დღეს, 26 იანვარს, 16:00 საათზე, ფონდში „ღია საზოგადოება საქართველო“ „ინფორმაციის თავისუფლების განვითარების ინსტიტუტის“ (IDFI) დირექტორი, გიორგი კლდიაშვილი გამართავს პრესკონფერენციას, სადაც ისაუბრებს მისი საქმის დეტალებზე და გააკეთებს რამდენიმე მნიშვნელოვან განცხადებას.

საქალაქო სასამართლოს 15 იანვრის გადაწყვეტილება, რომლის მიხედვითაც გიორგი კლდიაშვილის სისხლის სამართლის დევნა შეწყდა, ბრალდების მხარემ მისთვის მინიჭებულ ვადაში გაასაჩივრა, თუმცა სააპელაციო სასამართლომ 23 იანვარს მიიღო გადაწყვეტილება, აღნიშნული საჩივარი არ დაეკმაყოფილებინა.

შეგახსენებთ, რომ გიორგი კლდიაშვილი შსს-ს კრიმინალური პოლიციის დეპარტამენტმა 2014 წლის 12 დეკემბერს მაშინ დააკავა, როდესაც საკოლექციო იარაღი ხელოსანთან შესაკეთებლად გადაჰქონდა. იარაღი იყო დაშლილ მდგომარეობაში, იდო მანქანის საბარგულში ტყვიების გარეშე. იარაღი ეკუთვნოდა გიორგი კლდიაშვილს, თუმცა, მას არ ჰქონდა აღებული ნებართვა შსს-ს მომსახურების სააგენტოდან მისი გადატანის შესახებ. გიორგი კლდიაშვილს ბრალი სისხლის სამართლის კოდექსის 236-ე მუხლის მე-2 ნაწილით (ცეცხლსასროლი იარაღის მართლსაწინააღმდეგო ტარება) წაუყენეს.

15 იანვარს გამართულ პროცესზე საქალაქო სასამართლომ გაიზიარა დაცვის მხარის პოზიცია იმასთან დაკავშირებით, რომ პროკურატურის მტკიცებულებების ნაწილი კანონმდებლობის დარღვევით იყო მოპოვებული, საჩივარი არ დააკმაყოფილა და კლდიაშვილის მიმართ სისხლის სამართლის დევნა შეწყდა.

IDFI მიიჩნევს, რომ აუცილებელია ჩატარდეს გამოძიება და დადგინდეს თუ როგორ მოხდა ბრალდების მხარის მიერ მტკიცებულებათა მოპოვება.