უკრაინაში რუსეთის შეჭრის შემდეგ მილიონობით ადამიანი ცდილობდა დახმარების მობილიზებას. ამ პროცესში მნიშვნელოვანი იყო სამოქალაქო საზოგადოების როლი. თანაც, ომმა გავლენა იქონია აღმოსავლეთ პარტნიორობის ქვეყნებზეც. შექმნილმა კრიზისულმა სიტუაციამ და უკრაინის დახმარებისთვის მობილიზებულმა აქტივობებმა აჩვენა, რომ მსგავსი სოლიდარობის მცდელობები შეიძლება შეფერხდეს ცალკეული რისკების შემცირებისკენ მიმართული რეგულაციებით. მათ შორის მოიაზრება კანონები და წესები, რომელთა მიზანი ფინანსური სისტემების გამჭვირვალობის უზრუნველყოფა და ფულის გათეთრების, ტერორიზმის დაფინანსებისა და სხვა უკანონო ტრანზაქციების პრევენციაა. შესაბამისად, საჭიროა სწორი ბალანსის არსებობა, რაც რთული მისაღწევია. თუმცა, არსებულმა გამოწვევებმა და ახალმა გარემოებებმა აჩვენა, რომ კრიზისების დროს ბალანსი შეიძლება დაირღვეს და დროებით შესაძლებელია ცალკეული რისკებით ნაკლებად იხელმძღვანელონ, რათა დროულად მოხდეს ჰუმანიტარული დახმარების აღმოჩენა. ამავდროულად, თუ ხსენებული ბალანსი უნდა შეიცვალოს, მნიშვნელოვანია ეს მოხდეს დროულად და ყველა დაინტერესებული მხარის ჩართულობით.
სწორედ ამას ეხება ე.წ. თბილისის პრინციპები, რომლებიც მიემართება სხვადასხვა სექტორს და წარმოადგენს რეკომენდაციებს მათი საქმიანობისა და კომპეტენციების გათვალისწინებით. კერძოდ, დოკუმენტში წარმოდგენილია შეთავაზებები საჯარო სექტორისთვის / მთავრობებისთვის, კერძო სექტორისთვის/ფინანსური ინსტიტუტებისთვის, დონორებისა და სამოქალაქო საზოგადოების წარმომადგენლებისთვის, ასევე, ფინანსურ ქმედებათა სპეციალური ჯგუფისა (FATF) და ევროკავშირისთვის.
ე.წ. თბილისის პრინციპები შემუშავდა 2022 წლის 7-9 ივნისს, თბილისში, ევროკავშირის გლობალური ინიციატივის „ფულის გათეთრებისა და ტერორიზმის დაფინანსების წინააღმდეგ ბრძოლის“ შესახებ (AML/CFT Global Facility) რეგიონული ღონისძიების დროს. შეხვედრის ადგილობრივი პარტნიორი იყო ინფორმაციის თავისუფლების განვითარების ინსტიტუტი (IDFI). ღონისძიების მთავარი საკითხი გახლდათ - უკრაინაში რუსეთის შეჭრის გავლენა აღმოსავლეთ პარტნიორობის ქვეყნებში მოქმედ არასამთავრობო ორგანიზაციებზე, ფულის გათეთრებისა და ტერორიზმის დაფინანსების წინააღმდეგ ბრძოლის ინიციატივების ჭრილში.
ღონისძიებაში, რომელიც ჰიბრიდულ ფორმატში გაიმართა, მონაწილეობა მიიღო 60 წარმომადგენელმა არასამთავრობო სექტორიდან აღმოსავლეთ პარტნიორობისა და ევროკავშირის ქვეყნებიდან, ასევე, ევროკავშირის დელეგაციის, ევროსაბჭოს ფულის გათეთრების წინააღმდეგ ბრძოლის კომიტეტის (MONEYVAL) და ფინანსურ ქმედებათა სპეციალური ჯგუფის (FATF), ასევე, ევროპის საბანკო ასოციაციის, კერძო სექტორისა და შესაბამისი ინსტიტუტების წარმომადგენლებმა. თბილისის პრინციპების პირველადი დოკუმენტი აღმოსავლეთ პარტნიორობის ქვეყნების სამოქალაქო საზოგადოების წარმომადგენლებმა საერთაშორისო ორგანიზაციებისა და ექსპერტების ჩართულობითა და ფასილიტაციით შეიმუშავეს.
რუსული კანონი არ არის საქართველოს არჩევანი
21.02.2023ანტიდასავლური პროპაგანდის საბჭოთა საწყისები
20.12.2022
სიახლეების გამოწერა
