ამერიკის შეერთებული შტატების სახელმწიფო დეპარტამენტმა ადამიანის უფლებათა ყოველწლიური ანგარიში გამოაქვეყნა.
2012 წლის მოხსენებაში საქართველოს შესახებ პატიმართა უფლებების დარღვევის, მიკერძოებულ სასამართლოსა და იძულებით გადაადგილებულ პირთა პრობლემებთან ერთად, ყურადღება გამახვილებულია კორუფციის შემთხვევებსა და მთავრობის საქმიანობაში გამჭვირვალობის ნაკლებობაზე. ანგარიში მოხვდა ქუთაისში პარლამენტის მშნებლობის საკითხი. აშშის სახელმწიფო დეპარტამენტი IDFI -ს მონაცემებზე დაყრდნობით აღნიშნავს, რომ, პარლამენტის მშენებლობაზე გაწეულმა ხარჯმა 196 მილიონი დოლარი შეადგინა, რაც გაცილებით აღემატება ოფიციალურად დასახელებული თანხის ოდენობას.
ანგარიშში ხაზგასმულია საქართველოში ინფორმაციის ხელმისაწვდომობასთან დაკავშირებით არსებული პრობლემები. ნათქვამია, რომ მიუხედავად საქართველოს კანონმდებლობით გათვალისწინებული ვალდებულებისა, სახელმწიფო დაწესებულებები ყოველთვის არ უზრუნველყოფდნენ საჯარო დოკუმენტების ღიაობასა და ინფორმაციის ხელმისაწვდომობას.
ადამიანის უფლებათა ანგარიშში IDFI-ს მიერ 2011-2012 წლებში საჯარო დაწესებულებებიდან ინფორმაციის მოთხოვნებზე მიღებული პასუხების სტატისტიკაა მოყვანილი.
ინფორმაციის თავისუფლების განვითარების ინსტიტუტი პროექტის - „საჯარო ინფორმაციის მონაცემთა ბაზა“ - ფარგლებში რეგულარულად ითხოვს საჯარო ინფორმაციას სახელმწიფო დაწესებულებებიდან. პროექტი ფონდ ღია საზოგადოება საქართველოს მხარდაჭერით ხორციელდება.
„საჯარო დაწესებულებებმა საჯარო ინფორმაციის მოთხოვნების მხოლოდ 53 პროცენტს გასცეს სრულყოფილი პასუხი. „იგნორირებული შეკითხვებისა და არასრულყოფილი პასუხების რაოდენობამ 47 პროცენტი შეადგინა. ინსტიტუტის მოთხოვნები უპასუხოდ დატოვეს საქართველოს შინაგან საქმეთა და თვდაცვის, ასევე სასჯელაღსრულების პრობაციისა და იურიდიული დახმარების საკითხთა და ოკუპირებული ტერიტორიებიდან იძულებით გადაადგილებულ პირთა განსახლებისა და ლტოლვილთა სამინისტროებმა“ - ვკითხულობთ აშშ-ის სახელმწიფო დეპარტამენტის მიერ გამოქვეყნებულ დოკუმენტში.
სიახლეების გამოწერა
