2022 წლის 18 იანვარს IDFI-მ სტატისტიკის ეროვნულ სამსახურს და დაავადებათა კონტროლისა და ჯანმრთელობის ეროვნულ ცენტრს (NCDC) მიმართა 2021 წელს გარდაცვლილთა სტატისტიკის შესახებ ინფორმაციის მოთხოვნით - სქესის, ასაკის და გარდაცვალების მიზეზების მიხედვით. სტატისტიკის ეროვნული სამსახურის განმარტებით 2021 წელს გარდაცვლილთა რიცხოვნობა ჯერ კიდევ დამუშავების პროცესშია და ის გამოქვეყნდება მიმდინარე წლის ივნისის ბოლოს. დაავადებათა კონტროლის ცენტრის განმარტებითაც, 2021 წელს გარდაცვლილთა ოფიციალურად დაზუსტებული მონაცემები ამჟამად ხელმისაწვდომი არ არის. თუმცა, NCDC-მ IDFI-ს მოაწოდა მათ მიერ დამუშავებული 2021 წლის გარდაცვალების წინასწარი მონაცემები.

NCDC-ის მიერ მოწოდებული წინასწარი მონაცემებით 2021 წელს საქართველოში 59,638 პირი გარდაიცვალა, რაც 2020 წლის დაზუსტებულ მაჩვენებელს 9,101-ით (+18%) აღემატება.

1994-2020 წლებში ქვეყანაში გარდაცვალების მაჩვენებელი 46 ათასიდან - 51 ათასამდე მერყეობდა, შესაბამისად ბოლო 28 წლის განმავლობაში 2021 წელს გარდაიცვალა ყველაზე მეტი ადამიანი - 59,638.

გარდაცვალების მაჩვენებლის ასეთი რადიკალური ზრდა დაკავშირებული უნდა იყოს კორონავირუსის პანდემიასთან (ოფიციალური მონაცემებით კორონავირუსით 2021 წელს გარდაიცვალა 11,298 ადამიანი).

2021 წლის  დაზუსტებული სტატისტიკა, გარდაცვალების მიზეზების მიხედვით სტატისტიკის ეროვნული სამსახურის მიერ გამოქვეყნდება 2022 წლის ივნისის თვეში.

მოცემული მასალის მომზადება დაფინანსებულია შვედეთის საერთაშორისო განვითარების თანამშრომლობის სააგენტოს, Sida-ს მიერ. შინაარსზე პასუხისმგებლობა სრულად ეკისრება მის შემქმნელს. Sida შესაძლოა არ იზიარებდეს გამოთქმულ ხედვებსა და ინტერპრეტაციებს.