სამშაბათს, 1 დეკემბერს, 16:00 საათზე, თბილისის სახელმწიფო უნივერსიტეტის I კორპუსის 115-ე აუდიტორიაში ინფორმაციის თავისუფლების განვითარების ინსტიტუტი (IDFI) გამართავს შეხვედრას დაინტერესებულ პირებთან, რომელთაც საქართველოს საჯარო დაწესებულებებში დაცული საჯარო მონაცემთა ბაზებისა და რეესტრების შესახებ მონაცემებს გააცნობს და მათი ხელმისაწვდომობის საკითხსა და ბიზნეს-სტარტაპებისთვის გამოყენების გზებს განიხილავს.

ღია მონაცემების პორტალი - www.data.gov.ge საქართველოში რამდენიმე თვის წინ შეიქმნა. აღნიშნულ პორტალზე ეტაპობრივად, ყველასთვის ხელმისაწვდომ ფორმატში, თავსდება საჯარო დაწესებულებების გამგებლობაში არსებული მონაცემთა ბაზები. ღია მონაცემების პორტალი მოქალაქეებს, ბიზნეს სექტორს და ნებისმიერ დაინტერესებულ პირს საშუალებას აძლევს გაეცნოს სახელმწიფო მონაცემებს და მათი გამოყენებით შექმნას ინოვაციური აპლიკაციები, ბიზნეს პროექტები და ელექტრონული სერვისები.

ინფორმაციის თავისუფლების განვითარების ინსტიტუტი (IDFI) ახორციელებს პროექტს „ღია მონაცემები: ცვლილებებისა და ინოვაციების წყარო“, რომელიც მიზნად ისახავს ღია მონაცემების პორტალის, www.data.gov.ge-ს ფუნქციური ეფექტურობის გაზრდას. IDFI-ის გუნდი მონიტორინგს უწევს და აფასებს საქართველოს საჯარო დაწესებულებების ანგარიშვალდებულებას, პროაქტიულობას, ეფექტურობას, სიცხადესა და გამოყენებადობის დონეს www.data.gov.ge ვებგვერდისთვის საჯარო მონაცემების გამოქვეყნებაში.

აღნიშნული პროექტის ფარგლებში IDFI იწყებს საინფორმაციო შეხვედრების ჩატარებას. ორგანიზაციის წარმომადგენლები ისაუბრებენ საქართველოში არსებულ მდგომარეობაზე ღია მონაცემების ხელმისაწვდომობის კუთხით და წარმოადგენენ საჯარო მონაცემთა ბაზების გამოყენებით IDFI-ის მიერ შექმნილ აპლიკაციებს.

დასწრება თავისუფალია