11 დეკემბერს კორუფციის წინააღმდეგ ბრძოლის საერთაშორისო დღესთან დაკავშირებით იუსტიციის სამინისტროში საქართველოს კორუფციის წინააღმდეგ ბრძოლის უწყებათაშორისი საკოორდინაციო საბჭოს (ანტიკორუფციული საბჭო) მოდელირება გაიმართა. ღონისძიებაში სხვადასხვა უნივერსიტეტის 18 სტუდენტი მონაწილეობდა.
ღონისძიება იუსტიციის სამინისტროს ანალიტიკური დეპარტამენტის, იუსტიციის სასწავლო ცენტრის, საერთაშორისო გამჭვირვალობა − საქართველოსა და ინფორმაციის თავისუფლების განვითარების ინსტიტუტის მიერ იყო ორგანიზებული.
შერჩევა ღია კონკურსის წესით მოხდა. უმაღლესი სასწავლებლების მე-4 კურსისა და მაგისტრატურის სტუდენტებს ონლაინგანაცხადი უნდა შეევსოთ.
მოდელირების მონაწილეები 70-მდე აპლიკანტიდან შეირჩნენ. მათ შორის მოხვდნენ ივანე ჯავახიშვილის სახელობის თბილისის სახელმწიფო უნივერსიტეტის, ილიას ახელმწიფო უნივერსიტეტის, სოხუმის სახელმწიფო უნივერსიტეტის, სუხიშვილის სასწავლო უნივერსიტეტის, კავკასიის უნივერსიტეტის სტუდენტები.
ღონისძიების ფარგლებში სტუდენტებმა ანტიკორუფციულ საბჭოში შემავალი უწყებების როლები დაინაწილეს და სხდომის მოდელირება მოახდინეს: წარმოადგინეს საბჭოს წევრ უწყებათა პოზიციები, იმსჯელეს და დაამტკიცეს კორუფციის წინააღმდეგ ბრძოლის სტრატეგიული პრიორიტეტები.
ღონისძიების დასასრულს IDFI -ს გამგეობის თავმჯდომარემ ლევან ავალიშვილმა მონაწილე სტუდენტებს სერტიფიკატები გადასცა.
სიახლეების გამოწერა
