ინფორმაციის თავისუფლების განვითარების ინსტიტუტი (IDFI) აქტიურად განაგრძობს მუშაობას სხვადასხვა მუნიციპალიტეტის მერიისთვის გამჭვირვალობისა და კეთილსინდისიერების სტრატეგიისა და სამოქმედო გეგმის შემუშავების მიზნით.

16-17 ივნისს IDFI-ის გუნდმა USAID/Georgia-ს, GGI Georgia-ს, ლაგოდეხისა და თელავის მუნიციპალიტეტების მერიების წარმომადგენლებთან ერთად ონლაინ შეხვედრა გამართა.

შეხვედრის ფარგლებში განიხილეს ლაგოდეხისა და თელავის მუნიციპალიტეტების მერიების გამჭვირვალობისა და კეთილსინდისიერების სიტუაციური ანალიზების ძირითადი მიგნებები და გამოწვევების საპასუხოდ შემუშავებული რეკომენდაციები.

სიტუაციური ანალიზის მომზადება წარმოადგენს ლაგოდეხის/თელავის მუნიციპალიტეტის მერიის გამჭვირვალობისა და კეთილსინდისიერების სტრატეგიისა და სამოქმედო გეგმის შემუშავების წინარე ეტაპს. აღნიშნული სტრატეგიული დოკუმენტების შემუშავება ხდება USAID/GGI-ის მიერ დაფინანსებული პროექტის „თელავისა და ლაგოდეხის მუნიციპალიტეტების მერიებისთვის გამჭვირვალობის და კეთილსინდისიერების სტრატეგიისა და სამოქმედო გეგმის შემუშავება“ ფარგლებში.

პროექტის ძირითადი მიზანია გააძლიეროს თელავისა და ლაგოდეხის მერიების შესაძლებლობები ადგილობრივ დონეზე კორუფციის წინააღმდეგ ბრძოლის თვალსაზრისით.პროექტის კონკრეტულ მიზანს კი წარმოადგენს თელავისა და ლაგოდეხის მერიების მხარდაჭერა შემდეგი მიმართულებით:

1) გამჭვირვალობის და კეთილსინდისიერების სტრატეგიის და შესაბამისი სამოქმედო გეგმის შემუშავება და მონიტორინგის მექანიზმების შექმნა; 

2) კეთილსინდისიერებასა და გამჭვირვალობაზე მერიების თანამშრომლებისთვის ცნობიერების ამაღლების აქტივობების ორგანიზება, რათა მათ წარმატებულად შეძლონ ანტიკორუფციული ზომების პრაქტიკაში დანერგვა.