2023 წლის 19 მაისს, ინფორმაციის თავისუფლების განვითარების ინსტიტუტმა (IDFI) საჯარო უწყებების, სამოქალაქო საზოგადოებრივი ორგანიზაციების, მედია ორგანიზაციებისა და სატელეკომუნიკაციო კომპანიების წარმომადგენლების მონაწილეობით საჯარო განხილვა გამართა. ღონისძიების მიზანს მაუწყებლობის შესახებ კანონში განხორციელებული ბოლო ცვლილებებისა და ციფრულ უფლებებზე მათი გავლენის განხილვა წარმოადგენდა. 

2022 წლის 22 დეკემბერს, საქართველოს პარლამენტმა მაუწყებლობის შესახებ კანონში განსახორციელებელი მნიშვნელოვანი ცვლილებები მიიღო. ცვლილების განხორციელების ერთ-ერთი მთავარი მიზანი ევროკავშირის დირექტივებთან ქვეყნის კანონმდებლობის ჰარმონიზაცია წარმოადგენდა. 2023 წლის თებერვალში, საქართველოს პარლამენტის მოთხოვნის საპასუხოდ, ევროპის საბჭომ, პარლამენტს მიაწოდა დამოუკიდებელი საექსპერტო დასკვნა კანონში შეტანილ ცვლილებათა შესახებ. დასკვნის თანახმად, არსებული კანონი არ შეესაბამებოდა ევროკავშირის ცალკეულ სტანდარტებს და არსებობს მთელი რიგი დებულებები, რომლებიც, სავარაუდოდ, დაარღვევს ევროპული კონვენციის მე-10 მუხლს - გამოხატვის თავისუფლებას.

საკანონმდებლო ცვლილებების ერთ-ერთი მნიშვნელოვანი კომპონენტია ვიდეოგაზიარების პლატფორმების რეგულირებისა და ავტორიზაციის საკითხი. საკითხის სიახლისა და ციფრულ უფლებებზე მისი პოტენციური შედეგებიდან გამომდინარე, IDFI-მ, ევროპის საბჭოს დასკვნისა და ადგილობრივი კონტექსტის გათვალისწინებით, მოამზადა ანალიზი. 

შეხვედრის დასაწყისში IDFI-ის წარმომადგენლებმა დამსწრე საზოგადოებას ანალიზის საფუძველზე გამოვლენილი მნიშვნელოვანი გამოწვევები წარუდგინეს. სხვა დაინტერესებულ მხარეთა შორის ღონისძიებას ევროპის საბჭოს, საქართველოს კომუნიკაციების ეროვნული კომისიისა და ვიდეოგაზიარების ქართული მასშტაბური პლატფორმის MYVIDEO.GE-ს წარმომადგენლებიც ესწრებოდნენ. განხილვაზე მოწვეულმა სტუმრებმა კანონში განხორციელებულ ცვლილებებთან დაკავშირებით საკუთარი მოსაზრებები გამოთქვეს და გამოყვეს პრობლემური საკითხები, რომლებიც შემდგომ ცვლილებებს საჭიროებს, მათ შორის ვიდეოგაზიარების პლატფორმების ანგარიშვალდებულება, ავტორიზაცია, საჩივრების განხილვის სისტემა და ზიანის შემცველი შინაარსის განსაზღვრა. გამოწვევების იდენტიფიცირებასთან ერთად, მონაწილეებმა მზაობა გამოთქვეს აღნიშნულ საკითხებზე მომავალში საკუთარი გეგმების ერთმანეთთან გაზიარებისა და თანამშრომლობის შესახებ.