რუსეთის საოკუპაციო ჯარების მიერ დაკავებული საქართველოს მოქალაქეები 2009-2015

სიახლეები | კარგი მმართველობა | პუბლიკაციები | ანალიზი 21 იანვარი 2016

2015 წლის 18 მაისს IDFI-იმ გამოაქვეყნა საქართველოს შინაგან საქმეთა სამინისტროდან მიღებული სტატისტიკური მონაცემები, რომლის მიხედვითაც 2015 წლის იანვარი-მარტის პერიოდში აფხაზეთის მიმართულებაზე ოკუპაციის ხაზის დარღვევისათვის დაკავებული იყო 116, ხოლო ცხინვალის რეგიონის მიმართულებაზე - 23 საქართველოს მოქალაქე. 2015 წლის მიწურულს მედიაში გავრცელებული ცნობების მიხედვით, კვლავ გახშირდა რუსეთის საოკუპაციო ჯარების მიერ საოკუპაციო ხაზის გადაკვეთის წესების დარღვევისათვის საქართველოს მოქალაქეების დაკავების შემთხვევები (მაგ.:29.12.2015 - სოფელ ნაბაკევში საოკუპაციო ხაზთან დაკავებულია 20-მდე ქართველი, 04.12.2015 - გორის რაიონში დავით კუდუხაშვილი საკუთარ ბაღში დააკავეს, 25.11.2015 - გატაცება სოფელ ახალუბნიდან - რუსმა ოკუპანტებმა კიდევ ერთი ქართველი გაიტაცეს, 19.11.2015 - გორის რაიონის სოფელ ქერედან მამა-შვილი გაიტაცეს, 18.11.2015 - რუსმა ოკუპანტებმა სოფელ კნოლევში საქართველოს მოქალაქე დააკავეს, 17.10.2015 - ქარელის რაიონიდან რამდენიმე საათის წინ ორი ახალგაზრდა გაიტაცეს).

შესაბამისად, 2016 წლის 6 იანვარს IDFI-იმ მიმართა საქართველოს შინაგან საქმეთა სამინისტროს და მოითხოვა 2015 წლის სრული მონაცემები. სამინისტრომ ინსტიტუტის განცხადება სახელმწიფო უსაფრთხოების სამსახურში გადაამისამართა. აღსანიშნავია ის ფაქტი, რომ სახელმწიფო უსაფრთხოების სამსახურიდან IDFI-ის დაუყოვნებლივ ეცნობა პასუხი და მოწოდებული იქნა მოთხოვნილი მონაცემები, რომლის მიხედვითაც 2015 წელს ოკუპირებული აფხაზეთის რეგიონის მიმართულებით ე.წ. საზღვრის უკანონო კვეთის ბრალდებით დაკავებულია 341 საქართველოს მოქალაქე, ხოლო ოკუპირებული ცხინვალის რეგიონის მიმართულებით - 162 საქართველოს მოქალაქე (შესაბამისად, 2015 წლის აპრილის შემდგომ, 9 თვის განმავლობაში, აფხაზეთის მიმართულებაზე დაკავებული იქნა 225 პირი, ხოლო ცხინვალის მიმართულებაზე - 139 პირი).

 

სახელმწიფო უსაფრთხოების სამსახურიდან მოწოდებული 2015 წლის მონაცემების გათვალისწინებით, 2009-2015 წლებში საოკუპაციო ჯარის მიერ ე.წ. „საზღვრის უკანონო“ გადაკვეთის ბრალდებით სულ დაკავებულია 2 481 საქართველოს მოქალაქე, რომელთაგან 1 641 პირი დაკავებულია აფხაზეთის, ხოლო 840 პირი კი ცხინვალის რეგიონის საოკუპაციო ზოლის გადაკვეთისათვის.

სტატისტიკიდან ასევე ჩანს, რომ 2013 წლიდან მნიშვნელოვნად გაზრდილია რუსეთის ფედერაციის საოკუპაციო ჯარების მიერ საოკუპაციო ხაზის გადაკვეთის დარღვევისათვის საქართველოს მოქალაქეების დაკავების შემთხვევები. 2013 წელს 2012 წელთან შედარებით აღნიშნული შემთხვევები თითქმის გაორმაგდა და საოკუპაციო ჯარების მიერ ჯამში დაკავებული იქნა 553 პირი, 2014 წელს - 512 პირი, ხოლო 2015 წელს - 503 პირი.

 

2009-2015 წლების განმავლობაში აფხაზეთის მიმართულებით საზღვრის გადაკვეთის გამო დაახლოებით ორჯერ მეტი პირი იქნა დაკავებული, ვიდრე ცხინვალის რეგიონის მიმართულებით. აფხაზეთის ე.წ. „საზღვრის უკანონო“ გადაკვეთის გამო დაკავებული პირების რეკორდულ რაოდენობას 2013 წელს მიაღწია, როდესაც დაკავებული იქნა 411 საქართველოს მოქალაქე.

 

აღსანიშნავია ის ფაქტიც, რომ აფხაზეთის მიმართულებისგან განსხვავებით, რუსეთის ფედერაციის საოკუპაციო ჯარების მიერ ცხინვალის რეგიონის მიმართულებით საქართველოს მოქალაქეების უკანონოდ დაკავების შემთხვევები ყოველწლიურად მატულობს და უკანონოდ დაკავებულთა ყველაზე დიდი რაოდენობა (162 პირი) სწორედ 2015 წელს დაფიქსირდა.

 

 

ზემოთ წარმოდგენილი ოფიციალური სტატისტიკური მონაცემები ცხადყოფს, რომ რუსეთის ფედერაციის საოკუპაციო ჯარების მიერ ინტენსიურად გრძელდება ოკუპირებული ტერიტორიების ე.წ. ადმინისტრციულ საზღრებთან საქართველოს მოქალაქეების უკანონოდ დაკავება როგორც აფხაზეთის, ასევე ცხინვალის რეგიონში. ამავე დროს, ცხინვალის მიმართულებით ე.წ. სასაზღვრო ზოლის ინფრასტრუქტურული გამართვისა და გაფართოების პარალელურად შეიმჩნევა დაკავებულთა რაოდენობის მატებაც.

 

სხვა მასალები ამ თემაზე
სიახლეები

მსჯელობა დამოუკიდებლობაზე - პოლიციის ანგარიშვალდებულების საკითხის წამოწევა საჩივრების დამოუკიდებელი გამოძიების გზით

24.11.2020

1944 წლის ოფიციალური დოკუმენტები საქართველოში მცხოვრები უმცირესობების გადასახლების თაობაზე

20.11.2020

Covid-19 და კონსტიტუციური კონტროლი: საქართველოს საკონსტიტუციო სასამართლოს საქმიანობის ეფექტურობის შეფასება

20.11.2020

IDFI-ის რეკომენდაციები სახელმწიფო სერვისების პოლიტიკის დოკუმენტებთან დაკავშირებით

17.11.2020
განცხადებები

კომენდანტის საათის მანიფესტაციებზე გავრცელება, უკიდურისად გაამწვავებს პოლიტიკურ კრიზისს

09.11.2020

გამოვხატავთ მზადყოფნას მედიას მატერიალური და მორალური ზიანის ანაზღაურების მიზნით გავუწიოთ უფასო იურიდიული დახმარება

09.11.2020

არასამთავრობო ორგანიზაციები 2020-ის წლის საპარლამენტო არჩევნებს აფასებენ

05.11.2020

ვითხოვთ სათანადო რეაგირებას არჩევნების დღეს ჟურნალისტთა უფლებების დარღვევის ფაქტებზე

31.10.2020
ბლოგპოსტები

დამოუკიდებელი ანტიკორუფციული სააგენტო - მაღალი დონის კორუფციასთან ბრძოლის ეფექტური საშუალება

06.11.2020

1930-იანი წლების რეპრესიების მეხსიერება - რას და რატომ ვიხსენებთ?

13.10.2020

გასაბჭოება - საბჭოური კოლექტიური მეხსიერების პირველი საფეხური

13.10.2020

კიბერშეტევა ჯანდაცვის სამინისტროზე და რუსული კვალი

03.09.2020