IDFI-ს ინტერნეტისა და ინოვაციების მიმართულების ხელმძღვანელმა თეონა ტურაშვილმა და ამავე მიმართულების მკვლევარმა ედგარ ბრუტიანმა LAITech2024 კონფერენციაში მიიღეს მონაწილეობა, რომელიც ტალინის ტექნოლოგიური უნივერსიტეტის ორგანიზებით ყოველწლიურად იმართება. წლევანდელი კონფერენციის თემა იყო „კანონი, ეთიკა და პოლიტიკა ხელოვნურ ინტელექტსა და სამომავლო ტექნოლოგიებზე”, რომლის ფარგლებში IDFI-ის წარმომადგენლებმა 2021 წელს ჩატარებული კვლევის “ხელოვნური ინტელექტის სისტემების გამოყენება საქართველოში - კანონმდებლობა და პრაქტიკა” საფუძვლეზე, ისაუბრეს საქართველოში საჯარო უწყებების მიერ ხელოვნური ინტელექტის გამოყენების შემთხვევებსა და პრაქტიკაზე, ქვეყანაში ხელოვნური ინტელექტის შესახებ ერთიანი მარეგულირებელი ჩარჩოს აუცილებლობასა და საერთაშორისო სტანდარტებთან შესაბამისობაზე, პრეზენტაციის დასასრულს წარმოდგენილ იქნა კველვის საფუძველზე შემუშავებული რეკომენდაციები და საკითხის სიღრმისეული შესწავლის მიზნით, სამომავლო პერსპექტივები. 

LAITech2024-ის ორდღიანი კონფერენცია 2024 წლის 29 თებერვალსა და 1 მარტს გაიამრთა. მასში მონაწილეობდნენ სამართლის, კიბერუსაფრთხოების, ხელოვნური ინტელექტისა და მმართველობის მიმართულების ადგილობრივი და საერთაშორისო სტუდენტები და სპეციალისტები. კონფერენციის ფარგლებში წელს განიხილეს ისეთი საკითხები, როგორიცაა ხელოვნური ინტელექტი ჯანდაცვაში, არჩევნებში და სხვა. ღონისძიებამ ასევე უმასპინძლა ნატოს კოოპერაციული კიბერთავდაცვის ცენტრის (NATO CCDEOE) პანელს თემაზე - ახალი ტექნოლოგიების გამოყენება კიბერომში და კიბერთავდაცვაში.