2024 წლის21 ივნისს,ინფორმაციის თავისუფლების განვითარების ინსტიტუტმა (IDFI) რეგიონული სამოქალაქო საზოგადოებისა და მედია ორგანიზაციების წარმომადგენლების მონაწილეობით გამართა ონლაინ სამუშაო შეხვედრა ქვეყანაში არსებული ციფრული საფრთხეებისა და ციფრული უფლებების დაცვის საკითხებზე.

შეხვედრის მიზანი გახლდათ, გამოგვევლინა რა მთავარ ციფრულ საფრთხეებს აწყდებიან ან საჭიროებები აქვთ განსაკუთრებით რეგიონულ სამოქალაქო საზოგადოებისა და მედია ორგანიზაციების წარმომადგნელებს ონლაინ სივრცეში მათი ანგარიშების, მოწყობილობების, პერსონალური მონაცემების უსაფრთხოების, ასევე, ონლაინ გამოხატვის თავისუფლების კუთხით.

შეხვედრის დასაწყისში IDFI-ის წარმომადგენელმა მოკლედ მიმოიხილა ქვეყანაში ციფრული უფლებების დაცვის კუთხით არსებული ვითარება, ასევე, მონაწილეებს გაუზიარა ინფორმაცია ბოლო წლებში IDFI-ის მიერ ციფრული უფლებების დაცვის კუთხით მომზადებული სხვადასხვა ანგარიშის, ანალიზისა და რეკომენდაციების შესახებ. ამის შემდეგ, მონაწილეებს ჰქონდათ საშუალება წამოეჭრათ მათთვის აქტუალური პრობლემები და გამოეხატათ მოსაზრებები ციფრული უფლებების დაცვის კუთხით არსებული მთავარი გამოწვევების შესახებ. 

საგულისხმოა, რომ შეხვედრაზე დასახელებული საჭიროებები გათვალისწინებულ იქნება  სამოქალაქო საზოგადოებისა და მედია ორგანიზაციების წარმომადგენლებისთვის დაგეგემილი ონლაინ ტრენინგების საბოლოო დღის წესრიგის შექმნისას.