17-19 ივლისს, ინფორმაციის თავისუფლების განვითარების ინსტიტუტის (IDFI) მიერ ორგანიზებულ ორდღიან პრაქტიკულ ტრენინგში მონაწილეობა 15-მა მსმენელმა მიიღო. მონაწილეებმა ხელისუფლების საქმიანობის მონიტორინგის მექანიზმები და მეთოდები შეისწავლეს.

ტრენინგი გლობალური საქველმოქმედო ორგანიზაცია - Luminate-ის მხარდაჭერით ჩატარდა და მასში მონაწილეობა მიიღეს ღია კონკურსის შედეგად შერჩეულმა რეგიონში მცხოვრებმა სტუდენტებმა, სამოქალაქო აქტივისტებმა და ჟურნალისტებმა.

ტრენინგის მონაწილეებს IDFI-ის პროექტების დირექტორმა, ლევან ავალიშვილმა მისასალმებელი სიტყვით მიმართა. მან ინსტიტუტის მიმდინარე პროექტის - „კარგი მმართველობის გაძლიერება საქართველოში“ (რომლის ფარგლებშიც ჩატარდა აღნიშნული ტრენინგი) ფარგლებში განხორციელებული აქტივობების მნიშვნელობაზე ისაუბრა.

ტრენინგს უძღვებოდნენ IDFI-ის მედიის, ინტერნეტისა და ინოვაციების პროგრამის ხელმძღვანელი, თეონა ტურაშვილი; IDFI-ის ანალიტიკოსი, მარიამ გოგიაშვილი და IDFI-ის ეკონომიკისა და სოციალური პოლიტიკის მიმართულების ხელმძღვანელი, გოგა თუშურაშვილი.

მონაწილეთა შერჩევის კონკურსი 2020 წლის 24 ივნისიდან - 4 ივლისამდე მიმდინარეობდა, რომლის შედეგად IDFI-მ სულ 100 განაცხადი მიიღო. მონაწილეთა შერჩევის კრიტერიუმებს შორის იყო მოტივაცია და მიღებული ცოდნის პრაქტიკაში გამოყენების დასაბუთება. ტრენინგის ბოლოს მონაწილეებს გადაეცათ სერტიფიკატები.