2023 წლის 20 და 21 აპრილს, ინფორმაციის თავისუფლების განვითარების ინსტიტუტმა (IDFI) ადგილობრივი შემფასებლებისთვის ადგილობრივი თვითმმართველობის ინდექსის (LSG Index) შესახებ ორდღიანი ტრენინგი ჩაატარა.

ადგილობრივი თვითმმართველობის ინდექსი წარმოადგენს საქართველოს მუნიციპალიტეტების შეფასების ინსტრუმენტს, რომელიც განსაზღვრული კრიტერიუმებით აფასებს მუნიციპალიტეტში ღიაობისა და გამჭირვალობის, საჯარო ინფორმაციის პროაქტიული გამოქვეყნების, ელექტრონული მმართველობის, მოქალაქეთა მონაწილეობის ხელშეწყობისა და ანგარიშვალდებულების ხარისხს.

ინდექსის მიზანია საქართველოში ხელი შეუწყოს გამჭვირვალე და ანგარიშვალდებული ადგილობრივი თვითმმართველობის ჩამოყალიბებას.

ტრენინგი მიზნად ისახავდა პარტნიორი რეგიონული ორგანიზაციების წარმომადგნელებისთვის ინდექსის შეფასების მეთოდოლოგიის გაცნობას. მომავალში მათ ამ მეთოდოლოგიით მუნიციპალიტეტების აღმასრულებელი და წარმომადგენლობითი ორგანოები უნდა შეაფასონ. ადგილობრივი მუნიციპალიტეტების შეფასება ამა წლის 1 მაისიდან იწყება.

ტრენინგის მონაწილეებმა მიიღეს მუნიციპალიტეტების ანგარიშვალდებულებისა და გამჭვირვალობის შეფასების როგორც თეორიული ცოდნა, ისე პრაქტიკული გამოცდილება. კერძოდ, ისინი დეტალურად გაეცნენ ინდექსის მეთოდოლოგიას და განიხილეს შეფასების ცალკეული გარემოებები. მონაწილეები ასევე გაეცნენ ინფორმაციის ხარისხის შეფასების ინდიკატორებსა და ინფორმაციის სანდოობის გადამოწმების საშუალებებს.

ტრენინგი წარიმართა შემფასებლებისთვის მომზადებული სპეციალური სახელმძღვანელოს მიხედვით. ინდექსის მეთოდოლოგია სამი ნაწილისგან შედგება: საჯარო ინფორმაციის პროაქტიული გამოქვეყნება, ელ-მმართველობა და მოქალაქეთა მონაწილეობა და ანგარიშვალდებულება.

ტრენინგს უძღვებოდნენ თეონა ტურაშვილი, გოგა თუშურაშვილი, თამარ ნასყიდაშვილი და კოკა კიღურაძე.

ინიციატივა ხორციელდება დანიის მთავრობის და გაეროს განვითარების პროგრამის (UNDP) ხელშეწყობით.