2012 წლის 12 აპრილს პროექტის - "საქართველოს საჯარო დაწესებულებების საინფორმაციო (ინტერნეტ) რესურსების მონიტორინგი" ფარგლებში IDFI-ს ექსპერტთა ჯგუფმა განახორციელა საქართველოს პრეზიდენტის ადმინისტრაციის ოფიციალური ვებ-გვერდის (www.president.gov.ge) საინფორმაციო გამჭვირვალობისა და ელექტრონული მმართველობის შეფასებითი მონიტორინგი.

ზოგადად შეიძლება ითქვას, რომ მიუხედავად იმ გარემოებისა, რომ საქართველოს პრეზიდენტის ადმინისტრაციის ოფიციალური ვებ-გვერდი საზოგადოების ინფორმირებულობისაკენ ორიენტირებული ვებ-გვერდის შთაბეჭდილებას ტოვებს, ელ.გამჭვირვალობის მაღალი დონის მისაღწევად ვებ-გვერდი, უპირველეს ყოვლისა, საჭიროებს ისეთი მნიშვნელოვანი მონაცემთა ბაზების დამატებას, როგორებიცაა - ტენდერებისა და განხორციელებულ სახელმწიფო შესყიდვების არქივი, საქართველოს პრეზიდენტის ადმინისტრაციაში ვაკანსიათა არქივი, საჯარო ინფორმაციის ღიაობასთან დაკავშირებული ინფორმაცია და საქართველოს პრეზიდენტის ადმინისტრაციის საქმიანობის ამსახველი ანგარიშები/მოხსენებები. ამავე დროს, უმნიშვნელოვანესად მიგვაჩნია ბრეზიდენტის სამართლებრივი აქტების (განკარგულებები, ბრძანებულებები და სხვა) პროაქტიულად გამოქვეყნება ელ.რესურსზე. ასეთი მნიშვნელოვანი დოკუმენტების შერჩევითობის პრინციპით გამოქვეყნება მნიშვნელოვნად ადაბლებს ინფორმაციის ხელმისაწვდომობის ხარისხს და უარყოფით მაგალითს აძლევს სხვა საჯარო დაწესებულებებს ღიაობის პოლიტიკის დანერგვაში. ვფიქრობთ, რომ ქვეყნის პრეზიდენტის ოფიციალური ელ. რესურსი უნდა იყოს მაგალითის მიმცემი ყველა ადმინისტრაციული ორგანოსთვის გამჭვირვალობის, ღიაობისა და ანგარიშვალდებულების კუთხით. სამწუხაროდ, ამ ეტაპზე საქართველოს პრეზიდენტის ადმინისტრაციის ოფიციალური ვებ-გვერდი - www.president.gov.ge მხოლოდ საპრეზენტაციო და ზოგადი საინფორმაციო რესურსის შთაბეჭდილებას ტოვებს.  

IDFI-ს შეფასებითი პარამეტრების მიხედვით საქართველოს პრეზიდენტის ადმინისტრაციის ოფიციალური ვებ-გვერდის

ინფორმაციული გამჭვირვალობის ხარისხმა შეადგინა: 14.28%

ტექნიკური გამართულობისა და ელ. ხელმისაწვდომობის ხარისხმა შეადგინა: 51.58%

ვებ-გვერდის ჯამური რეიტინგი:  32.93%

კვლევის სტატისტიკური მონაცემები, გამოვლენილი პრობლემები და შესაბამისი რეკომენდაციები შეგიძლიათ იხილოთ თანდართულ ფაილში:

საქართველოს პრეზიდენტის ადმინისტრაციის ოფიციალური ვებ-გვერდის მონიტორინგი

კვლევასთან დაკავშირებული ნებისმიერი წინადადებით ან შეკითხვით შეგიძლიათ მოგვმართოთ ელ.ფოსტაზე - info@idfi.ge