25 ოქტომბერს, ქალაქ გორში, IDFI-ს და USAID-ის ეკონომიკური მმართველობის პროგრამის წარმომადგენლები გორის მუნიციპალიტეტის საკრებულოსა და მერიის წარმომადგენლებს შეხვდნენ. შეხვედრის მიზანი საჯარო უწყებებისათვის საჯარო-კერძო დიალოგის ხარისხის შეფასების მექანიზმის გაცნობა და გორის მუნიციპალიტეტში კერძო სექტორის დიალოგში ჩართულობის გამოცდილების და გამოწვევების გაცნობა იყო.  

შეხვედრის პირველი ნაწილი დაეთმო ანგარიშის „ნორმატიული აქტების შემუშავების პროცესში საჯარო-კერძო დიალოგის ხარისხის შეფასება - 2020-2021 წწ.” შედეგების გაცნობას. ხოლო, მეორე ნაწილში საკრებულოსა და მერიის წარმომადგენლებმა ისაუბრეს საჯარო განხილვებში კერძო სექტორის  ჩართულობის არსებულ გამოცდილებაზე და მიზეზებზე, რის გამოც დაბალია დიალოგში საზოგადოების ჩართულობის ხარისხი. ასევე, შეხვედრის მონაწილეებმა განიხილეს ნორმატიული აქტები, რომლებიც შესაძლოა შეირჩეს 2022 წლის შეფასებისას. 

შეხვედრაში მონაწილეობდნენ საკრებულოს წევრები პარტიებიდან „ქართული ოცნება-დემოკრატიული საქართველო“, „ერთიანი ნაციონალური მოძრაობა“ და „გორი - საქართველოსთვის, ასევე, გორის მერიის წარმომადგენლები და საკრებულოს აპარატის წევრები.

საინფორმაციო შეხვედრა ჩატარდა პროექტის „საჯარო და კერძო სექტორებს შორის დიალოგის ხელშეწყობა საქართველოში მონიტორინგისა და ცნობიერების ამაღლების გზით“ ფარგლებში, USAID-ის ეკონომიკური მმართველობის პროგრამის მხარდაჭერით.