2013 წლის 8 თებერვალს IDFI-იმ (ინფორმაციის თავისუფლების განვითარების ინსტიტუტმა) საჯარო ინფორმაციის მოთხოვნის განცხადებით მიმართა საქართველოს პარლამენტს. ჩვენს მიერ მოთხოვნილი იქნა სხვადასხვა სახის საჯარო ინფორმაცია, რაზეც პარლამენტის აპარატიდან სრულყოფილი პასუხი მივიღეთ. გვინდა აღვნიშნოთ, რომ განვლილ წლებში ანალოგიურ შეკითხვებზე, პარლამენტიდან არასრულყოფილი პასუხები მოგვდიოდა. შესაბამისად IDFI-ი მიესალმება, ანგარიშვალდებულებისა და გამჭვირვალობის მიმართულებით არსებულ პოზიტიურ ცვლილებებს. ჩვენ დარწმუნებულნი ვართ, რომ სწორედ პარლამენტი უნდა იყოს ინფორმაციის თავისუფლების უზრუნველყოფის კუთხით ყველასთვის მისაბაძი საჯარო დაწესებულება.

გვინდა წარმოგიდგინოთ მიღებულ ინფორმაციის ნაწილი (სრული ინფორმაცია განთავსებულია პროექტის ვებ-გვერდზე www.opendata.ge).

პარლამენტის წევრებზე (დეპუტატებზე) 2012 წლის პირველი იანვრიდან 2013 წლის 31 იანვრის ჩათვლით დარიცხული პრემიების შესახებ ინფორმაცია

შეგახსენებთ, რომ პარლამენტის ჩვეულებრივ წევრთა თანამდებობრივი სარგო (ხელფასი) შეადგენს 2865 ლარს, პარლამენტის თავმჯდომარის 4450 ლარს, პირველი მოადგილის 4400 ლარს, საპარლამენტო ფრაქციის თავმჯდომარის 3500 ლარს. დეტალური ინფორმაციის მისაღებად იხილეთ ჩვენს მიერ გამოქვეყნებული სტატია სახელწოდებით: “დაზუსტდა საქართველოს პარლამენტის წევრთა ანაზღაურება” .

რაც შეეხება უშუალოდ პრემიებს, მიღებული ინფორმაციიდან ირკვევა, რომ ყოველთვიურად პარლამენტის წევრები საშუალოდ პრემიის სახით იღებენ 280 ლარს, თუმცა, დამატებითი წახალისების სახით ორმაგი და სამმაგი ხელფასის ოდენობის თანხები გაიცემა აპრილში, ივნისში, ნოემბერში და დეკემბერში. მთლიანობაში ორივე მოწვევის პარლამენტის წევრებზე 2012 წლის იანვრიდან 2013 წლის 31 იანვრის ჩათვლით პრემიის სახით გაცემულია 2 687 752 ლარი, მათ შორის 2012 წლის აპრილში – 421 825 ლარი, ივლისში – 948 332 ლარი, ნოემბერში – 439 565 ლარი, დეკემბერში – 451 535 ლარი.

საინტერესოა აგრეთვე ის ფაქტი, რომ წინა მოწვევის პარლამენტში პრემიების სახით წახალისებულნი იქნენ ლებორისტული პარტიის მიერ შექმნილი ფრაქციის წევრები: შალვა ნათელაშვილი – 8595 ლარი პრემია, კახაბერ ძაგანია -  8595 ლარი პრემია, იოსებ შატბერაშვილი – 8595 ლარი პრემია, გიორგი გუგავა - 8595 ლარი პრემია. ცნობილია, რომ ლეიბორისტული პარტიის წევრები არც ერთხელ არ დასწრებიან წინა მოწვევის პარლამენტის სხდომებს რადგან ოფიციალურად ახდენდნენ მის ბოიკოტირებას. შესაბამისად აღნიშნული კიდევ ერთხელ ადასტურებს იმ გარემოებას, რომ პარლამენტში (ისევე როგორც სხვა საჯარო დაწესებულებებში) პრემიების გაცემა ხდება არა გაწეული ზეგანაკვეთური სამუშაოს შესრულების, განსაკუთრებული დამსახურების ან საქმიანობის წახალისების მიზნით, არამედ როგორც მხოლოდ სახელფასო დანამატი. 

აქვე წარმოგიდგენთ პარლამენტის თავმჯდომარისა და კომიტეტების თავმჯდომარეების ქვეყნის გარეთ განხორციელებულ ოფიციალურ ვიზიტებზე 2012 წლის პირველი იანვრიდან 2013  წლის 31 იანვრის ჩათვლით გაწეული  სამივლინებო ხარჯების შესახებ ინფორმაციას:

საინტერესოა აგრეთვე ქ. ქუთაისში პარლამენტის წევრთა და აპარატის თანამშრომელთა ბინების დაქირავებასთან დაკავშირებული ხარჯების შესახებ ინფორმაცია. მიღებული მონაცემებიდან იკვეთება, რომ ქალაქ ქუთაისში დეპუტატთა და პარლამენტის აპარატის თანამშრომელთა მხოლოდ ბინებით უზრუნველყოფისთვის ყოველწლიურად უნდა დაიხარჯოს 4 მილიონ 573 ათასი ლარი:

პარლამენტის აპარატის მიერ საწვავის მოხმარებაზე გაწეული ფაქტობრივი ხარჯი2012წლის პირველი იანვარიდან 2012წლის 20 ოქტომბრამდე და 2012 წლის 21 ოქტომბრიდან 2013 წლის 31 იანვრამდე პერიოდის განმავლობაში შემდეგნაირად გამოიყურება:

აპარატის მიერ სრულყოფილად იქნა მოწოდებული აგრეთვე პარლამენტის ბალანსზე რიცხული ავტომანქანების პერსონალური გადანაწილების შესახებ ინფორმაცია.