2022 წლის 17 დეკემბერს, მე-4 საერთაშორისო კონფერენციის - „არქივების ღიაობის მნიშვნელობა საბჭოთა წარსულის გადაფასებასა და პროპაგანდისთვის წინააღმდეგობის გაწევაში“ ფარგლებში, ინფორმაციის თავისუფლების განვითარების ინსტიტუტმა (IDFI) გორსა და კასპში გასვლითი შეხვედრები გამართა.
შეხვედრებს ესწრებოდნენ კონფერენციის მომხსენებლები, სტუდენტები, შსს არქივისა და სხვადასხვა ორგანიზაციის წარმომადგენლები, რომლებმაც ქალაქ გორში, IDFI-ის წარმომადგენლებთან ერთად, აფხაზეთსა და სამაჩაბლოში სამშობლოსათვის დაღუპულ რაინდთა მემორიალი, საბრძოლო დიდების მუზეუმი, ერისთავის თეატრი და ქუჩის მხატვრობის ნიმუშები დაათვალიერეს. მათ, ადგილობრივ სტუდენტებთან ერთად, საშუალება ჰქონდათ, გასცნობოდნენ პროექტის "გორის ალტერნატიული იდენტობის" ფარგლებში განხორციელებულ აქტივობებსა და შექმნილ მასალებს. აღნიშნულის გათვალისწინებით, ისინი ჩაერთვნენ შესაბამის ტურში "გორის ალტერნატიული იდენტობა".
მოგვიანებით, კასპის სკოლა-გიმნაზიაში არსებულ ოკუპაციის მუზეუმში, რომელიც საბჭოთა კავშირის დროინდელ პოლიციის ყოფილ შენობაშია განთავსებული, 2022 წლის ნობელის მშვიდობის პრემიის ლაურეატი ისტორიულ-საგანმანათლებლო და უფლებადამცველი ორგანიზაციის, “საერთაშორისო მემორიალის”, თავმჯდომარემ, იან რაჩინსკიმ ღია ლექცია ჩაატარა, რომლის ფარგლებშიც ისაუბრა რეპრესიების მიმდინარეობაზე, მასშტაბებსა და სტატისტიკის შედგენის მახასიათებლებზე. მან განიხილა რეპრესიების დინამიკა 1921 წლიდან დიდ ტერორამდე - 1937-1938 წლამდე, დიდი ტერორის დროს და დიდი ტერორიდან 1953 წლამდე.
აღსანიშნავია, რომ კასპის სკოლა-გიმნაზიის შენობის სარდაფში საბჭოთა კავშირის პერიოდში მოწყობილი იყო წინასწარი დაკავების იზოლატორი, სადაც სკოლის ძალისხმევით დაარსდა კასპის საბჭოთა ოკუპაციის მუზეუმი.
მუზეუმში ორი საგამოფენო დარბაზია მოწყობილი - ბანერებზე განთავსებული ინფორმაცია გვიყვება ბოლშევიკური რეჟიმის დამყარებიდან 2008 წლის აგვისტოს ომის ჩათვლით ისტორიებს რეპრესიებსა და გამოვლილ ომებზე, რომელსაც უამრავი ადამიანის სიცოცხლე შეეწირა.
ღია ლექციის ბოლოს, დამსწრე საზოგადოებას საშუალება ჰქონდა, სალექციო თემის ირგვლივ, საკუთარი მოსაზრებები დაეფიქსირებინა და კითხვა-პასუხის რეჟიმში წარემართა დისკუსია.
ღია ლექცია გაიმართა შვედეთის საერთაშორისო განვითარების თანამშრომლობის სააგენტოს (Sida) ფინანსური მხარდაჭერით.
სიახლეების გამოწერა
