როგორც საზოგადოებისთვის კარგადაა ცნობილი, 2015 წლის 15 იანვარს თბილისის საქალაქო სასამართლოს სისხლის სამართლის საქმეთა კოლეგიის მოსამართლემ, მერაბ ჯორბენაძემ, მიიღო გადაწყვეტილება გიორგი კლდიაშვილის მიმართ სისხლის სამართლებრივი დევნის შეწყვეტის შესახებ. აღნიშნული გადაწყვეტილება ეფუძნებოდა ორ ძირითად გარემოებას. კერძოდ, ერთი მხრივ, პროკურატურის მიერ წარდგენილი მასალები მოპოვებული იყო კანონის დარღვევით, შესაბამისად, საქმეში არ არსებობდა საკმარისი მტკიცებულებები ბრალეულობის დასადგენად, ხოლო მეორე მხრივ, გიორგის მიერ განხორციელებული ქმედება არ შეიცავდა სისხლისსამართლებრივი ქმედების ნიშნებს.

პროკურატურამ თბილისის საქალაქო სასამართლოს გადაწყვეტილება კანონით დადგენილი წესით, 22 იანვარს გაასაჩივრა თბილისის სააპელაციო სასამართლოს საგამოძიებო კოლეგიაში. სააპელაციო სასამართლომ, 23 იანვარის გადაწყვეტილებით, არ დააკმაყოფილა პროკურატურის სარჩელი, შესაბამისად, უცვლელად დატოვა პირველი ინსტანციის სასმართლოს გადაწყვეტილება სისხლისსამართლებრივი დევნის შეწყვეტის შესახებ.

– სააპელაციო სასამართლოს პოზიცია მტკიცებულებათა დაუშვებლად ცნობის თაობაზე – აღნიშნულ საკითხთან დაკავშირებით სააპელაციო სასამართლომ ხაზგასმით აღნიშნა, რომ წინასასამართლო სხდომის მოსამართლის განჩინება მტკიცებულებათა დაუშვებლობის თაობაზე არ ექვემდებარებოდა მის საგამოძიებო კოლეგიაში გასაჩივრებას.

– სააპელაციო სასამართლოს პოზიცია სისხლისსამართლებრივი დევნის შეწყვეტასთან დაკავშირებით – საგამოძიებო კოლეგიამ არც ამ ნაწილში გაიზიარა პროკურატურის პოზიცია. კერძოდ, სააპელაციო სასამართლომ დაადასტურა, რომ ბრალდების მხარის მიერ წარდგენილ და სასამართლოს განჩინებით საქმის არსებით განხილვაზე დაშვებულ მტკიცებულებათა ერთობლიობა იყო აშკარად არასაკმარისი. შესაბამისად, საქმეში არსებული მტკიცებულებები არ იძლეოდა საფუძველს ვარაუდისთვის, რომ გიორგი კლდიაშვილმა ჩაიდინა სისხლისსამართლებრივი დანაშაული.

IDFI მიესალმება თბილისის სააპელაციო სასამართლოს მიერ მიღებულ გადაწყვეტილებას და იმედოვნებს, რომ შესაბამისი პასუხისმგებლობა დაეკისრება ყველა იმ პირს, რომელთა ქმედებებმაც ხელყო გიორგი კლდიაშვილის კანონიერი უფლებები და თავისუფლებები, ისევე როგორც მათ, ვინც მონაწილეობდა მის მიმართ უკანონო მტკიცებულებების შექმნაში.

/public/upload/IDFI/11432015-01-27.pdf