ინფორმაციის თავისუფლების განვითარების ინსტიტუტისა (IDFI) და ილიას სახელმწიფო უნივერსიტეტის თანამშრომლობით, უკვე მეექვსე თვეა, რაც კორუფციასთან ბრძოლის სასერტიფიკატო პროგრამა ხორციელდება.

17 მარტს, კორუფციასთან ბრძოლის საგანმანართლებლო პროგრამის მეხუთე მოდული „ელექტრონული მმართველობა კორუფციასთან ბრძოლაში“ დაიწყო.

მსოფლიოში გამოცხადებული პანდემიისა და მსოფლიო ჯანდაცვის ორგანიზაციის რეკომენდაციის გათვალისწინებით, კორუფციასთან ბრძოლის საგანმანათლებლო პროგრამა დისტანციურ რეჟიმში გრძელდება. მოდულის ლექტორები შექმნიან ვიდეო ფაილებს და გაუზიარებენ კურსის მსმენელებს ლექციებისთვის მომზადებულ პრეზენტაციებსა და დავალებებთან ერთად.

მეხუთე მოდულს მონაცემთა გაცვლის სააგენტოს იურიდიული სამმართველოს უფროსი ნატალია გოდერძიშვილი წაიკითხავს. მოდულის მიზანია კურსის მსმენელებს შეასწავლოს ისეთი საკითხები როგორიცაა კავშირი კარგ მმართველობასა და ელექტრონულ მმართველობას შორის, სახელმწიფო სერვისების ელექტრონულად მიწოდების მნიშვნელობა, საზოგადოებრივი ინიციატივების წარდგენის შესაძლებლობები, და საჯარო მმართველობის პროცესში საზოგადოების მონაწილეობა ელექტრონული პლატფორმებისა და ონლაინ საშუალებების გამოყენებით.

კორფუციასთან ბრძოლის სასერტიფიკატო პროგრამა დაიწყო 2019 წლის 8 ოქტომბერს და მის დასრულებამდე დარჩენილია 4 მოდული. პროგრამის ფინანსური მხარდამჭერია ღია საზოგადოების ინსტიტუტის ბუდაპეშტის ფონდი (OSI) და ხორციელდება ღია საზოგადოების ფონდის (OSGF) თანადაფინანსებით.