2013 წლის 29 მარტს IDFI-მ კულტურისა და ძეგლთა დაცვის სამინისტროდან გამოითხოვა ინფორმაცია  საქართველოს კულტურისა და ძეგლთა დაცვის სამინისტროს მიერ 2013 წლის 1 იანვრიდან წინამდებარე წერილის მიღების მომენტამდე განხორციელებული  სოციალური და კულტურული ღონისძიებებისა და ხარჯთაღრიცხვის შესახებ, ხელშეკრულების მხარეებისა და ხელშეკრულების გაფორმების თარიღის მითითებით. 2013 წლის 12 აპრილს სამინისტრომ სრულყოფილად მოგვაწოდა ინფორმაცია.

როგორც მიღებული ინფორმაციიდან ირკვევა, კულტურისა და ძეგლთა დაცვის სამინისტრომ 2013 წლის 1 იანვრიდან 11 აპრილის ჩათვლით პერიოდში განხორციელებულ სოციალურ და კულტურულ ღონისძიებებზე სულ გაწია შემდეგი სახის ხარჯები:

• 486 582 ლარი
• 5 987,72 აშშ დოლარი
• 41 029 ევრო
• 47 500 რუსული რუბლი
• 9 750 შვეიცარული ფრანკი

საინტერესოა აღნიშნული თანხების მიზნობრიობა. კერძოდ, ირკვევა, რომ:

• 99 550 ლარი გადაერიცხა ააიპ საქართველოს უსინათლოთა კავშირს ცენტრის საქმიანობისთვის;
• 61 714 ლარი მოხმარდა ლაიფციგის წიგნის ბაზრობაზე, საქართველოს წიგნის გამომცემელთა და გამავრცელებელთა ასოციაციის მონაწილეობას;
• 50 750 ლარით სამინისტრომ დაფარა პატრიარქის ეპისტოლეების ინგლისურ ენაზე გამოცემის ხარჯები.

რაც შეეხება თითოეული ღონისძიების ხარჯთაღრიცხვას, ზოგ შემთხვევაში მიღებული ინფორმაცია მეტყველებს დაფინანსებული ღონისძიებების ხარჯთაღრიცხვის პირობითობას მაგ. იხილეთ მხიარულთა და საზრიანთა კლუბის მიერ მოწოდებული ხარჯთაღრიცხვა.

საინტერესოა აგრეთვე ის ფაქტი, რომ კულტურისა და ძეგლთა დაცვის სამინისტრომ მოგვაწოდა მათ მიერ დაფინანსებული ყველა ღონისძიების ხარჯთაღრიცხვა გარდა პატრიარქის ეპისტოლეების ინგლისურ ენაზე გამოცემისათვის გადაცემული თანხისა.