2022 წლის 31 მარტს, კორუფციასთან ბრძოლის სასერტიფიკატო პროგრამის ფარგლებში, გაიმართა ანალიტიკური სტატიების კონკურსის - მამხილებლები კორუფციის წინააღმდეგ - გამარჯვებულთა დაჯილდოება. კერძოდ, გამოგზავნილი სტატიების შეფასების საფუძველზე პირველ ადგილზე გავიდა მონაწილეთა ჯგუფი შემდეგი შემადგენლობით: ლია აბლოთია, კობა აბლოთია და ეკატერინე დემეტრაშვილი. მეორე ადგილზე გავიდა ჯგუფი - ნინო ტაგანაშვილისა და მარიტა გორგილაძის მონაწილეობით, ხოლო მესამე ადგილი დაიკავა ჯგუფმა - მერი მაჭარაშვილისა და თინათინ ღვინიანიძის მონაწილეობით. 

“ინფორმაციის თავისუფლების განვითარების ინსტიტუტმა“ (IDFI) 2021 წლის დეკემბერში გამოაცხადა ანალიტიკური სტატიების კონკურსი თემაზე „მამხილებლები კორუფციის წინააღმდეგ“. კონკურსის მიზანი იყო საჯარო მონაცემების დამუშავებისა და გამოყენების გზით საჯარო დაწესებულებებში მამხილებლების ქმედებების წახალისება კორუფციის რისკების პრევენციის მიზნით. კონკურსში მონაწილეობის მიღების შესაძლებლობა ჰქონდათ არანაკლებ ორი ან მეტი ადამიანისგან შემდგარ პირთა ჯგუფებს. სულ კონკურსში, მონაწილეთა ჯგუფების მიერ, გამოიგზავნა 13 სტატია. კონკურსში ჯამურად მონაწილეობდა 28 მონაწილე.

კორუფციასთან ბრძოლის სასერტიფიკატო პროგრამის განხორციელება „ინფორმაციის თავისუფლების განვითარების ინსტიტუტმა“ (IDFI) 2019 წლიდან დაიწყო ილიას სახელმწიფო უნივერსიტეტთან თანამშრომლობით. პროგრამას ფინანსურ მხარდაჭერას უწევს ღია საზოგადოების მხარდაჭერის ფონდი პროექტის „მდგრადი ადამიანური რესურსების განვითარება კორუფციასთან საბრძოლველად“ ფარგლებში.