საზოგადოება “მემორიალის” ლიკვიდაციის ფორმალურ საფუძვლად იქცა პროკურატურის ბრალდება ორგანიზაციის მიერ “უცხოური აგენტის” სავალდებულო მარკირების დარღვევის თაობაზე, რომელიც 1 წელზე მეტი ხნის წინ მოხდა. ამავდროულად, პროკურატურის წარმომადგენელმა სხდომაზე საზოგადოება დაადანაშაულა საბჭოთა კავშირის ისტორიის “არასწორად” წარმოჩენაში და განაცხადა, რომ ის  „ქმნის სსრკ-ს, როგორც ტერორისტული სახელმწიფოს გაყალბებულ იმიჯს“.

რუსეთის ერთ-ერთი მნიშვნელოვანი უფლებადამცველი ორგანიზაციის გაუქმება კიდევ ერთხელ აჩვენებს წარსულის კვლევის მნიშვნელობას ტოტალიტარიზმთან და თანამედროვე ავტოკრატიულ რეჟიმებთან ბრძოლაში. 

“მემორიალი” აპირებს გადაწყვეტილების გასაჩივრებას ადამიანის უფლებათა ევროპულ სასამართლოში, რომელმაც უკვე მიიღო ვერდიქტი დროებითი ღონისძიების გამოყენების თაობაზე და რუსეთის ფედერაციას დაავალა უზენაესი და მოსკოვის საქალაქო სასამართლოების გადაწყვეტილების აღსრულების შეჩერება. აღსანიშნავია, რომ სასამართლო დროებით ღონისძიებას მხოლოდ უკიდურეს შემთხვევაში იყენებს, ძირითადად მაშინ, როდესაც ადამიანის სიცოცხლესა და ჯანმრთელობას საფრთხე  ემუქრება. ამ თვალსაზრისით, "მემორიალის საქმეზე" დროებითი ღონისძიების გამოყენება არის პრეცედენტული შემთხვევა, იმდენად რამდენადაც ამ საქმეში ადამიანის სიცოცხლის, ჯანმრთელობისა და ღირსების დაზიანების მყისიერი საფრთხეები არ იკვეთება. აღსანიშნავია, რომ ამგვარი პრეცედენტი ევროპულმა სასამართლომ პირველად “რუსთავი 2”-ის საქმეზე დროებითი ღონისძიების გამოყენებით დაამკვიდრა.

ინფორმაციის თავისუფლების განვითარების ინსტიტუტი (IDFI) ათ წელზე მეტია, რაც აქტიურად თანამშრომლობს საზოგადოება “მემორიალთან” საბჭოთა, მეხსიერების კვლევებისა და სტალინური რეპრესიების შესწავლის მიმართულებით.  IDFI სრულ მხარდაჭერას უცხადებს თავის პარტნიორს.