ღია და გამჭვირვალე მმართველობის საპარლამენტო საბჭოს გასვლითი შეხვედრა

სიახლეები | პუბლიკაციები | ღია მმართველობა | სტატია 30 იანვარი 2017

ავტორი: ნატალია ვარაზი

 

2017 წლის 18 იანვარს, სასტუმრო „ქრაუნ პლაზა ბორჯომში“ გაიმართა ღია და გამჭვირვალე მმართველობის მუდმივმოქმედი საპარლამენტო საბჭოს და საბჭოსთან არსებული საკონსულტაციო ჯგუფი გასვლითი შეხვედრა, რომელზეც განხილულ იქნა საპარლამენტო ღიაობის საკითხები და სამომავლო ნაბიჯები.

 

შეხვედრას ესწრებოდნენ ღია და გამჭვირვალე მმართველობის მუდმივმოქმედი საპარლამენტო საბჭოს ახლადარჩეული წევრები, სამოქალაქო საზოგადოებისა და საერთაშორისო ორგანიზაციების წარმომადგენლები.

 

საბჭოს და საკონსულტაციო ჯგუფის შეხვედრა გახსნეს საქართველოს პარლამენტის თავმჯდომარის პირველმა მოადგილემ თამარ ჩუგოშვილმა, საბჭოს ახალმა თავჯდომარემ ირინა ფრუიძემ, გაეროს განვითარების პროგრამის (UNDP) დემოკრატიული მმართველობის ჯგუფის ხელმძღვანელმა გრიგოლ ბრეგაძემ და ინფორმაციის თავისუფლების განვითარების ინსტიტუტის (IDFI) დირექტორმა, საკონსულტაციო ჯგუფის თავმჯდომარემ გიორგი კლდიაშვილმა.

 

შეხვედრაზე განიხილეს საქართველოს პარლამენტის რეგლამენტში შესატანი ცვლილებების პროექტი, ასევე ნორმატიული აქტების შესახებ კანონში შესატანი ცვლილებებისა და საქართველოს პარლამენტის წევრების ეთიკის კოდექსის პროექტები,რომლებიც წინა მოწვევის საბჭომ დაამტკიცა. ამასთან, განხილულ იქნა ღია მმართველობის პარტნიორობის პარიზის გლობალური სამიტის შედეგები და საქართველოს ღია პარლამენტის ახალი გეგმის (2017-2018) პერსპექტივები.

 

საქართველოს ღია პარლამენტის 2017-2018 წლების ახალი სამოქმედო გეგმასთან დაკავშირებით, მხარეები შეთანხმდნენ, 2017 წლის 15 თებერვლამდე წარმოადგინონ ახალ სამოქმედო გეგმაში შესატანი ვალდებულებები, ხოლო 2017 წლის მარტში, საპარლამენტო ღიაობის სამოქმედო გეგმის შემუშავების მიზნით, გამართონ კიდევ ერთი გაფართოებული შეხვედრა.

 

შეხვედრაზე შეკრებილებმა ასევე გადაწყვიტეს სამოქალაქო საზოგადოებიდან და პარლამენტის წევრებისგან დაკომპლექტებული სამი სამუშაო ჯგუფის შექმნა, რომლებიც იმუშავებენ 2015-2016 წლების სამოქმედო გეგმის ვალდებულებების დასრულებაზე.

 

შეხვედრაზე შეკრებილებმა განიხილეს საქართველოს პარლამენტის ვებგვერდზე განთავსებულ კანონპროექტებზე კომენტარის დატოვების ფუნქციის დანერგვა, რაც 2015-2016 წლების სამოქმედო გეგმით განსაზღვრული ვალდებულება იყო.

 

ამასთან, ინფორმაციის თავისუფლების განვითარების ინსტიტუტის (IDFI) პროგრამების დირექტორმა, ლევან ავალიშვილმა, ხაზი გაუსვა კომენტარის დატოვების ფუნქციის გაფართოების აუცილებლობას. მხარეები შეთანხმდნენ, რომ ღია პარლამენტის ახალ სამოქმედო გეგმაში შესაძლებელია გაიწეროს პარლამენტის ვებგვერდზე განთავსებულ კანონპროექტებზე დატოვებული კომენტარების საფუძველზე დასკვნების შემუშავების ვალდებულება, რაც საგრძნობლად გაზრდის მოსახლეობის ჩართულობას კანონშემოქმედებით პროცესში.

 

გარდა ამისა, საქართველოს ახალგაზრდა იურისტთა ასოციაციის, საერთაშორისო გამჭვირვალობა - საქართველოს და ინფორმაციის თავისუფლების განვითარების ინსტიტუტის (IDFI) წარმომადგენლებმა კიდევ ერთხელ დააყენეს პარლამენტის ვებგვერდზე დოკუმენტაციის ადვილად დამუშავებად ფორმატში (Open Data) ატვირთვის აუცილებლობა.  

 

გასვლითი შეხვედრის ფარგლებში საერთაშორისო გამჭვირვალობა - საქართველოს წარმომადგენლების მიერ წარმოდგენილ იქნა საქართველოს ღია პარლამენტის 2015-2016 წლების სამოქმედო გეგმის მონიტორინგის ანგარიში. მონიტორინგის ანგარიშის თანახმად, ვალდებულებების დაგვიანებით მიღება ან შეუსრულებლობა სამი ძირითადი მიზეზით იყო განპირობებული: ზოგიერთი ვალდებულების განხორციელების ზუსტი ინდიკატორების არარსებობა, ღია და გამჭვირვალე მუდმივმოქმედი საპარლამენტო საბჭოს წევრებსა და პარლამენტის სხვა წევრებს შორის კოორდინაციის პრობლემა და არსებითი რეფორმების განხორციელებაზე პოლიტიკური ნების არარსებობა. 

 

შეხვედრაზე შემოთავაზებულ ახალ იდეებს შორის იყო კანონპროექტში პირველიდან მესამე მოსმენამდე შესული ცვლილებების ვიზუალური ასახვა. ასევე, ინფორმაციის თავისუფლების განვითარების ინსტიტუტის (IDFI) შემოთავაზებული იდეა მობილური აპლიკაციის შესახებ, რომლის საშუალებითაც, პარლამენტის ვებგვერდზე ახალი კანონპროექტის ატვირთვის შემთხვევაში, მომხმარებელი მიიღებს შეტყობინებას განახლების თაობაზე.

 

შეხვედრაზე მხარეები აგრეთვე შეთანხმდნენ, რომ საქართველოს ღია პარლამენტის 2017-2018 წლების სამოქმედო გეგმა თანხვედრაში უნდა იყოს გაეროს მდგრადი განვითარების მიზნებთან (SDG). სამოქმედო გეგმის და მდგრადი განვითარების მიზნების თანხვედრაში მოყვანის საკითხი ინფორმაციის თავისუფლების განვითარების ინსტიტუტმა (IDFI) დააყენა.  

 

საქართველოს ღია პარლამენტის ახალი სამოქმედო გეგმის შემუშავება იგეგმება ევროკავშირისა და გაეროს განვითარების პროგრამის (UNDP) მიერ დაფინანსებული პროექტის „საპარლამენტო დემოკრატიის სისტემის გაძლიერება საქართველოში“ ფარგლებში, რომელსაც ინფორმაციის თავისუფლების განვითარების ინსტიტუტი (IDFI) ახორციელებს.

 

 

 

სხვა მასალები ამ თემაზე
სიახლეები

სამუშაო შეხვედრა სახელმწიფო ბიუჯეტის გენდერული ინდექსის შესამუშავებლად

06.02.2023

საქართველოს პირველი რესპუბლიკის დღეები საფრანგეთში

30.01.2023

საფრანგეთში აკაკი ჩხენკელის მემორიალური ალბომის პრეზენტაცია გაიმართა

26.01.2023

აკაკი ჩხენკელის მემორიალური ალბომის პრეზენტაცია

23.01.2023
განცხადებები

განცხადება მიხეილ სააკაშვილის სასამართლო პროცესთან დაკავშირებით

06.02.2023

მედიის ადვოკატირების კოალიცია სამართალდამცავ ორგანოებს მოუწოდებს, დროულად გამოიძიონ “ტელეკომპანია პირველის” ჟურნალისტის სახლში უკანონო შეღწევის ფაქტები

03.02.2023

მედიის ადვოკატირების კოალიცია მედიის წინააღმდეგ წარმოებულ დისკრედიტაციის კამპანიას ეხმიანება

31.01.2023

კოალიცია პარლამენტის მიერ იუსტიციის უმაღლესი საბჭოს წევრების შერჩევის პროცესს აფასებს

27.01.2023
ბლოგპოსტები

ანტიდასავლური პროპაგანდის საბჭოთა საწყისები

20.12.2022

რუსული დეზინფორმაციის ტაქტიკა 2008 წლის ხუთდღიანი ომის კონტექსტში

03.11.2022

ქაოტური მშენებლობები ბათუმში ახალ მასშტაბებს იძენს

18.10.2022

საჯარო ინფორმაციის ხელმისაწვდომობა და უფლება სამართლიან სასამართლოზე

11.07.2022