ინფორმაციის თავისუფლების განვითარების ინსტიტუტი (IDFI), USAID-ის ეკონომიკური მმართველობის პროგრამის მხარდაჭერით, ახორციელებს საინფორმაციო რეგიონულ კამპანიას საჯარო-კერძო დიალოგის ხელშეწყობის და არასამთავრობო სექტორის მუნიციპალური ბიუჯეტირების/მუნიციპალური დადგენილებების შემუშავების პროცესში ჩართულობის გაზრდის მიზნით. 

საინფორმაციო კამპანიის ფარგლებში, 2023 წლის 20 სექტემბერს, პირველი შეხვედრა გაიმართა ქ. გორში წარმოდგენილ არასამთავრობო სექტორთან. 

შეხვედრის პირველ ნაწილში მონაწილეები გაეცნენ პროექტის მიზნებს, ხარისხის შეფასების მექანიზმს და ნორმატიული აქტების შემუშავების პროცესში საჯარო-კერძო დიალოგის ხარისხის 2021-2022 წლის შეფასების შედეგებს, ასევე, განიხილეს/შეარჩიეს მუნიციპალური აქტები, რომელთა  შემუშავების პროცესშიც საჯარო-კერძო დიალოგის ხარისხის შემდეგი შეფასება უნდა განხორციელდეს.

შეხვედრის მეორე ნაწილი დაეთმო ტრენინგს - ბიუჯეტირების პროცესის თაობაზე. დამსწრე საზოგადოებამ მიიღო ინფორმაცია საბიუჯეტო ციკლის, მონაცემების ხელმისაწვდომობის,  სამოქალაქო სექტორის ჩართულობის ფორმებსა და ადგილობრივი თვითმმართველი ორგანოების როლის შესახებ.

რეგიონული საინფორმაციო კამპანიის ფარგლებში, IDFI, სექტემბერი-ოქტომბრის თვეებში, შეხვედრებს გამართავს ექვს მუნიციპალიტეტში - გორში, რუსთავში, ოზურგეთში, ზუგდიდში, ქუთაისსა და ბათუმში. 

საინფორმაციო კამპანია ხორციელდება პროექტის „საჯარო და კერძო სექტორებს შორის დიალოგის ხელშეწყობა საქართველოში მონიტორინგისა და ცნობიერების ამაღლების გზით“ ფარგლებში.