საქართველოს მთავრობის კანცელარიის, საჯარო სამსახურის ბიუროსა და ევროკავშირის პროგრამის ,,ელექტრონული მმართველობის ხელშეწყობა საქართველოში’’ ორგანიზებით გაიმართა ტრენინგი ელექტრონულ მმართველობასთან დაკავშირებულ საკითხებზე.
ტრენინგს უძღვებოდნენ ინფორმაციის თავისუფლების განვითარების ინსტიტუტის (IDFI) ექსპერტები. მათ მონაწილეებს ელ-მმართველობასთან დაკავშირებულ საკითხებზე მრავალწლიანი მუშაობის შედეგად დაგროვილი გამოცდილება გაუზიარეს.

ტრენინგის გახსნას ესწრებოდნენ ევროკავშირის ელექტრონული მმართველობის პროგრამის ხელმძღვანელი - ფილიპ ბერნარდი, საჯარო სამსახურის ბიუროს უფროსი - ირაკლი კოტეტიშვილი და ,,ელექტრონული მმართველობის ხელშეწყობა საქართველოში’’ პროექტის ხელმძღვანელი - კოსტას დრაკასი. ისაუბრეს ელექტრონულ მმართველობასთან დაკავშირებული ტრენინგების მნიშვნელობაზე განსაკუთრებით მაშინ, როდესაც საქართველოს საჯარო სამსახურში ელექტრონული მმართველობის დანერგვა–განვითარება ქვეყნისთვის მნიშვნელოვანი პრიორიტეტია. 2009 წლიდან საჯარო სამსახურის ბიურო აქტიურად მუშაობს ამ მიმართულებით და საჯარო სამსახურის სფეროში ელექტრონული მმართველობის რამდენიმე წარმატებულ პროექტს ახორციელებს.

ტრენინგის ფარგლებში მონაწილეები გაეცნენ ელექტრონული მმართველობის ისეთ მნიშვნელოვან საკითხებს, როგორიცაა:

• ეთიკა ელექტრონულ მმართველობაში და პერსონალურ მონაცემთა დაცვა;
• ელექტრონული მმართველობის სტრატეგიის ფორმულირება და პროექტების მართვა;
• ინფორმაციის თავისუფლება და ინფორმაციის პროაქტიულად გამოქვეყნება.

პროექტი ითვალისწინებდა 150 საჯარო მოსამსახურის გადამზადებას საჯარო სამსახურის გაძლიერებისა და საქართველოში ეფექტური ელექტრონული მმართველობის დანერგვის მიზნით.