ძირითადი იდეები, კონცეფციები, თეორიები და სოციალურ მეცნიერებათა პერსპექტივები კორუფციის შესახებ - დღეს (2019 წლის 8 ოქტომბერი) ამ მოდულით დაიწყო ინფორმაციის თავისუფლების განვითარების ინსტიტუტის (IDFI) და ილიას სახელმწიფო უნივერსიტეტის ერთობლივი კორუფციასთან ბრძოლის სასერტიფიკატო პროგრამა.

პროგრამაში მონაწილეობით 31 - სტუდენტი, საჯარო, კერძო და არასამათავრობო სექტორის წარმომადგენელი - გაიღრმავებს ცოდნას ანტიკორუფციულ თემატიკასთან დაკავშირებით და შეიძენს კორუფციის ფაქტებზე ეფექტური რეაგირების უნარ-ჩვევებს.

„მონაწილეებმა გაიარეს ურთულესი შერჩევის პროცესი. იყო შემოსული დაახლოებით 500-მდე განაცხადი, საიდანაც შეირჩნენ როგორც უმაღლესი საგანმანათლებლო დაწესებულების სტუდენტები, ასევე, საჯარო სამსახურისა და კერძო სექტორის წარმომადგენლები. პროგრამის გავლის შედეგად მონაწილეები არა მხოლოდ გაიღრმავებენ ცოდნას, არამედ შეეძლებათ გახდნენ კორუფციასთან ბრძოლის აქტიური მონაწილეები“, - აღნიშნა IDFI-ის აღმასრულებელმა დირექტორმა გიორგი კლდიაშვილმა. 

"კორუფციასთან მებრძოლთა საგანმანათლებლო სასერტიფიკატო პროგრამის შემუშავებაპროექტის" მენეჯერი დავით მაისურაძე: "პროგრამა შედგება 8 მოდულისგან და გაგრძელდება 1 წლის განმავლობაში. სხვა თემატიკასთან ერთად, მონაწილეები შეისწავლიან ისეთ საკითხებს როგორიცაა: კორუფციისთან ბრძოლის სამართლებრივი მხარე, კარგი მმართველობა, კორუფცია და პოლიტიკა, კორუფციის ჟურნალისტური გამოძიება და როგორ მიაღწიეს წარმატებას კორფუციასთან ბრძოლის კუთხით სხვადასხვა ქვეყნებში. სწავლა წარიმართება ინტერაქტიულ რეჟიმში და მოიცავს თეორიისა და პრაქტიკის ნაზავს. მონაწილეები  იმუშავებენ პრაქტიკულ შემთხვევებზე, მონაწილეობას მიიღებენ საკითხების განხილვებში და მოამზადებენ ესეებს.“

პროგრამის ფინანსური მხარდამჭერია ღია საზოგადოების ინსტიტუტის ბუდაპეშტის ფონდი (OSI) და ხორციელდება ღია საზოგადოების ფონდის (OSGF) თანადაფინანსებით.