2022 წლის 11 თებერვალს, ინფორმაციის თავისუფლების განვითარების ინსტიტუტისა (IDFI) და სახელმწიფო ინსპექტორის სამსახურის ერთობლივი პროექტის „პერსონალური მონაცემების დაცვის მხარდაჭერა საქართველოში“ ფარგლებში, სახელმწიფო ინსპექტორის სამსახურის თანამშრომლების ტრენინგი ჩატარდა. ტრენინგი შეეხებოდა ადამიანის უფლებათა ევროპული სასამართლოს და ევროკავშირის მართლმსაჯულების სასამართლოს პრაქტიკას პერსონალურ მონაცემთა დაცვის საკითხებზე.

ტრენინგის მონაწილეებს მისასალმებელი სიტყვით მიმართეს IDFI-ის კანონის უზენაესობისა და ადამიანის უფლებების მიმართულების ხელმძღვანელმა - ქეთევან კუკავამ,ნიდერლანდების სამეფოს ელჩმა - მააიკე ვან კოლდამმა  და სახელმწიფო ინსპექტორის მოადგილემ - სოფიო ჯიაძემ.

„დღეს ჩვენ განვიხილავთ ადამიანის უფლებათა ევროპული სასამართლოს და ევროკავშირის მართლმსაჯულების სასამართლოს მიერ მიღებულ 10 მნიშვნელოვან გადაწყვეტილებას. ჩვენი მიზანია, გაგაცნოთ პრეცედენტული სამართლის განვითარება და არსებული რეალობისა და გამოწვევების შესაბამისად განვითარებული ახალი მიდგომები. ჩვენი სურვილია, ხელი შევუწყოთ ევროპულ სტანდარტებთან დაახლოებას სასამართლოების უახლესი პრაქტიკის შესახებ ცნობიერების ამაღლების გზით,“ - განაცხადა ქეთევან კუკავამ.

ტრენინგს უძღვებოდნენ IDFI-ის კანონის უზენაესობისა და ადამიანის უფლებების მიმართულების ხელმძღვანელი ქეთევან კუკავა და IDFI-ის იურისტი - ნატა ახალაძე.

ადამიანის უფლებათა ევროპული სასამართლოს და ევროკავშირის მართლმსაჯულების სასამართლოს მიერ მიღებული გადაწყვეტილებების კრებული ხელმისაწვდომია აქ.

ტრენინგის ფოტოალბომი იხილეთ აქ.

ტრენინგი ჩატარდა პროექტის „პერსონალური მონაცემების დაცვის მხარდაჭერა საქართველოში“ ფარგლებში, რომელიც დაფინანსებულია საქართველოში ნიდერლანდების სამეფოს საელჩოს მიერ.