25 თებერვალს ტელეკომპანია მე-9 არხმა გაავრცელა სიუჟეტი სახელწოდებით “ყოველთვიური პრემიები”, სადაც აღნიშნული იყო შემდეგი: "არასამთავრობო ორგანიზაცია ,,ინფორმაციის თავისუფლების განვითარების ინსტიტუტი" სკანდალურ ინფორმაციას ავრცელებს. გაგა მკურნალაძე, დავით ჭაკუა, გიორგი ავსაჯანიშვილი-ეს იმ პირთა არასრული ჩამონათვალია, რომლებიც თვის ბოლოს გაორმაგებული ან გაოთხმაგებული ხელფასის ოდენობის პრემიებს იღებდნენ. თანხა ექს-მინისტრ კალმახელიძის პირადი გადაწყვეტილებით გაიცემოდა." თავად სიუჟეტს ჰედლაინად გასდევდა შემდეგი წარწერა: "წამებაში ბრალდებული პირები ყოველთვიურად 5 ათას ლარამდე პრემიას იღებდნენ".

გვინდა კიდევ ერთხელ აღვნიშნოთ, რომ ინსტიტუტმა ინფორმაცია მიიღო და გამოაქვეყნა მხოლოდ სასჯელაღსრულების დეპარტამენტის ყოფილ ხელმძღვანელზე დავით ჭაკუაზე. რაც შეეხება სიუჟეტში ჩამოთვლილ სხვა პირებს, მათ შესახებ ინფორმაცია არ იქნა მოწოდებული სასჯელაღსრულების დეპარტამენტის მიერ, რასთან დაკავშირებითაც ჩვენს მიერ მომზადებული იქნა შესაბამისი სტატია: "წამებაში ეჭვმიტანილ პირთა პრემიები" აღნიშნულის შესახებ ინფორმაცია განმარტებული იქნა IDFI-ის თავჯდომარის მიერ მე-9 არხისთვის მიცემულ ინტერვიუში, ისევე როგორც თავად სასჯელაღსრულების დეპარტამენტის ოფიციალური წარმომადგენლის ინტერვიუში. სამწუხაროდ მე-9 არხმა ჩვენი განმარტება სიუჟეტში სრულყოფილად არ ასახა. 

შესაბამისად, ტელეკომპანია მე-9 არხის მიერ გავრცელებული ინფორმაცია მხოლოდ ნაწილობრივ შეესაბამება სინამდვილეს და არ ასახავს „ინფორმაციის თავისუფლების განვითარების ინსტიტუტის" (IDFI) მიერ მომზადებული სტატიის შინაარს. ინსტიტუტი (IDFI) მოუწოდებს ტელეკომპანია მე-9 არხს პროფესიული სტანდარტების გათვალისწინებით მიუდგნენ საკუთარ ჟურნალისტური მოვალეობების შესრულებას და ინფორმაციის არასწორი ინტერპრეტაციით შეცდომაში არ შეიყვანონ საკუთარი მაყურებელი.