პრეზენტაცია: საქართველოს ღია მონაცემების ლაბორატორია – DataLab

სიახლეები | მედია, ინტერნეტი და ინოვაციები | პუბლიკაციები | სტატია 28 თებერვალი 2018

საჯარო ინფორმაციის ღია მონაცემთა ბაზები საჯარო პოლიტიკისა და ფინანსების საკითხებზე 150-ზე მეტი ცენტრალური და ადგილობრივი სახელმწიფო დაწესებულებიდან, რომელთა გაცნობა და გამოყენება ამიერიდან საზოგადოებას ონლაინ რეჟიმში შეეძლება – 28 თებერვალს, ინფორმაციის თავისუფლების განვითარების ინსტიტუტმა (IDFI) ახალი ღია მონაცემების პლატფორმის – www.DataLab.ge პრეზენტაცია ჩაატარა.

 

ღონისძიებას საჯარო დაწესებულებების, სამოქალაქო საზოგადოების, მედიის, საერთაშორისო და დიპლომატიური კორპუსის წარმომადგენლები ესწრებოდნენ. პლატფორმა შეიქმნა ინფორმაციის თავისუფლების განვითარების ინსტიტუტის (IDFI) მიერ, ვიშეგრადის საერთაშორისო ფონდისა და ნიდერლანდების სამეფოს საგარეო საქმეთა სამინისტროს ფინანსური მხარდაჭერით.

 

ღონისძიებას გახსნეს ნიდერლანდების სამეფოს საგანგებო და სრულუფლებიანი ელჩმა საქართველოში იოჰანეს დაუმამ და ინფორმაციის თავისუფლების განვითარების ინსტიტუტის (IDFI) აღმასრულებელმა დირექტორმა გიორგი კლდიაშვილმა

 

„ეს ინიციატივა აძლიერებს საზოგადოებას, მოქალაქეს აძლევს საშუალებას კრიტიკულად დააკვირდეს მთავრობას, გადაამოწმოს ინფორმაცია და გამოიყენოს იგი საერთო სარგებლისთვის. იმედი მაქვს, ამ პლატფორმას ყველა თაობა გამოიყენებს, როგორც სტუდენტები ისე პროფესიონალები.“ - აღნიშნა ნიდერლანდების სამეფოს საგანგებო და სრულუფლებიანი ელჩმა საქართველოში იოჰანეს დაუმამ ღონისძიების გახსნით სიტყვაში.

 

IDFI-ის აღმასრულებელმა დირექტორმა გიორგი კლდიაშვილმა ყურადღება გაამახვილა ღია მონაცემების ხელმისაწვდომობის მნიშვნელობაზე სახელმწიფო უწყებების ანგარიშვალდებულების, გამჭვირვალობის და მათ საქმიანობაში მოქალაქეთა ჩართულობის გაზრდისთვის.

 

„საჯარო სექტორის მონაცემები საზოგადოებისთვის ინფორმაციის უდიდესი წყაროა. შესაბამისად, მიმაჩნია, რომ ჩვენი პლატფორმა – www.DataLab.ge, მნიშვნელოვანი წინგადადგმული ნაბიჯია ქვეყანაში ღია მონაცემთა ბაზების დამუშავების და საზოგადოებისთვის მათი ხელმისაწვდომობის თვალსაზრისით“, – აღნიშნა გიორგი კლდიაშვილმა.

 

IDFI-ის პროგრამების დირექტორი ლევან ავალიშვილი დამსწრე საზოგადოებას ესაუბრა პორტალ www.DataLab.ge-ის ფუნქციონალური და ტექნიკური შესაძლებლობების შესახებ.

 

პორტალზე განთავსებულია IDFI-ის მიერ მოპოვებული საჯარო ინფორმაციის მონაცემთა ბაზები 150-ზე მეტი ცენტრალური და ადგილობრივი სახელმწიფო დაწესებულებიდან. მონაცემთა ბაზები პორტალის მომხმარებლისთვის წარმოდგენილია ღია, დამუშავებად ფორმატში (ექსელი და CSV).

 

„მისი მეშვეობით, ნებისმიერ დაინტერესებულ ადამიანს შეუძლია გაეცნოს საჯარო ინფორმაციას, ონლაინ რეჟიმში ააგოს მონაცემთა ვიზუალიზაციები (გრაფიკული გამოსახულება), გადმოწეროს და გამოიყენოს მისთვის სასურველი ინფორმაცია შემდეგ საკითხებზე: საჯარო ადმინისტრირება, ადგილობრივი თვითმმართველობა, სოციალური საკითხები, ჯანდაცვა, დანაშაულის სტატისტიკა, განათლება, გარემო, ეკონომიკა, ფინანსები, ტრანსპორტი, და სხვა. IDFI პერიოდულად განაახლებს ინფორმაციას უწყებების და თემების მიხედვით. “ – განმარტა ლევან ავალიშვილმა.


ღონისძიების დასასრულს, IDFI-ის ელექტრონული მმართველობის მიმართულების ხელმძღვანელმა თეონა ტურაშვილმა ისაუბრა ანალიტიკური სტატიების კონკურსის პირობებისა და წარდგენილი ნამუშევრების შეფასების კრიტერიუმების შესახებ, რომელიც 2018 წლის 28 თებერვალს გაიხსნა და 15 აპრილს დასრულდება.


კონკურსის მიზანია, საზოგადოებაში ღია მონაცემების დამუშავებისა და მონაცემებზე დაყრდნობით ანალიტიკური სტატიების მომზადების წახალისება. აუცილებელი პირობაა, რომ კონკურსანტებმა სტატიის მომზადებისას ასევე გამოიყენონ www.DataLab.ge -ზე გამოქვეყნებული მონაცემთა ბაზები.

 

კონკურსის შედეგად გამოვლინდება 3 გამარჯვებული: I ადგილის მფლობელს გადაეცემა 1,600 ლარი; II ადგილს – 1,200 ლარი; ხოლო III ადგილის მფლობელი დაჯილდოვდება 900 ლარით. გარდა ამისა, საუკეთესო 3 სტატია გამოქვეყნდება IDFI-ის ვებ (www.idfi.ge) და სოციალურ (Facebook და Twitter) გვერდებზე საავტორო უფლებების დაცვით.

 

- დამატებითი ინფორმაცია კონკურსების შესახებ იხილეთ IDFI-ის ვებგვერდი: https://idfi.ge/ge/pagel/competitionview/15/   

 

- საჯარო ინფორმაციის ღია მონაცემების ფორმატში მისაღებად იხილეთ: www.DataLab.ge

სხვა მასალები ამ თემაზე
სიახლეები

ფარული მიყურადება საქართველოში - კანონმდებლობისა და პრაქტიკის ანალიზი

18.09.2020

რუსული საინფორმაციო ომი ლუგარის ლაბორატორიის წინააღმდეგ

16.09.2020

სამინისტროებსა და სსიპ-ებში ხელშეკრულებით დასაქმების პრაქტიკა

15.09.2020

საზოგადოებრივი მაუწყებლის დაფინანსება და რეიტინგი რეფორმის დაწყებიდან 3 წლის შემდეგ

09.09.2020
განცხადებები

არასამთავრობოები მოქმედი მოსამართლეების წინააღმდეგ წარმოებული სისხლის სამართლის საქმეებზე ინფორმაციის გაასაჯაროებას მოითხოვენ

11.09.2020

კოალიცია საქართველოს პარლამენტში ინიცირებულ „საერთო სასამართლოების შესახებ” საქართველოს ორგანულ კანონში შესატან ცვლილებათა კანონპროექტს ეხმიანება

08.09.2020

მოვუწოდებთ კომუნიკაციების კომისიას შეასრულოს ობიექტური და მიუკერძოებელი დამკვირვებლის როლი წინასაარჩევნო და საარჩევნო პროცესებში მედიის მონიტორინგისას

20.08.2020

შინაურ ბინადარ ცხოველთა მოვლა-პატრონობის მიმართულებით აუცილებელია ქმედითი ნაბიჯების გადადგმა

21.07.2020
ბლოგპოსტები

კიბერშეტევა ჯანდაცვის სამინისტროზე და რუსული კვალი

03.09.2020

გამჭვირვალე სახელმწიფო შესყიდვების რეიტინგში უკრაინის წამყვანი პოზიცია საშიშროების წინაშე დგას

02.09.2020

რუსული სპორტი და პოლიტიკა

13.08.2020

12 წელი 2008 წლის აგვისტოს ომიდან: რუსული დეზინფორმაცია და რეალური ფაქტები

07.08.2020