 თანამდებობის პირიდან მხოლოდ ოთხმა დააყენა ეჭვქვეშ დამოუკიდებელი კომისიის მიერ მიღებული გადაწყვეტილების სისწორე და ოთხივე იყო მოსამართლე, მათ შორის, მიხეილ ჩინჩალაძე და ლევან მურუსიძე. მათ, სასამართლოს მეშვეობით გააჩერეს საკუთარი დეკლარაციების შემოწმება. ამ საქმეებზე სასამართლო სხდომები თბილისის საქალაქო სასამართლოში კვლავაც მიმდინარეობს და დამოუკიდებელი კომისიის წევრები მოწმის სტატუსით იკითხებიან. 

ამოუხსნელია, რატომ შეიძლება ჰქონოდა მოსამართლეს, რომელიც საკუთარ თავს კეთილსინდისიერად მიიჩნევს, წინააღმდეგობა მის დეკლარაციაში შეტანილი ინფორმაციის ანტიკორუფციული ბიუროს მიერ შემოწმების მიმართ. განსაკუთრებით იმ ფონზე, რომ ანტიკორუფციულ ბიუროს გამოძიების ფუნქცია არ გააჩნია, აღნიშნული მექანიზმის ეფექტიანობა კი უკიდურესად შეზღუდულია. 

ნიშანდობლივია, რომ მოსამართლეთა კეთილსინდისიერების შემოწმება ევროკავშირის ერთ-ერთი აღუსრულებელი რეკომენდაციაა, რომლის შესრულების კრიტიკული საჭიროება საზოგადოებამ ნათლად დაინახა ძალადობის, წამებისა და არაადამიანური მოპყრობის მსხვერპლი ადამიანების, ისევე როგორც მანიფესტაციების მონაწილეთა წინააღმდეგ მიმდინარე სხვა რეპრესიული სისხლისა და ადმინისტრაციული საქმების განხილვისას.