გამომძიებლებისა და პროკურორებისთვის ჩატარდა ტრენინგი გენდერისა და სქესის ნიშნით დისკრიმინაციის შესახებ

სიახლეები | კანონის უზენაესობა | ტრენინგები | კარგი მმართველობა | პუბლიკაციები | სტატია 14 ნოემბერი 2018

საქართველოს პროკურატურის სხვადასხვა ტერიტორიული ორგანოების პროკურორებმა და გამომძიებლებმა გენდერისა და სქესის ნიშნით დისკრიმინაციის შესახებ ტრენინგში აქტიური მონაწილეობა მიიღეს. ტრენინგი ჩატარდა ინფორმაციის თავისუფლების განვითარების ინსტიტუტის (IDFI) ორგანიზებით ევროკავშირის ფინანსური მხარდაჭერით, და საქართველოს პროკურატურასთან მჭიდრო თანამშრომლობით. ტრენინგის თანადამფინანსებელია ღია საზოგადოების ფონდი


მონაწილეებს მისასალმებელი სიტყვით მიმართეს IDFI-ის პროგრამების დირექტორმა ლევან ავალიშვილმა, საქართველოს მთავარი პროკურატურის პროფესიული განვითარებისა და კარიერის მართვის ცენტრის უფროსმა სოფიო ჯიაძემ და პროექტის „პროკურატურის დამოუკიდებლობის ხელშეწყობა მონიტორინგისა და ჩართულობის გზით“ მენეჯერმა მარიამ თუთბერიძემ. ორდღიან ტრენინგს უძღვებოდნენ: ეკატერინე აღდგომელაშვილი – მრჩეველი გენდერის საკითხებში, ქალთა ინიციატივების მხარდამჭერი ჯგუფი (WISG) და ეკატერინე სხილაძე – საქართველოს სახალხო დამცველის მოადგილე.


ეკატერინე სხილაძის თქმით, საქართველოში თანასწორობის უფლების განხორციელების პროცესში ერთ-ერთ გამოწვევად გენდერული ნიშნით დისკრიმინაციის მასშტაბები რჩება: „სწორედ ამიტომ, განსაკუთრებული მნიშვნელობის მქონე იყო ეს ტრენინგი, რომლის ფარგლებში გენდერის ნიშნით დისკრიმინაციის, მათ შორის, სექსუალური შევიწროების, ფემიციდის საკითხებს განსაკუთრებული ყურადღება დაეთმო. მონაწილეების ინტერესი, მაღალი ჩართულობა და გამოცდილების გაზიარება იყო ტრენინგის ერთ-ერთი მნიშვნელოვანი ასპექტი, რომელიც, ვფიქრობ, წარმატებით განხორციელდა.“


ტრენინგის მონაწილეებმა შემდეგ თემებზე იმსჯელეს: თანასწორობა და გენდერის ნიშნით დისკრიმინაცია, ამ კუთხით არსებული საკანონმდებლო გარანტიები და დაცვის მექანიზმები (სასამართლო, სახალხო დამცველი, სამართალდამცავი სისტემა), გენდერული ნიშნით ძალადობა, სექსუალური შევიწროების ფაქტები და მისი გავლენა მსხვერპლსა და საზოგადოებაზე.


მათ ასევე მიიღეს ინფორმაცია ოჯახში ძალადობის, დისკრიმინაციის და გენდერული ნიშნით მოტივირებული ქალთა მკვლელობების [ფემიციდის] შესახებ. მონაწილეებმა ასევე განიხილეს ის შემთხვევები, როდესაც მსხვერპლები არ მიდიან მოძალადეებისგან და ამის გამომწვევი მიზეზები.


პრობლემებისა და თემის უკეთ გააზრების მიზნით ტრენერებმა წარმოადგინეს სახვადასხვა კვლევების შედეგები. ამის გარდა, ტრენინგზე განხილულ იქნა ლგბტი ჯგუფებთან მუშაობის ეთიკა და თავისებურებები.


„2014 წელს ძალაში შევიდა კანონი „დისკრიმინაციის ყველა ფორმის აღმოფხვრის შესახებ“, რის გამოც საქართველოს პროკურატურა და სხვა ძალოვანი უწყებები აღმოჩნდნენ ახალი გამოწვევის წინაშე. დღის წესრიგში დადგა დისკრიმინაციული მოტივით ჩადენილი დანაშაულებისათვის შესაბამისი სამართლებრივი კვალიფიკაციის მინიჭება,“ - აღნიშნა სიღნაღის რაიონული პროკურატურის პროკურორმა შმაგი გობეჯიშვილმა: „მნიშვნელოვანია, რომ ტრენინგი ორიენტირებული იყო როგორც საერთაშორისო სტანდარტებისა და სამართლებრივი თემატიკის გაცნობაზე, ისე პრაქტიკული გამოცდილების, კაზუსების განხილვასა და სწორი დამოკიდებულების ჩამოყალიბებაზე. მონაწილეებს შესაძლებლობა გვქონდა გამოგვეხატა საკუთარი შეხედულებები და მიგვეღო პასუხები კითხვებზე, რომლებიც დაკავშირებული იყო საქმიანობის დროს წარმოქმნილ პრობლემურ საკითხებთან.“


საქართველოს მთავარი პროკურატურის საპროკურორო საქმიანობაზე ზედამხედველობისა და სტრატეგიული განვითარების დეპარტამენტის უფროსი პროკურორის მაკა გაგიევის თქმით, „ურთიერთთანამშრომლობით ჩატარებული შეხვედრები და ტრენინგები, განსაკუთრებით არასამთავრობო ორგანიზაციებთან ერთად, ხელს უწყობს პროკურატურას, დაინახოს ის გამოწვევები და ხარვეზები, რაც არსებობს დისკრიმინაციული მოტივით ჩადენილ დანაშაულთა გამოძიებისა და სასამართლო განხილვების პროცესში.“


„ეს ტრენინგი მნიშვნელოვანი იყო ჩვენთვის, პროკურატურის წარმომადგენლებისთვის, რომელთაც შეხება გვაქვს ამგვარ დანაშაულებთან, რადგან უშუალოდ სახალხო დამცველის მოადგილის და ამ საკითხებზე მომუშავე ორგანიზაციის წარმომადგენლისგან მოვისმინეთ მნიშვნელოვანი საკითხები გენდერის და სქესის ნიშნით დისკრიმინაციაზე, მათ შორის ტერმინთა განმარტებები და არსებული პრაქტიკა და სტატისტიკა. პირადად მე, ტრენინგის დროს მიღებული ინფორმაცია და ცოდნა დამეხმარება ამ დანაშაულებზე არსებული სისხლის სამართლის საქმეების მონიტორინგისას, სამომავლოდ, შესაბამისი ანგარიშისა და რეკომენდაციის მომზადებაში.“ - აღნიშნა მაკა გაგიევმა.


11-13 ნოემბერს გამართული ტრენინგი პირველია მსგავსი ტრენინგების რიგში, რომლებსაც IDFI გეგმავს, ევროკავშირის მხარდაჭერითა და საქართველოს პროკურატურასთან თანამშრომლობით, სიძულვილით მოტივირებული დანაშაულების და ქალთა მიმართ ძალადობის მიმართულებებით მომუშავე პროკურორებისა და გამომძიებლების შესაძლებლობების გაძლიერების მიზნით.

 

ღონისძიების ფოტოალბომი იხილეთ აქ

 

სხვა ტრენინგები ამ თემაზე
სიახლეები

საქართველოს დემოკრატიული რესპუბლიკის და შვედეთის სამეფოს დიპლომატიური ურთიერთობები შვედეთის საგარეო საქმეთა სამინისტროში დაცული დოკუმენტების მიხედვით

06.06.2020

მოსამართლეთა დისციპლინური პასუხისმგებლობის სისტემა

05.06.2020

საქართველოს პარლამენტმა ინფორმაციის თავისუფლების შესახებ ანგარიშების განხილვა დაიწყო

05.06.2020

საქართველოს ლობისტური საქმიანობა ამერიკის შეერთებულ შტატებში

03.06.2020
განცხადებები

აჭარის საზოგადოებრივი მაუწყებლის ირგვლივ განვითარებული მოვლენები კვლავაც კრიტიკულია

04.06.2020

პარლამენტმა მხარი არ უნდა დაუჭიროს კანონპროექტს ინფორმაციული უსაფრთხოების შესახებ

29.05.2020

IDFI-ი მოუწოდებს საქართველოს პარლამენტს არ დაუშვას კანონპროექტის დაჩქარებული წესით მიღება

20.05.2020

IDFI-ის განცხადებით ხელისუფლებამ უნდა გააკეთოს მკაფიო განმარტება მოსალოდნელი შეზღუდვების სამართლებრივი საფუძვლების შესახებ

15.05.2020
ბლოგპოსტები

ივანე ჯავახიშვილი და საქართველოს დამოუკიდებლობა

26.05.2020

მეორე მსოფლიო ომში გამარჯვების დღის მითვისება რუსული პროპაგანდის მიერ

08.05.2020

საქართველოს მოსახლეობის დამოკიდებულება პროკურატურის მიმართ

04.05.2020

ქართული პრესისა და ბეჭდვითი მედიის ცენზურის მიმოხილვა

03.05.2020