ინფორმაციის თავისუფლების განვითარების ინსტიტუტმა (IDFI) საქართველოს პარლამენტს „პროკურატურის შესახებ“ ორგანული კანონის პროექტთან დაკავშირებით მოსაზრებები წარუდგინა. კანონის პროექტი და მასთან დაკავშირებული საკანონმდებლო აქტების პროექტები პარლამენტში 2018 წლის 20 სექტემბერს დარეგისტრირდა.

„პროკურატურის შესახებ“ საქართველოს ორგანული კანონის პროექტში ასახული საკითხები საქართველოს კონსტიტუციასთან კანონმდებლობის ჰარმონიზაციის პროცესს უკავშირდება. საქართველოს კონსტიტუციის ახალი რედაქცია ძალაში ახლადარჩეული პრეზიდენტის მიერ ფიცის დადებისთანავე შევა. კონსტიტუციის ახალი რედაქციით საქართველოს პროკურატურა დამოუკიდებელ უწყებად ჩამოყალიბდება, ხოლო საპროკურორო საბჭო კონსტიტუციურ ორგანოდ, რომლის ფუნქცია პროკურატურის დამოუკიდებლობის გამჭვირვალობისა და ეფექტიანობის უზრუნველყოფა იქნება.

საქართველოს პროკურატურის დამოუკიდებელ უწყებად ჩამოყალიბება წლების განმავლობაში არაერთი საერთაშორისო თუ ადგილობრივი ორგანიზაციის რეკომენდაცია იყო. IDFI-ის მოსაზრებით, ამ პროცესის მნიშვნელობა საკანონმდებლო დონეზე უნდა იყოს გამყარებული. კერძოდ, “პროკურატურის შესახებ“ ორგანულ კანონში განსახორციელებელი ცვლილებები უნდა გამოხატავდეს ხელისუფლების სურვილს ძირეული რეფორმა გაატაროს პროკურატურის სისტემაში. ტექნიკური ცვლილებები კანონში დააკნინებს ამ პროცესის მნიშვნელობას და შესაძლოა პროკურატურის დამოუკიდებელ, ნეიტრალურ და ანგარიშვალდებულ უწყებად ჩამოყალიბების პროცესი მნიშვნელოვნად შეაფერხოს. აღნიშნულის თავიდან ასაცილებლად კი საჭიროა ინიცირებული კანონის პროექტის შემდგომი დახვეწა.

კანონის პროექტის დახვეწისთვის IDFI ქვემოთ მოცემულ მოსაზრებებს სთავაზობს საქართველოს პარლამენტს.

IDFI-ის მოსაზრებები „პროკურატურის შესახებ“ ორგანული კანონის პროექტთან დაკავშირებით

/public/upload/IDFI_Photos_2018/PrIME_Project_EU/opinion_on_draft_law_PSG_geo.PDF