2022 წლის 23 მარტს დაიწყო კორუფციასთან ბრძოლის სასერტიფიკატო პროგრამის ახალი სემესტრი, რომელიც გაიხსნა სამაგისტრო საგნით - კორუფციასთან ბრძოლა - საერთაშორისო აქტორები, ანტიკორუფციული პლატფორმები. 

სასწავლო კურსს უძღვება - ქეთევან ცანავა, რომელიც არის საქართველოს მთავრობის ადმინისტრაციის პოლიტიკის დაგეგმვისა და სამთავრობო კოორდინაციის საჯარო მმართველობის სამმართველოს უფროსი, ღია მმართველობა საქართველოს უწყებათაშორისი საკოორდინაციო საბჭოს მდივანი და საჯარო მმართველობის უწყებათაშორისი საკოორდინაციო საბჭოს მდივანი.

სასწავლო კურსი გახსნეს „ინფორმაციის თავისუფლების განვითარების ინსტიტუტის“ (IDFI) აღმასრულებელმა დირექტორმა, გიორგი კლდიაშვილმა, და ილიას სახელმწიფო უნივერსიტეტის მეცნიერებათა და ხელოვნების ფაკულტეტის დეკანმა, ასოცირებულ პროფესორმა, ნინო მატარაძემ. მხარეებმა ისაუბრეს ილიას სახელმწიფო უნივერსიტეტსა და IDFI-ს შორის თანამშრომლობის გაღრმავების შესახებ; ამავდროულად, ხაზის გაუსვეს ცოდნისა და გამოცდილების გაზიარების თვალსაზრისით სტუდენტებისა და დარგის პროფესიონალებით დაკომპლექტებული, შერეული, ჯგუფების არსებობის მნიშვნელობას და საქართველოში კორუფციასთან ბრძოლის აუცილებლობას.

სხვა საკითხებთან ერთად, შემოთავაზებული საგანი სემესტრის განმავლობაში დაფარავს ისეთ თემებს როგორიცაა ანტიკორუფციული სტრატეგიები და სამოქმედო გეგმები, კორუფციასთან ბრძოლის საერთაშორისო სამართლებრივი ინსტრუმენტები, კორუფციასთან ბრძოლის საერთაშორისო და რეგიონული პლატფორმები, კორუფცია სასამართლო სისტემაში და საჯარო სერვისები და კორუფცია.

კორუფციასთან ბრძოლა - საერთაშორისო აქტორები, ანტიკორუფციული პლატფორმები არის მეცნიერებათა და ხელოვნების ფაკულტეტის სასწავლო კურიკულუმის და კორუფციასთან ბრძოლის სასერტიფიკატო პროგრამის საგანი. შედეგად, ილიას სახელმწიფო უნივერსიტეტის სტუდენტებს შესაძლებლობა ექნებათ მიიღონ როგორც კრედიტი (ECTS), ასევე, სერტიფიკატი. მიმდინარე სემესტრში სასწავლო პროცესი წარიმართება ჰიბრიდულ რეჟიმში, რაც შესაძლებლობას მისცემს კორუფციასთან ბრძოლის სასერტიფიკატო პროგრამის მონაწილეებს დაესწრონ სასწავლო პროცესს როგორც აუდიტორიებში, ასევე, დისტანციურად. 

კორუფციასთან ბრძოლის სასერტიფიკატო პროგრამის განხორციელება „ინფორმაციის თავისუფლების განვითარების ინსტიტუტმა“ (IDFI) 2019 წლიდან დაიწყო ილიას სახელმწიფო უნივერსიტეტთან თანამშრომლობით. პროგრამას ფინანსურ მხარდაჭერას უწევს ღია საზოგადოების მხარდაჭერის ფონდი პროექტის „მდგრადი ადამიანური რესურსების განვითარება კორუფციასთან საბრძოლველად“ ფარგლებში.