ინფორმაციის თავისუფლების განვითარების ინსტიტუტმა აჭარის უმაღლესი საბჭოს საზედამხედველო საქმიანობაში საზოგადოების მონაწილეობის მხარდასაჭერად მორიგი ტრენინგი გამართა. ტრენინგის თემა ამჯერად თემატურ მოკვლევას შეეხებოდა და ჩატარდა სამოქალაქო საზოგადოების წარმომადგენლებისა და აჭარის უმაღლესი საბჭოს თანამშრომლებისათვის.

ტრენინგი მოიცავდა საკითხის შესახებ როგორც თეორიულ, ისე პრაქტიკულ ნაწილს. მონაწილეები გაეცნენ თემატური მოკვლევის მნიშვნელობას, მისი დაგეგმვისა და განხორციელების პროცესს და სტადიებს, როგორ უნდა ჩაერთოს მესამე მხარე თემატური მოკვლევის პროცესში და რა ფორმით უნდა გაიგზავნოს კითხვებზე პასუხი.

თემატური მოკვლევა ახალი საზედამხედველო ინსტრუმენტია უმაღლესი საბჭოსთვის და მისი დანერგვა გათვალისწინებულია უმაღლესი საბჭოს ღია მმართველობის 2022-2024 წლების სამოქმედო გეგმაში. ტრენინგის მიზანს წარმოადგენდა ახალი საზედამხედველო მექანიზმის შესახებ, როგორც უმაღლესი საბჭოსთვის, ისე სამოქალაქო საზოგადოებისთვის ინფორმაციის მიწოდება და ცნობიერების ამაღლება თემატური მოკვლევის პრაქტიკაში განხორციელების პროცესზე.

ტრენინგს უძღვებოდა კახაბერ ურიადმყოფელი, პროფესორი და კონსულტანტი საპარლამენტო საკითხებში.

ტრენინგი გაიმართა ევროკავშირისა (EU) და გაეროს განვითარების პროგრამის (UNDP) მხარდაჭერით პროექტის - „საპარლამენტო დემოკრატიის კონსოლიდაცია საქართველოში“ ფარგლებში, გაეროს განვითარების პროგრამისა (UNDP) და ინფორმაციის თავისუფლების განვითარების ინსტიტუტის (IDFI) ორგანიზებით.