23 იანვარს საინფორმაციო წყაროებით გავრცელდა "საქართველოს დემოკრატიული პარტიის" თავმჯდომარის ბ-ნ გია თორთლაძის განცხადება რომლის მიხედვითაც "ინფორმაციის თავისუფლების განვითარების ინსტიტუტი" (IDFI) დადანაშაულებულ იქნა დეზინფორმაციის გავრცელებაში. კერძოდ, ბ-ნ გია თორთლაძის განცხადებით, ინსტიტუტს საზოგადოება შეჰყავს შეცდომაში, თითქოს 350 000 ლარი საქართველოს კულტურისა და ძეგლთა დაცვის სამინისტრომ პირადად მას გადაურიცხა. ბ-ნმა თორთლაძემ განმარტა, რომ ეს თანხა სამინისტრომ "საქართველოს დეოკუპაციის ცენტრს" ჩაურიცხა. მისი თქმით, კულტურის სამინისტრომ დააფინანსა "საქართველოს დეოკუპაციის ცენტრი" და არა კონკრეტულად ყოფილი დეპუტატი გია თორთლაძე.

აღნიშნულთან დაკავშირებით, კიდევ ერთხელ განვმარტავთ, რომ თავდაპირველად (17.07.2012) ხელშეკრულება გაფორმდა ფიზიკურ პირ გია თორთლაძესა და სამინისტროს შორის და მას ხელს აწერენ ერთის მხრივ კულტურისა და ძეგლთა დაცვის მინისტრის მოადგილე დავით ქირია, ხოლო მეორეს მხრივ ფიზიკური პირი გია თორთლაძე:

ხელშეკრულების გაფორმებიდან ერთ თვეში მასში შეტანილ იქნა ცვლილებები და ხელშეკრულების მხარედ ფ. პ. გია თორთლაძის ნაცვლად, "მიმწოდებლად" დაფიქსირდა ბატონ გია თორთლაძის მიერვე 07.08.2012 წელს დაფუძნებული ააიპ “საქართველოს დეოკუპაციის ცენტრი”:

აღნიშნულიდან გამომდინარე, ნათელია, რომ პროექტის კონკურს გარეშე დაფინანსების გადაწყვეტილება მიღებულ იქნა "საქართველოს დეოკუპაციის ცენტრის"დაფუძნებამდე ერთი თვით ადრე,რასთან დაკავშირებითაც გაფორმდა შესაბამისი ხელშეკრულება "შემსყიდველ" საქართველოს კულტურისა და ძეგლთა დაცვის სამინისტროსა და "შემსრულებელ" ფიზიკურ პირ გია თორთლაძეს შორის.

დამატებითი ინფორმაციისთვის იხილეთ ჩვენს მიერ გამოქვეყნებული სტატია - კულტურის სფეროს დაფინანსების პრიორიტეტები