2022 წლის 22 ივლისს, IDFI-მ და ილიას სახელმწიფო უნივერსიტეტმა კორუფციასთან მებრძოლთა სასერტიფიკატო პროგრამის კურსდამთავრებულები დააჯილდოვა. დაჯილდოების ღონისძიებაში მონაწილეობა მიიღეს ილიას სახელმწიფო უნივერსიტეტის რექტორმა - ნინო დობორჯგინიძემ და ინფორმაციის თავისუფლების განვითარების ინსტიტუტის (IDFI) აღმასრულებელმა დირექტორმა - გიორგი კლდიაშვილმა.

2021-2022 სასწავლო წელს, სულ კონკურსის შედეგად შეირჩა პროგრამის 46 მონაწილე (აქედან, პროგრამა სრულად გაიარა 23-მა მონაწილემ). გარდა კონკურსის შედეგად შერჩეული მონაწილეებისა, აღსანიშნავია, რომ ჯამურად ილიას სახელმწიფო უნივერსიტეტის 48 სტუდენტმა დაასრულა კორუფციასთან მებრძოლთა პროგრამის ერთი საგანი მაინც. ასევე, ილიაუნის 6-მა სტუდენტმა პროგრამა სრულად გაიარა. სულ, 2022 წელს, კორუფციასთან მებრძოლთა პროგრამა 29 მონაწილემ დაასრულა. აღნიშნული 29 მონაწილიდან 17 არის ქალი.

კორუფციასთან მებრძოლთა პროგრამა მონაწილეების სთავაზობს ისეთი საგნების არჩევანს როგორიცაა: კორუფცია და კარგი მმართველობა, კორუფცია და პოლიტიკა, ანტიკორუფციული პოლიტიკის მართვა საჯარო და კერძო დაწესებულებებში და კორუფციასთან ბრძოლა - საერთაშორისო აქტორები, ანტიკორუფციული პლატფორმები. საგნების ლექტორებად მოწვეულები არიან სფეროს გამორჩეული სპეციალისტები.

კორუფციასთან მებრძოლთა სასერტიფიკატო პროგრამა სამი წელია რაც მიმდინარეობს და ხორციელდება ინფორმაციის თავისუფლების განვითარების ინსტიტუტისა და ილიას სახელმწიფო უნივერსიტეტის თანამშრომლობით. ყოველი აკადემიური წლის დასაწყისში, საკმაოდ მკაცრი კონკურსის საფუძველზე, ირჩევა დაახლოებით 40-45 მონაწილე საჯარო მოხელეებისგან, არასამთავრობო და კერძო სექტორის წარმომადგენლებისგან და უმაღლესი საგანმანათლებლო დაწესებულებები სტუდენტებისგან. პროგრამის მონაწილეები, ილიას სახელმწიფო უნივერსიტეტის ბაკალავრიატისა და მაგისტრატურის სტუდენტებთან ერთად, გადიან კორუფციასთან ბრძოლის სასერტიფიკატო პროგრამის საგნებს, რომლებიც ილიას სახელმწიფო უნივერსიტეტის მეცნიერებათა და ხელოვნების ფაკულტეტის კურიკულუმის ნაწილია. თავის მხრივ, ეს შესაძლებლობას აძლევს ილიას უნივერსიტეტის სტუდენტებს მიიღონ, როგორც პროგრამის დასრულების სერტიფიკატი, ასევე, სასწავლო კრედიტებიც.

აღსანიშნავია, რომ გარდა სალექციო კურსებისა, პროგრამის მონაწილეებს აქვთ შესაძლებლობა მონაწილეობა მიიღონ სხვადასხვა დამატებით აქტივობებში, მაგალითად, დაესწრონ IDFI-ს მიერ ორგანიზებულ ტრენინგებსა და სამუშაო შეხვედრებს, მონაწილეობა მიიღონ საერთაშორისო გაცვლით პროგრამებში და დაამყარონ კონტაქტები როგორც ადგილობრივ, ასევე, საერთაშორისო დონეზე.

კორუფციასთან მებრძოლთა სასერტიფიკატო პროგრამა იძლევა უნიკალურ შესაძლებლობას საჯარო, კერძო და არასამთავრობო სექტორებში დასაქმებული პირებისა და სტუდენტებისთვის ჩამოყალიბდნენ კორუფციასთან მებრძოლ ექსპერტებად, მიიღონ თეორიული და პრაქტიკული ცოდნა, გაიზიარონ სხვა ქვეყნების გამოცდილება და ხელი შეუწყონ სხვადასხვა დონეზე კორუფციის დამარცხებას საქართველოში.

პროგრამას ფინანსურ მხარდაჭერას უწევს ღია საზოგადოების მხარდაჭერის ფონდი პროექტის „მდგრადი ადამიანური რესურსების განვითარება კორუფციასთან საბრძოლველად“ ფარგლებში და შვედეთის საერთაშორისო განვითარების თანამშრომლობის სააგენტო (Sida) პროექტის „ორგანიზაციული მხარდაჭერა“ ფარგლებში.