IDFI-მ 10 თებერვალს, ქუთაისის აკაკი წერეთლის სახელობის სახელმწიფო უნივერსიტეტში, პროექტ საქართველო 2020-ის ფარგლებში გასვლითი ლექცია გამართა.

ლექცია პროექტის „სტრატეგიული გეგმა საქართველო 2020 – სამოქალაქო საზოგადოების ჩართულობის გაძლიერება“ ფარგლებში წაიკითხეს მოწვეულმა ლექტორებმა - სოფიო საჩალელმა, კონსტანტინე ნაცვლიშვილმა და თეა გერგედავამ.

შეკრებილ 30-მდე სტუდენტსა და პროფესორ-ლექტორებს სოფიო საჩალელი შრომის სამართალზე ესაუბრა. კონსტანტინე ნაცვლიშვილმა ყურადღება გაამახვილა კულტურის პოლიტიკაზე ურბანული პოლიტიკის კონტექსტში, ხოლო თეა გერგედავა შეეხო უმაღლესი განათლების მდგრადობის საკითხს.

,,ინფორმაციის თავისუფლების განვითარების ინსტიტუტი" (IDFI) ბრემენის უნივერსიტეტთან ერთად გერმანიის საგარეო საქმეთა სამინისტროს დაფინანსებით ახორციელებს პროექტს: "სტრატეგიული გეგმა საქართველო 2020 - სამოქალაქო საზოგადოების ჩართულობის გაძლიერება (ZigB)". პროექტი მიზნად ისახავს სამოქალაქო საზოგადოების ჯგუფების მაქსიმალურად ფართო სპექტრის დაინტერესების გამოწვევასა და მათი ცოდნის გაღრმავებას, საქართველოს მთავრობის მიერ დადგენილებით დამტკიცებული სოციალურ-ეკონომიკური განვითარების სტრატეგია "საქართველო - 2020"-თან დაკავშირებით, რათა ისინი მომავალში უფრო აქტიურად ჩაერთონ საჯარო განხილვების პროცესში.

შეხვედრის მონაწილეებს გადაეცათ სერტიფიკატები, ხოლო გამორჩეულად აქტიურ სტუდენტებს დაურიგდათ წიგნები.