20-21 მაისს გაიმართა საქართველოს პარლამენტის ღია და გამჭვირვალე მმართველობის მუდმივმოქმედი საბჭოსა და მისი საკონსულტაციო ჯგუფის სამუშაო შეხვედრა, სადაც საქართველოს ღია პარლამენტის 2015-2016 წლების სამოქმედო გეგმის 4.4. ვალდებულებით გათვალისწინებულ საკითხზე, კერძოდ, საქართველოს პარლამენტის წევრთა ეთიკის კოდექსზე იმსჯელეს.

სამოქმედო გეგმის თანახმად, საპარლამენტო ეთიკის კოდექსი უნდა იქცეს ეფექტურ საბაზისო დოკუმენტად, რომელიც განსაზღვრავს პარლამენტის წევრების ქცევის ნორმებს. იგი მიუთითებს, რომ კოდექსი უნდა შეიცავდეს ნათელ და თანმიმდევრულ დებულებებს პარლამენტის წევრებისთვის მისაღები და მიუღებელი ქცევის, პირადი ინტერესების შესახებ ინფორმაციის გამჟღავნების, ქონებრივი დეკლარაციების წარდგენის, სახელმწიფო სახსრების გამოყენებისა და სახელმწიფო შეღავათებით სარგებლობის თაობაზე.

შეხვედრა ორგანიზებული იყო ეროვნულ დემოკრატიული ინსტიტუტის (NDI) მიერ, რომელიც არის საქართველოს პარლამენტის წევრთა ეთიკის კოდექსის შემუშავების ინიციატორი. შეხვედრაში მონაწილეობას იღებდნენ საქართველოს პარლამენტის წევრები, პარლამენტის აპარატისა და თავმჯდომარის კაბინეტის წარმომადგენლები და საბჭოსთან არსებული საკონსულტაციო ჯგუფის წევრი არასამთავრობო და საერთაშორისო ორგანიზაციების წარმომადგენლები. გამოცდილების გაზიარების მიზნით, საბჭოს მუშაობაში ასევე ჩართულნი იყვნენ აშშ-ის კონგრესის წარმომადგენელთა პალატის ეთიკის ოფისის (Office for Congressional Ethincs/OCE) დირექტორის მოადგილე პოლ სოლისი და ეუთოს დემოკრატიული ინსტიტუტებისა და ადამიანის უფლებათა ოფისის (OSCE/ODHIR) სპეციალური წარმომადგენელი პეტერ მოსოპი.

შეხვედრაზე მხარეებმა იმსჯელეს ეთიკის კოდექსის სამართლებრივ ფორმაზე და მისი მიღების წესსა და პროცედურაზე. სამუშაო ჯგუფმა იმსჯელა კოდექსის მიზანსა და არსზე, ძირითად პრინციპებზე და აღსრულების მექანიზმებზე. ეთიკის კოდექსის სამუშაო ვერსიის პუნქტობრივი განხილვისას გაზიარებული იყო აშშ-ისა და ეუთოს წარმომადგენლების პოზიციები და გამოცდილება.

შეხვედრაზე გამოთქმული მოსაზრებებისა და შენიშვნების გათვალისწინებით, ეთიკის კოდექსის შესწორებულ ვერსიას კიდევ ერთხელ განიხილავს ღია და გამჭვირვალე მმართველობის მუდმივმოქმედი საპარლამენტო საბჭო და საკონსულტაციო ჯგუფი, რის შემდეგაც დოკუმენტი საქართველოს პარლამენტს წარედგინება განსახილველად და დასამტკიცებლად.