2021 წლის 5-9 ივლისს ინფორმაციის თავისუფლების განვითარების ინსტიტუტმა (IDFI) უმასპინძლა დელეგაციას ცენტრალური აზიის ქვეყნებიდან, კერძოდ, ყაზახეთიდან, უზბეკეთიდან და ტაჯიკეთიდან. სასწავლო ვიზიტი ორგანიზებული იყო ევრაზიის ფონდის (Eurasia Foundation) მიერ ცენტრალურ აზიაში სამოქალაქო საზოგადოების მხარდაჭერის პროგრამის ფარგლებში. პროგრამის ფინანსური მხარდამჭერია აშშ-ს საერთაშორისო განვითარების სააგენტო (USAID).

სასწავლო ვიზიტის მიზანი იყო დაინტერესებული მხარეები გაცნობოდნენ საქართველოს გამოცდილებას ღიაობისა და გამჭვირვალობის მიმართულებით, განსაკუთრებით ღია ბიუჯეტირებასა და საჯარო ფინანსების გამჭვირვალედ მართვასთან დაკავშირებით. სასწავლო ვიზიტის მონაწილეებს აინტერესებდათ საქართველოს გამოცდილება ღია მმართველობის პარტნიორობაში (OGP) ჩართულობასთან და ღია ბიუჯეტის ინდექსში (Open Budget Survey)მეხუთე პოზიციის დაკავებასთან დაკავშირებით.

ინფორმაციის თავისუფლების განვითარების ინსტიტუტმა (IDFI) სასწავლო ვიზიტის მონაწილეებისათვის შეადგინა ხუთ დღეზე გადანაწილებული დღის წესრიგი. სასწავლო ვიზიტის მონაწილეებს შეხვედრები ჰქონდათ როგორც სამოქალაქო საზოგადოების, ასევე, სახელმწიფო ორგანიზაციების წარმომადგენლებთან, მათ შორის: საქართველოს მთავრობის ადმინისტრაციასთან, სახელმწიფო აუდიტის სამსახურთან, საქართველოს პარლამენტის საბიუჯეტო ოფისთან, საქართველოს პარლამენტის საფინანსო უზრუნველყოფის დეპარტამენტთან, სამოქალაქო საზოგადოების ინსტიტუტთან, საერთაშორისო გამჭვირვალობა-საქართველოს და USAID-ის დემოკრატიული მმართველობის ინიციატივის (GGI)წარმომადგენლებთან. ამავდროულად, სასწავლო ვიზიტის მონაწილეები ეწვივნენ საქართველოს ფინანსთა სამინისტროს, სახელმწიფო შესყიდვების სააგენტოს, რუსთავის მუნიციპალიტეტის მერიას და რუსთავის იუსტიციის სახლს.

ინფორმაციის თავისუფლების განვითარების ინსტიტუტი (IDFI)მომავალშიც გეგმავს ანალოგიური სასწავლო ვიზიტების მასპინძლობას, და აღმოსავლეთ ევროპის და ცენტრალური აზიის რეგიონის ქვეყნებში არსებული სამოქალაქო საზოგადოების წარმომადგენლების მხარდაჭერას და მათთვის ღიაობის და გამჭვირვალობის მიმართულებით ცოდნის გაზიარებას.