2021 წლის 3 აგვისტოს პერსონალურ მონაცემთა დაცვის თემაზე IDFI-ისა და სახელმწიფო ინსპექტორის სამსახურის ერთობლივი საზაფხულო სკოლის გახსნითი ღონისძიება გაიმართა.

მონაწილეებს მისასალმებელი სიტყვით მიმართეს IDFI-ის აღმასრულებელმა დირექტორმა გიორგი კლდიაშვილმა, სახელმწიფო ინსპექტორმა - ლონდა თოლორაიამ და საქართველოში ნიდერლანდების ელჩმა - მაიკე ვან კოლდამმა.

„პერსონალურ მონაცემთა დაცვის რეჟიმის გაძლიერების და ამ საკითხთან დაკავშირებით საზოგადოების ცნობიერების ამაღლების საჭიროება დღითიდღე  უფრო ნათლად იკვეთება. ამას ადასტურებს ბოლო პერიოდში ქვეყანაში განვითარებული მოვლენებიც. ფარული მიყურადებისა და უკანონო ჩაწერების ფონზე, კრიტიკულად მნიშვნელოვანია, პერსონალური მონაცემების დაცვის უზრუნველყოფა. საკითხით დაინტერესებულ ჯგუფებში, განსაკუთრებით კი სტუდენტებში, პერსონალური მონაცემების დაცვის სტანდარტების შესახებ ცნობიერების ამაღლება, არსებულ გამოწვევებზე დისკუსიების გამართვა და შეხედულებების ურთიერთგაცვლა სწორედ დასახელებული მიზნის მისაღწევად გადადგმულ ნაბიჯს წარმოადგენს“ - აღნიშნა გიორგი კლდიაშვილმა.

საზაფხულო სკოლაში მონაწილეობენ საქართველოში ავტორიზებული უნივერსიტეტების სამართლის სკოლის მე-3 და მე-4 კურსის სტუდენტები, ასევე მაგისტრანტები.

სკოლის ფარგლებში მონაწილეები გაეცნობიან პერსონალურ მონაცემთა დაცვასთან დაკავშირებით აქტუალურ საკითხებს. დღის წესრიგით განსაზღვრულ აქტივობებში დაბალანსებულია თეორიული და პრაქტიკული კომპონენტები, გათვალისწინებულია ის ფუნდამენტური საკითხები, რომლებიც არსებითია მონაცემთა დაცვის მიმართულებით. 

საზაფხულო სკოლა ტარდება პროექტის „პერსონალური მონაცემების დაცვის მხარდაჭერა საქართველოში“, რომელიც დაფინანსებულია საქართველოში ნიდერლანდების სამეფოს საელჩოსა და შვედეთის საერთაშორისო განვითარების თანამშრომლობის სააგენტოს (Sida) მიერ.