ინფორმაციის თავისუფლების განვითარების ინსტიტუტი (IDFI) მიესალმება
საქართველოს პრეზიდენტის ოფიციალურ ვებ-გვერდზე ახალი პრეზიდენტის, გიორგი მარგველაშვილის შესახებ ინფორმაციის განახლებას. დღეისათვის პრეზიდენტის ადმინისტრაციის ოფიციალურ ელ-რესურსზე განთავსებულია ქვეყნის უმაღლესი პირის ბიოგრაფია, ინფორმაცია შეხვედრებისა და გამოსვლების შესახებ, მისი უფლებამოსილება და სხვა ძირითადი ცნობები.
მიუხედავად ამისა, სამწუხაროა, რომ ვებ-გვერდზე განთავსებული აღარ არის ყოფილი პრეზიდენტის, მიხეილ სააკაშვილის მუშაობის დროს გამოცემული სამართლებრივი აქტები, განცხადებები, პრეს რელიზები, გამოსვლები, მნიშვნელოვანი დოკუმენტები და მისი პრეზიდენტობის დროს მომხდარი მოვლენების შესახებ ნებისმიერ სახის ინფორმაცია.
მიგვაჩნია, რომ აუცილებელია ვებ-გვერდზე ახალი პრეზიდენტის შესახებ განახლებული ინფორმაციის განთავსებასთან ერთად, მოცემული იყოს წინა პრეზიდენტის ადმინისტრაციის საქმიანობის შესახებ ცნობები, რათა შენარჩუნებული იყოს საჯარო დაწესებულების ვებ-გვერდის ინფორმაციული მდგრადობა და გამჭვირვალობა.
პრეზიდენტის ადმინისტრაცია საზოგადოებას დაჰპირდა მიხეილ სააკაშვილის შესახებ ინფორმაციის მოგვიანებით განთავსებას ვებ-გვერდის „ისტორიის“ განყოფილებაში. იმედია გვაქვს ადმინისტრაცია უახლოეს მომავალში შეძლებს აღნიშნული დაპირების შესრულებას, რითაც ხელს შეუწყობს აღნიშნული ინსტიტუტის ისტორიული მემკვიდრეობის შენარჩუნებას.
სიახლეების გამოწერა
