თბილისში, „ფრონტლაინ ჯორჯია კლუბში“ ინფორმაციის თავისუფლების განვითარების ინსტიტუტმა (IDFI) და იუსტიციის სამინისტრომ ჟურნალისტებისათის ღია მმართველობის პარტნიორობის (OGP) შესახებ სემინარი გამართა. მას ინფორმაციის თავისუფლების განვითარების ინსტიტუტის გამგეობის თავმჯდომარე ლევან ავალიშვილი და იუსტიციის სამინისტროს „ღია მმართველობა საქართველოს“ ეროვნული კოორდინატორი ქეთევან ცანავა გაუძღვნენ.

როგორც შეხვედრაზე აღინიშნა, OGP საერთაშორისო ინიციატივაა, რომელიც 2011 წელს აშშ-ისა და ბრაზილიის პრეზიდენტების ინიციატივით დაარსდა. პარტნიორობას საქართველო იმავე წელს შეუერთდა. სახელმწიფოები მის ფარგლებში შეიმუშავებენ სამოქმედო გეგმას, იღებენ ვალდებულებებს, რაც გარკვეული პერიოდის განმავლობაში იმისათვის უნდა შეასრულონ, რომ ხელისუფლების საქმიანობის გამჭვირვალობა და საზოგადოების მიმართ ანგარიშვალდებულება გაიზარდოს.

მიმდინარე წელს საქართველომ მეორე სამოქმედო გეგმა წარადგინა. ქვეყანამ 2015 წლის ბოლომდე 27 ვალდებულება უნდა შეასრულოს. მათ შორისაა: პეტიციების ელექტრონული სისტემის შექმნა, ღია მონაცემების პორტალის (www.data.gov.ge) ამოქმედება, საჯარო სამსახურში მიღების მიუკერძოებელი წესების განსაზღვრა, კრიმინალის სტატისტიკის ინტერაქტიული რუკების შექმნა, საჯარო მოხელეთა ქონებრივი დეკლარაციების მონიტორინგის სისტემის შექმნა, ფარული მიყურადების შესახებ სტატისტიკის გამოქვეყნება და სხვა.

ლევან ავალიშვილის თქმთ, ქონებრივი დეკლარაციის წარმდგენ პირთა წრე გაიზარდა და შევსების ვალდებულება სახელმწიფო შპს-ების ხელმძღვანელებზე გავრცელდა.

ჟურნალისტებმა მიიღეს ინფორმაცია როგორც პარტნიორობის, ისე საქართველოს მიერ აღებული თითოეული ვალდებულების შესახებ. სპიკერებმა სემინარის მონაწილეებს აუხსნეს, თუ როგორ შეძლებენ ისინი სამოქმედო გეგმის შემუშავებისა და ვალდებულებების შესრულების მონიტორინგის პროცესში მონაწილეობას.

იხილეთ ბმული