27 აპრილს 14:00 საათზე, გაეროს სახლში ჩატარდა შეხვედრა საქართველოს ღია პარლამენტის სამუშაო ჯგუფის საერთაშორისო და არასამთავრობო ორგანიზაციების მონაწილეობით.

შეხვედრის მონაწილეებმა განიხილეს „ღია მმართველობის პარტნიორობის“ ინიციატივაში (OGP) საქართველოს პარლამენტის როლის გაზრდის და საქართველოში საპარლამენტო ღიაობის პრინციპების დამკვიდრების ხელშეწყობის საკითხები. შეხვედრის მონაწილეებმა იმსჯელეს რეკომენდაციებზე, რაც შეიძლება გათვალისწინებული იყოს ,,საქართველოს პარლამენტის სამოქმედო გეგმა ღია პარლამენტისთვის“ შემუშავების პროცესში. მონაწილეებმა ხაზი გაუსვეს არასამთავრობო და საერთაშორისო ორგანიზაციების მხრიდან ერთიანი პოზიციის ჩამოყალიბების აუცილებლობას საპარლამენტო ღიაობისა და ,,საქართველოს პარლამენტის სამოქმედო გეგმა ღია პარლამენტისთვის“ მიმართებაში. 

საქართველოს ღია პარლამენტის სამუშაო ჯგუფი შეიქმნა გაეროს განვითარების პროგრამის (UNDP) ინფორმაციის თავისუფლების განვითარების ინსტიტუტის (IDFI) პროექტის „ღია მმართველობის პარტნიორობის ინიციატივაში საქართველოს პარლამენტის ჩართულობის მხარდაჭერა“ მეშვეობით (რომელიც თავის მხრივ ევროკავშირის მიერ დაფინანსებული პროგრამა „საქართველოში საპარლამენტო დემოკრატიის სისტემის გაძლიერება“ ფარგლებში ხორციელდება). პროექტი ხორციელდება საქართველოს პარლამენტთან თანამშრომლობით.

აღნიშნული პროექტის ფარგლებში, ხუთშაბათს, 30 აპრილს ხელი მოეწერება მემორანდუმს საქართველოს პარლამენტსა და საქართველოს ღია პარლამენტის სამუშაო ჯგუფის წევრ საერთაშორისო და არასამთავრობო ორგანიზაციებს შორის. ასევე, იმავე დღეს საქართველოს პარლამენტის წევრები ხელს მოაწერენ საპარლამენტო ღიაობის დეკლარაციას.

იხილეთ ფოტო ალბომი