IDFI-იმ საქართველოს შინაგან საქმეთა სამინისტროდან  მიიღო  ოფიციალური  ინფორმაცია რუსეთის ფედერაციის საოკუპაციო ჯარის მიერ, ოკუპაციის ხაზის დარღვევისათვის დაკავებულ საქართველოს მოქალაქეთა რაოდენობის შესახებ. როგორც მიღებული დოკუმენტაციიდან ირკვევა 2009 წლიდან 2013 წლის ივნისის თვემდე საოკუპაციო ჯარების მიერ უკანონოდ დაკავებულია 1110 საქართველოს მოქალაქე, რომელთაგან  ცხინვალის  საოკუპაციო ხაზთან  დაკავებულ იქნა 474 პირი, ხოლო აფხაზეთის – 636 პირი.

რუსეთის საოკუპაციო ჯარების მიერ ყველაზე მეტი საქართველოს მოქალაქე ოკუპაციის ხაზის დარღვევისათვის აფხაზეთის მიმართულებაზეა დაკავებულია – 2012 წელს -190 პირი. თუმცა, აღსანიშნავია ის ფაქტი, რომ საქართველოს მოქალაქეების დაკავება ძალიან გახშირდა 2013 წელს ვინაიდან, დღეის მდგომარეობით  დაკავებულების  რაოდენობა უკვე  117 პირს შეადგენს.

რუსეთის საოკუპაციო ჯარების მიერ საქართველოს მოქალაქეების ოკუპაციის ხაზის დარღვევისათვის უკანონო დაკავებების თვალსაზრისით მსგავსი მდგომარეობაა ცხინვალის რეგიონში. 2013 წელს (იანვარი-ივნისი) უკვე დაკავებულია 80 საქართველოს მოქალაქე, ხოლო ყველაზე მეტი მოქალაქის (135 პირი) დაკავება განხორციელდა 2011 წელს.

ზემოთ მოყვანილი სტატისტიკური მონაცემები ცხადყოფს, რომ რუსეთის ფედერაციის საოკუპაციო ჯარების მიერ კვლავ ინტენსიურად გრძელდება როგორც აფხაზეთის ასევე სამაჩაბლოს რეგიონის ე.წ. ადმინისტრაციულ საზღვრებთან საქართველოს მოქალაქეების უკანონოდ დაკავების ფაქტები.