2013 წლის 14 მაისს სახელმწიფო შესყიდვებთან დაკავშირებული დავების საბჭოს ორი ახალი წევრი იქნა არჩეული - უჩა სეთური (IDFI ინფორმაციის თავისუფლების განვითარების ინსტიტუტი) და გიორგი კოტრიკაძე (ნავთობპროდუქტების იმპორტიორთა და რეალიზატორთა ასოციაციის გამგეობის თავმჯდომარე).

შერჩევის პროცედურები 2013 წლის 11 აპრილს დაიწყო. საკუთარი კანდიდატურა შვიდმა არასამთავრობო ორგანიზაციამ წარმოადგინა:

1.      ეკონომიკური პოლიტიკის ინსტიტუტი;
2.      ნავთობპროდუქტების იმპორტიორთა და რეალიზატორთა უფლებების დაცვის ასოციაცია;
3.      ინფორმაციის თავისუფლების განვითარების ინსტიტუტი;
4.      საქართველოს მეწარმეთა კონფედერაცია;
5.      JTI Caucasus LLC;
6.      ნავთობკომპანიების ქართული ასოციაცია;
7.      ახალგაზრდა ფინანსისტთა და ბიზნესმენთა ასოციაცია.

შერჩევაში მონაწილეობა მიიღო რამდენიმე არასამთავრობო ორგანიზაციამ, მათ შორის საერთაშორისო გამჭვირვალობა - საქართველომ, ბიზნეს ასოციაციამ,  საქართველოს ახალგაზრდა იურისტთა ასოციაციამ და მედიის წარმომადგენლებმა. არასამთავრობო სექტორის წარმომადგენლების მიერ ხმათა უმრავლესობით დავების საბჭოს წევრად, ერთი წლის ვადით არჩეულ იქნა ორი წევრი.

საბჭოს შემადგენლობა კანონმდებლობის თანახმად განისაზღვრება ექვსი წევრით. საბჭოს შემადგენლობაში პარიტეტული პრინციპით შედიან სააგენტოსა და არასამთავრობო სექტორის წარმომადგენლები.

შესყიდვებთან დაკავშირებული დავების განხილვის საბჭოს საქმიანობა ვრცელდება გამარტივებული ელექტრონული ტენდერისა და ელექტრონული ტენდერის მეშვეობით სახელმწიფო შესყიდვების განხორციელების პროცედურებთან დაკავშირებულ დავებზე. შესყიდვებთან დაკავშირებული დავების განხილვის მიზანი მათი სწრაფად და სამართლიანად გადაწყვეტაა.