ინფორმაციის თავისუფლების განვითარების ინსტიტუტისა (IDFI) და ილიას სახელმწიფო უნივერსიტეტის თანამშრომლობის საფუძველზე, უკვე მერვე თვეა რაც კორუფციასთან ბრძოლის სასერტიფიკატო პროგრამა მიმდინარეობს. პროგრამა 8 მოდულისგან შედგება და მიზნად ისახავს მსმენელებს აუმაღლოს ცნობიერება და აქციოს კორუფციასთან ბრძოლის აქტიურ მონაწილეებად.
პროგრამის ფარგლებში, 13 მაისს, მამუკა ჟღენტმა ღია ლექცია ჩაატარა. მამუკა ჟღენტი ევროსაბჭოში საქართველოს ყოფილი წარმომადგენელია და ასევე, უკანონო შემოსავლის ლეგალიზაციისა და ტერორიზმის დაფინანსების აღკვეთის მიმართულებით ევროკავშირში მართლმსაჯულებისა და სამოქალაქო საზოგადოების უფროსი ექსპერტი.
ლექციის მიზანი პროგრამის მონაწილეებისათვის ფულის გათეთრებისა და ტერორიზმის დაფინანსების წინააღმდეგ ბრძოლის ძირითადი საერთაშორისო ინსტრუმენტების, სტანდარტებისა და სტრუქტურების, და აღნიშნული მიმართულებით, გლობალური პანდემიის შედეგად შექმნილი გამოწვევების შესახებ ინფორმაციის მიწოდება იყო.
ამჟამად, მიმდინარეობს პროგრამის მეექვსე მოდული „კორუფცია და პოლიტიკა“, რომელსაც კითხულობს საქართველოს ახალგაზრდა იურისტთა ასოციაციის (GYLA) თავმჯდომარე - სულხან სალაძე.
კორუფციასთან ბრძოლის სასერტიფიკატო პროგრამა დაიწყო 8 ოქტომბერს და მის დასრულებამდე დარჩენილია 2 მოდული. პროგრამის ფინანსური მხარდამჭერია ღია საზოგადოების ინსტიტუტის ბუდაპეშტის ფონდი (OSI) და ხორციელდება ღია საზოგადოების ფონდის (OSGF) თანადაფინანსებით.
სიახლეების გამოწერა
